Sextán gull á Vormóti JSÍ yngri 2024

Vormót JSÍ í yngri aldursflokkum (U15, U18, U21 árs) fór fram laugardaginn 16. mars og var það í umsjón Judodeildar KA og voru það þeir Hans Rúnar Snorrason og Sigmundur Magnússon sem að höfðu veg og vanda af því og var framkvæmd öll til fyrirmyndar. Dómarar voru þeir Ari Sigfússon, Gunnar Jóhannesson og Jakob Burgel Ingvarsson og leystu þeir sitt verkefni vel af hendi. Til Akureyrar var farið í tveimur rútum og voru keppendur frá JR tuttugu og fjórir og fjórtán þeirra kepptu í tveimur aldursflokkum. Með þeim voru þjálfararnir Guðmundur Björn Jónasson, Zaza Simonishvili og Þormóður Jónsson og auk þeirra nokkrir feður keppenda sem sáu um aksturinn og fararstjórn þeir Alfreð Atlason, Helgi Einarsson og Hilmar Arnarson. JR- ingar áttu frábæran dag og unnu samtals til sextán gullverðlauna, ellefu silfurverðlauna og sex bronsverðlauna. Til hamingju með árangurinn. Hér eru úrslitin og hér er hægt að horfa á allt mótið sem var í beinni útsendingu og hér kemur fljótlega stutt videoklippa frá mótinu og myndir frá ferðinni.

Vormót JSÍ 2024 yngri flokkar á Akureyri

Vormót JSÍ 2024 í yngri aldursflokkum (U13/U15/U18 og U21 árs) verður haldið á Akureyri 16. mars í KA heimilinu. Keppt verður í aldursflokkunum U13, U15, U18 og U21 og hefst mótið kl. 10 eins og lýkur væntanlega um kl. 15. Gert er ráð fyrir að vigtun verði einnig eins og undanfarin ár í KA heimilinu föstudagskvöldið 15.mars frá kl.19-21:00 og einnig verði þá hægt að vigta sig að morgni mótsdags. Farið verður með rútu frá JR föstudaginn 15. mars kl. 14 og komið til baka daginn eftir um kl. 21. Kostnaður, rúta og gisting (hótel/uppábúin rúm með morgunmat) um 15.000 kr. sem JR leggur út fyrir og rukkar svo þátttakendur í vikunni að loknu móti en þátttakendur þurfa þó að hafa með sér pening fyrir mat og drykkjum sem hver og einn ákveður sjálfur. Með hópnum fara þrír þjálfarar frá JR. Myndin hér ofar er frá mótinu í fyrra.

Halldór Guðbjörnsson 7. dan

Halldór Guðbjörnsson var í dag gráðaður í 7. dan og fékk viðurkenningarskjal því til staðfestingar afhent af forseta Evrópu Judosambandsins (EJU) Dr. László Tóth en hann er staddur hér á landi í tilefni Kids Festival sem haldið var hér á landi. Til að hljóta þessa gráðu þarf Judosamband Íslands að fá samþykki bæði EJU og Alþjóða Judosambandsins (IJF) og gráðuhafi að uppfylla ýmis skilyrði og þar á meðal lágmarkstíma frá síðustu gráðun sem er tíu ár. Halldór er vel að þessari gráðu kominn, til hamingju Halldór.

Farið í sund og út að borða

Það mættu tólf börn úr 11-14 ára hópnum auk tíu foreldra og eða aðstandenda í Sundhöllina í dag en það var ákveðið að nota daginn sem frátekinn hafði verið fyrir Kids Festival en hafði verið fært á annan dag og gera eitthvað annað í staðinn. Niðurstaðan var sú að fara í sund og að því loknu að borða saman í Grillhúsinu. Það var mikið fjör og mikil stemming hjá krökkunum og skemmtu þau sér vel og það sama má segja um þau fullorðnu. Þetta var afar vel heppnað og verður örugglega endurtekið og helst reglulega en kanski með einhverjum öðrum hætti og með fleiri aldursflokkum.

Hittumst í Sundhöll Reykjavíkur

Þar sem Kids Festival sem vera átti á morgun laugardag var fært á annan dag urðum við (JR) að sleppa þátttöku þar sem þjálfarar og keppendur í Kata voru bundnir í vinnu og eða við önnur verkefni og allmörg börn/foreldrar höfðu önnur plön og gátu ekki breytt sínum áætlunum . Í staðinn ætlum við að nota tækifærið þar sem dagurinn var frátekinn og ákveðið var að fara í sund. Krakkarnir og þeir foreldrar/aðstandendur sem hafa tök á að koma með ætla að hittast við Sundhöllina í Reykjavík á Barónsstíg kl. 14. og verðum þar í umþað bil í einn og hálfan tíma. Að sundi loknu verður borðað í Grillhúsinu á Laugavegi 96 (hver greiðir fyrir sig) en búið er að panta borð fyrir hópinn og örkum við þangað frá Sundhöllinni og ætti viðburðinum svo að vera lokið um kl. 17. Frekari uppl. hjá Guðmundi þjálfara.

Góumót JR 2024 – Úrslit

Góumót JR var haldið laugardagin 24. febrúar en það er æfingamót fyrir yngstu iðkendurna frá 5-6 ára aldri sem er innanfélagsmót og svo 7-10 ára sem er mót opið öllum klúbbum og fá allir keppendur þátttökuverðlaun. Dagurinn hófst kl. 10 á æfingu barna 5-6 ára þar sem farið var yfir helstu keppnisreglur og svo var haldið lítið mót þar sem þau fengu að reyna sig og stóðu þau sig afar vel og fengu sín þátttökuverðlaun og ávaxtadrykki í setustofunni að loknu móti.

Keppnin barna 7-10 ára hófst kl. 13 og lauk henni um kl. 16. Keppendur voru fimmtíu og tveir frá eftirfarandi fimm klúbbum, Judofélag Reykjavíkur(JR), Judodeild Ármanns (JDÁ), Judofélagi Reykjanesbæjar (JRB), Judodeild Grindavíkur (UMFG) og Judodeild Selfoss (UMFS). Flestir þátttakendanna voru að taka þátt í sínu fyrsta móti og stóðu þau sig alveg frábærlega og höfðu þjálfarar þeirra í nógu að snúast við að undirbúa þau og leiðbeina. Börnunum er raðað saman eftir aldri og þyngd eins og venja er og keppa stúlkur og drengir stundum saman í flokkum ef þannig stendur á sem og að stundum þarf að sameina þyngdarflokka svo allir fái mótherja.

Dómgæslan var á höndum nokkura okkar bestu judomanna JR sem leystu það verk vel af hendi en það voru þau Aðalsteinn Björnsson, Jónas Guðmundsson, Mikael Ísaksson, Skarphéðinn Hjaltason og Weronika Komendera sem sáu um það. Daníela Daníelsdóttir og Guðmundur Björn Jónasson héldu utan um JR keppendurna og svo voru það Ari Sigfússon og Kolmar Jónsson sem sáu um góða og örugga mótsstjórn.

Mótið var vel sótt bæði af keppendum sem og foreldrum og eða öðrum skyldmennum sem að fylgdust með keppninni og var þetta frábær skemmtun og ótrúlega flott judo sem þessir ungu iðkendur sýndu. Flestir keppendurnir komu frá Selfossi að þessu sinni og unnu þeir flest gullverðlaunin en þeir hafa oftast verið fjölmennastir frá 2012 eða sex sinnum og á Einar Otto þjálfari Selfoss heiður skilið fyrir hve vel hann heldur á sínum iðkendum. Flest gullverðlaun hafa þó JR ingar unnið en Selfoss kemur þar næst og svo Grindavík en hér er hægt að sjá þátttöku og skiptingu verðlauna frá 2012 til dagsins í dag og hér eru eru svo úrslitin, myndir frá mótinu og stutt videoklippa.

Góumót JR 2024 – börn 7, 8, 9 og 10 ára

Góumót JR 2024 sem er opið öllum klúbbum verður haldið laugardaginn 24. febrúar næstkomandi. Mótið sem fyrst var haldið árið 2009 hefur jafnan verið fjölmennt en það er hugsað sem æfingamót fyrir aldursflokka U8, U9, U10 og U11 (7, 8,9 og 10 ára) og fá allir þátttakendur verðlaun. Skráning er til miðnættis 19. febrúar í skráningarkerfi JSÍ og sjá forsvarsmenn klúbba um allar skráningar. Húsið opnar kl. 12:00 á laugardaginn og verða krakkarnir vigtaðir á milli kl. 12:00 og 12:30 og mótið hefst svo kl. 13:00 og áætluð mótslok kl. 15:00. Nánari tímasetning að lokinni skráningu. Muna að mæta með börnin á tilgreindum tíma í vigtunina svo enginn missi af þátttöku og mótið geti hafist samkvæmt áætlun. Hér er umfjöllun og myndir frá Góumótinu 2023.

Danish Open 2024 – Alli með bronsverðlaun

Danish Open 2024 var haldið dagana 10-11 febrúar í Vejle og voru þátttakendur frá Íslandi tíu auk þjálfara og fararstjóra. Flestir þátttakendurnir kepptu í tveimur aldursflokkum, fyrri daginn í U18 eða senioraflokki og seinni daginn í U21 árs. Frá JR tóku þátt þau Veronika Komendera -57 kg, Jónas Guðmundsson -66 kg, Romans Psenicnijs og Daron Hancock -73 kg, Mikael Ísaksson og Aðalsteinn Björnsson -81 kg og Skarphéðinn Hjaltason -90 kg flokki. Frá KA komu þeir Birkir Bergsveinsson og Samir Jónsson báðir í -66 kg flokki og frá JRB Daníel Árnason einnig í -66 kg flokki. Þjálfari með hópnum var Zaza Simonishvili og Ari Sigfússon fararstjóri. Aðalsteinn Björnsson náði bestum árangri en hann hreppti bronsverðlaunin í U21 árs aldursflokki og Skarphéðinn Hjaltason varð í 7 sæti í U21. Í gær keppti Romans um bronsverðlaunin í U18 -73 kg flokki en tapaði og endaði því í 5. sæti og Weronika varð í 7. sæti í U18 -57 kg. Hér neðar er mynd af JR hópnum á síðustu æfingu áður en lagt var af stað til Danmerkur og Aðalsteini á verðlaunapallinum. Að loknu móti taka við tveggja daga æfingabúðir. Hér má finna úrslitin og hér er linkur á YouTube rás mótsins og hér er bronsglíman hans Alla.

Afmælismót JSÍ yngri 2024 – Úrslit

Afmælismót JSÍ 2024 í aldursflokkum U13, U15, U18 og U21 árs var haldið í æfingasal Judofélags Reykjavíkur laugardaginn 3. febrúar. Keppendur voru fimmtíu og tveir frá sex klúbbum og þar af voru tuttugu og níu frá JR og unnu þeir til níu gullverðlauna, tólf silfurverðlauna og sex bronsverðlauna. Þetta var flott mót með fullt af flottum viðureignum og gaman að sjá hve margir nýjir keppendur voru á meðal þátttakenda og hve vel þeir stóðu sig. Mótsstjórn og tímavarsla var í höndum Ara Sigfússonar og Mikaels Ísakssonar og um dómgæslu sáu þeir Sævar Sigursteinsson, Yoshihiko Iura, Gunnar Jóhannesson, Breki Bernharðsson og Aðalsteinn Karl Björnsson. Hér má sjá úrslitin og hér neðar eru myndir af verðlaunahöfum og frá mótinu.