Category: Fréttir

Afmælismót JR 2026 í yngri aldursflokkum verður haldið laugardaginn 17. október í JR.
Mótið er opið öllum klúbbum, engin lágmarksgráða og keppt í eftirfarandi aldursflokkum.
Aldursflokkar: U8, U9, U10 og U11 (7, 8, 9 og 10 ára) fæðingarár, 2019, 2018, 2017, 2016.
Aldursflokkar: U13 (11-12 ára) f.ár 2015-2014 og U15 (13-14 ára) f.ár 2013-2012.

Vigtun fyrir 7-10 ára á mótsdegi frá kl. 11:00 til 11:30 og keppnin hjá þeim hefst svo kl. 12:00 og ætti að ljúka um kl. 14:00.

Vigtun fyrir 11-14 ára á mótsdegi frá kl. 13:00 til 13:30 og keppnin hjá þeim hefst svo kl. 14:00 og ætti að ljúka um kl. 16:00.

Mæta tímanlega í vigtun því eftir að henni lýkur eru þeir afskráðir sem mættu ekki.

Tímasetningar gætu breytst en það fer eftir þátttöku og ef svo fer verður það tilkynnt strax að lokinni skráningu.

Skráning til miðnættis 12. október í skráningarkerfi JSÍ.
Keppnisgjald 1.500 kr greiðist af félagi viðkomandi keppanda.

Athugið að það eru klúbbarnir sem sjá um skráningu keppenda, ekki foreldrar.

Haustmót JSÍ 2026 (U13, U15 og U21) verður haldið laugardaginn 3. október í Íþróttahúsi Vallaskóla á Selfossi. Mótið hefst kl. 10 með keppni í aldursflokkum U13 og U15 og að þeirri keppni lokinni um kl. 12 hefst keppni í U21 aldursflokki og mótslok áætluð um kl. 13:30. Vigtað verður á þremur stöðum, hjá JR, UMFS og JRB föstudaginn 2. okt. frá 18-18:30

Haustmót JSÍ 2026 fyrri hluti var haldið í dag laugardaginn 26. september í Íþróttahúsi Akurskóla í Reykjanesbæ. Keppt var í aldursflokkum U18 og senioraflokkum. Mótið hófst kl. 12 og lauk um kl. 14. Mótið gekk vel fyrir sig og dómgæsla og mótsstjórn hin besta. Keppendur voru í færri kantinum í ár en veikindi spiluðu þar inní og auk þess voru nokkrir keppendur erlendis. Þátttakendur voru tuttugu og tveir frá fimm klúbbum, Ármanni, Grindavík, ÍR, JRB og JR. Keppendur JR-inga voru aðeins níu að þessu sinni og unnu þeir fimm gullverðlaun, tvö silfur og eitt brons. Hér eru úrslitin, myndir frá mótinu og videoklippa

Krílamót JRB var haldið sunnudaginn 20. sept. í Akurskóla. Keppendur voru um sextíu frá fimm félögum. Keppnin hófst kl. 13 og lauk um kl. 16:30. Þetta er æfingamót fyrir yngstu iðkendurna og er keppendum raðað saman eftir aldri og þyngd eins og venjulega og allir fá þátttökuverðlaun. Það voru þeir Zaza Simonishvili, Mikael Ísaksson, Viktor Kristmundsson og Jemerllein Machado sem héldu utan um keppendur JR. Hér eru úrslitin og videoklippa. Því miður hef ég ekki fleiri myndir frá verðlaunapallinum svo ef þið eigið myndir þá megiði gjarna senda á jr@judo.is til að setja hér inn.

Haustmót JSÍ 2026 (U13, U15 og U21) verður haldið laugardaginn 3. október í Íþróttahúsi Vallaskóla á Selfossi. Mótið hefst kl. 10 með keppni í aldursflokkum U13 og U15 og að þeirri keppni lokinni hefst keppni í U21 aldursflokki og mótslok áætluð um kl. 15. Vigtun á mótsstað föstudaginn 2. okt. frá 18-18:30 eða á keppnisdegi fyrir alla flokka frá 8:00-8:30 og U21 getur vigtað frá 11:00-11:30. Skráningarfrestur til miðnættis mánudagsins 28. sept. Þegar skráningu er lokið gæti þurft að endurskoða tímasetningar sem verða þá strax auglýstar.

JR ingar heimsóttu Judodeild ÍR í kvöld og heldu félögin vel heppnaða sameiginlega æfingu sem að þeir Zaza Simonishvili og Gísli Egilson stjórnuðu. Þetta er þriðja heimsókn JR á árinu í aðra klúbba en í vor sóttum við heim Judodeild Ármanns og Judofélag Reykjanesbæjar og er ætlunin að heimsækja fleiri klúbba fyrr en seinna. Meðfylgjandi mynd er af þátttakendum að lokinni æfingu.

Í dag mánudaginn 21. sept. verður ekki æfing hjá meistaraflokki og framhaldi eins og venjulega í JR því við ætlum að heimsækja Judodeild ÍR og æfa með þeim. Æfingin þar hefst klukkan 18:00 og mun Zaza Simonishvili stjórna æfingunni. Æfing hjá 11-14 ára er óbreytt og verður á sínum stað og tíma í JR.

Haustmót JSÍ 2026 fyrri hluti verður haldið laugardaginn 26. september í Íþróttahúsi Akurskóla að Tjarnarbraut 5 í Reykjanesbæ. Keppt verður í aldursflokkum U18 og senioraflokkum. Mótið hefst kl. 12 með keppni í U18 og strax að þeirri keppni lokinni hefst keppni í senioraflokkum og áætlað að mótinu ljúki um kl. 15:00. Vigtun fer fram í Akurskóla föstudaginn 25. sept. frá 18-18:30 og á sama stað fyrir þá sem það vilja á keppnisdegi frá kl. 10:30-11:00. Lokaskráning mánudagurinn 21. sept.

Weronika Komandera nældi sér í bronsverðlaun í pólsku bikarkeppninni í U21 aldursflokki (Puchar Polski Juniorek i Juniorów) sem haldin var í Bytom í Póllandi 13. sept. síðastliðinn en þar keppti hún í -48 kg flokki. Weronika æfir í Póllandi þessa dagana og verður þar út september og jafnvel eitthvað lengur.