Category: Fréttir

Robert Eriksson farsæll fyrrum landsliðsþjálfari Svía og nú yfirmaður landsliðsmála (Elite Director) hjá Sænska judosambandinu var á landinu um helgina á vegum Judosambands Íslands. Hann var fenginn hingað til að halda fyrirlestur sem ætlaður var stjórnarmönnum judofélaga og þjálfurum um skipulag og uppbyggingu landsliðs/afreksstarfs, uppbyggingu afreks judomanns og uppbyggingu judoæfinga og var sá fyrirlestur haldinn laugardaginn 19. mars. Daginn áður sá hann um sameiginlega æfingu sem haldin var í JR og var hún mjög vel sótt en tæplega þrjátíu manns frá nokkrum klúbbum mættu. Þetta var hörku æfing þar sem meðal annars var farið í baráttuna um handtökin, hvað þarf að varast og fleira og fleira. Þetta var virkilega góð æfing og gefandi og voru menn afar ánægðir með hana. Flott framtak hjá JSÍ. Hér eru nokkrar myndir frá æfingunni.

Vormót JSÍ í yngri aldursflokkum (U15, U18, U21 árs) var haldið í KA heimilinu á Akureyri í gær, laugardaginn 12. mars en það var í umsjón Judodeildar KA. Eins og undanfarin ár þá fórst þeim mótshaldið vel úr hendi en það voru þeir Hans Rúnar Snorrason, Hermann Torfi Björgólfsson og formaður Judodeildar KA, Sigmundur Magnússon sem að stýrðu því. Um dómgæsluna sáu þeir Yoshihiko Iura og Þormóður Árni Jónsson og gerðu það vel eins og þeirra var von og vísa. Hægt var að fylgjast með framvindu mótsins á netinu auk þess sem það var í beinni útsendingu á YouTube rás JSÍ. Til Akureyrar var farið í lítilli rútu og voru keppendur frá JR þrettán og með þeim í för voru tveir þjálfarar þeir Guðmundur Björn Jónasson og Bjarni Friðriksson. Nokkrir kepptu í tveimur aldursflokkum og unnu JR- ingar samtals til sex gullverðlauna, fernra silfurverðlauna og fimm bronsverðlauna. Hér eru myndir frá mótinu, stutt videoklippa og úrslitin.

Hér er frétt tekin af heimasíðu JSÍ. Íslenskir judomenn eru nú um þessar mundir við æfingar í OTC æfingabúðunum í Nymburk og munu æfa þar næstu dagann 8-12 mars tvisvar á dag ásamt mörgum bestu judomönnum heims en þetta eru einar af öflugustu æfingabúðum ár hvert á vegum EJU. Þátttaka okkar manna er meðal annars undirbúningur þeirra fyrir Norðurlandsmeistaramótið sem haldið verður 23-4. apríl. í Íþróttahúsinu Digranes. Þeir sem fóru eru Árni Lund, Skarphéðinn Hjaltason, Kjartan Hreiðarsson, Daníel Árnason, Ingólfur Rögnvaldsson, Hrafn Arnarsson og Logi Haraldsson. Zaza Simonishvili fór með sem þjálfari.

Góumót JR, sem er æfingamót iðkenda 7-10 ára þar sem allir keppendur fá gullverðlaun fyrir þátttökuna, var haldið laugardaginn 26. feb. Keppendur voru fjörtíu og sjö frá sex judofélögum. Ekki er keppni hjá yngri börnum en á æfingu JR- inga í dag fengu iðkendur 5-6 ára sín Góuverðlaun eftir að hafa sýnt judo kunnáttu sína á æfingunni eins og fallæfingar og fleira. Hér eru myndir af nokkrum verðlaunahöfum sem teknar voru á æfingu í vikunni.

Vormót JSÍ 2022 yngri verður haldið á Akureyri 12. mars í KA heimilinu. Keppt verður í flokkum U13, U15 frá 10-12 og U18 og U21 frá 12 og mótslok áætluð um kl. 14:00. Farið verður með rútu kl. 14:00 föstudaginn 11. mars frá Ármúlanum og komið til baka daginn eftir líklega um kl. 21. en nánari tímasetning síðar. Gisting á hóteli með uppábúin rúm. Kostnaður, rúta og gisting um 17.000 kr. fer þó eftir fjölda þátttakenda gæti hækkað eitthvað eða lækkað kemur í ljós að loknum skráningarfresti. JR greiðir keppnisgjöldin fyrir alla. Með hópnum fara tveir til fjórir þjálfarar frá JR. Myndin hér ofar er frá brottför frá JR á vormótið fyrir nokkrum árum.

Góumót JR, sem er æfingamót iðkenda 7-10 ára þar sem allir keppendur fá verðlaun, var haldið sl. laugardag (26. feb.) og voru keppendur frá JR, Judodeild Grindavíkur, Judodeild ÍR, Judodeild Ármanns, JRB (Judofélag Reykjanesbæjar) og Judodeild Selfoss. Á síðasta Góumóti voru keppendur tuttugu og einn í aldursflokkum U8-U11 en í ár voru þeir fjörtíu og sjö sem er ánægjulegt og sýnir gróskuna í barna og unglingastarfi flestra klúbba í dag. Keppendur um helgina hefðu getað verið fleiri því allnokkrir sem skráðir voru til leiks forfölluðust á síðustu stundu af ýmsum ástæðum, meðal annars út af covid smitum. Mótið var fyrst haldið árið 2009 og var nú haldið í þrettánda skiptið en það féll niður 2020 vegna Covid 19. Þátttaka á mótinu í gegnum tíðina hefur jafnan verið góð en hér er hægt að sjá þátttökuna frá 2012 til dagsins í dag. Eins og áður sagði er Góumótið fyrir 7-10 ára en undantekning var gerð 2019 og 2021 og keppti þá einnig aldursflokkur 11-14 ára.

Margir þátttakendanna voru að taka þátt í sínu fyrsta móti og stóðu þeir sig mjög vel sem og aðrir keppendur og höfðu þjálfarar þeirra í nógu að snúast við að undirbúa þá og hafa tilbúna þegar þeir voru kallaðir upp. Börnunum er raðað saman eftir aldri og þyngd eins og venja er og keppa stúlkur og drengir stundum saman í flokkum ef þannig stendur á og einnig þarf stundum að færa keppendur á milli aldursflokka til að þyngd keppenda sé sem jöfnust. Þau sem sáu um dómgæsluna eru ungir og óreyndir sem dómarar en eru hinsvegar á meðal bestu yngri keppnismanna landsins og leystu þau verkið vel af hendi. Dómarar voru þau Aðalsteinn Björnsson, Helena Bjarnadóttir, Jónas Guðmundsson, Nökkvi Viðarsson og Kjartan Hreiðarsson sem hélt utan um dómgæsluna. Svo var það Ari Sigfússon og Skarphéðinn Hjaltason sáu um góða og örugga mótsstjórn. Mótið var frábær skemmtun og börnin sýndu oft á tíðum ótrúlega flott judo. Hér neðar eru myndir frá mótinu og stutt videoklippa en hér eru úrslitin.

Góumót JR 2022 sem opið er öllum klúbbum verður haldið laugardaginn 26. febrúar. Mótið er hugsað sem æfingamót fyrir aldursflokka U9, U10 og U11 (8,9 og 10 ára) og fá allir þátttakendur verðlaun. Ákveðið hefur verið að bæta við aldursflokknum U8 þ.e. flokkur fyrir börn sem fædd eru 2015 og verða því 7 ára á árinu.

Skráningarfrestur hefur verið framlengdur til miðnættis 23. febrúar. Skráning fer fram í skráningarkerfi JSÍ og sjá forsvarsmenn klúbba um allar skráningar.

Vegna væntanlegs óveðurs seinnipartin í dag falla allar æfingar niður en búið er að uppfæra í rauða viðvörun á suðvesturlandi.

Afmælismót JSÍ í aldursflokkum U13, U15, U18 og U21 árs var haldið í æfingasal Judofélags Reykjavíkur laugardaginn 19. febrúar. Keppendur voru þrjátíu og níu frá átta klúbbum en þeim fækkaði töluvert þar sem mikið var um forföll á síðustu stundu sem stafaði að mestu vegna Covid veikinda. Töluvert var af keppendum sem voru að spreyta sig í fyrsta skipti og stóðu þeir sig vel sem og aðrir þátttakendur. Mótið var skemmtilegt og fullt af flottum og spennandi viðureignum. JR ingar unnu sjö gullverðlaun, fimm silfur og tvenn bronsverðlaun. Dómgæslan var vel mönnuð en það voru þau Birkir Hrafn Jóakimsson, Daníel Ólason, Gunnar Jóhannesson, Jón Kristinn Sigurðsson og Marija Skúlason og sem stóðu vaktina að þessu sinni og leystu verkefnið vel af hendi og það gerðu einnig þau Ari Sigfússon sem sá um mótsstjórn og stiga og tímagæslu og Bylgja Dögg Sigurðardóttir sem sá um að streyma beint frá mótinu fyrir JSÍ. Hér eru úrslit mótsins, myndir af verðlaunahöfum og frá mótinu og hér kemur fljótlega svo stutt videoklippa.