Category: Fréttir

Góumót JR 2023 sem er opið öllum klúbbum verður haldið laugardaginn 25. febrúar næstkomandi. Mótið sem fyrst var haldið árið 2009 hefur jafnan verið fjölmennt en það er hugsað sem æfingamót fyrir aldursflokka U8, U9, U10 og U11 (7, 8,9 og 10 ára) og fá allir þátttakendur verðlaun. Skráning er til miðnættis 20. febrúar í skráningarkerfi JSÍ og sjá forsvarsmenn klúbba um allar skráningar. Húsið opnar kl. 12:00 á laugardaginn og verða krakkarnir vigtaðir á milli kl. 12:00 og 12:30 og mótið hefst svo kl. 13:00 og áætluð mótslok kl. 15:00. Nánari tímasetning að lokinni skráningu. Muna að mæta með börnin á tilgreindum tíma í vigtunina svo enginn missi af þátttöku og mótið geti hafist samkvæmt áætlun. Hér er umfjöllun og myndir frá Góumótinu 2022.

Afmælismót JSÍ 2023 í aldursflokkum U13, U15, U18 og U21 árs var haldið í æfingasal Judofélags Reykjavíkur laugardaginn 11. febrúar. Keppendur voru aðeins tuttugu frá fimm klúbbum en þeim fækkaði töluvert frá skráningu þar sem mikið var um forföll sem stafaði af veikindum og leiðinda veðri en skráðir keppendur voru um fjörtíu. Mótið var skemmtilegt og fullt af flottum viðureignum. Keppendum okkar gekk vel og unnu þeir sjö gullverðlaun, fjögur silfur og ein bronsverðlaun. Dómgæslan var vel mönnuð en dómarar voru þeir Yoshihiko Iura, Sævar Sigursteinsson, Daníel Ólason, Gunnar Jóhannesson og Ármann Sveinsson og leystu þeir verkefnið vel af hendi og það gerðu einnig þeir Ari Sigfússon og Skarphéðinn Hjaltason sem sáu um mótsstjórn og stiga og tímagæslu. Hér eru úrslit mótsins, myndir af verðlaunahöfum og myndir frá keppninni og hér er svo stutt videoklippa.

Afmælismót JSÍ 2023 í yngri aldursflokkum (U13/U15/U18 og U21) verður haldið laugardaginn 11. febrúar hjá Judofélagi Reykjavíkur og hefst kl 12:00. Nánari upplýsingar hér.

Reykjavík Judo Open 2023 var haldið 28. janúar 2023 á 50 ára afmælisdegi JSÍ. Þátttakendur voru tæplega sextíu frá tólf þjóðum en vegna óveðurs og niðurfellingar á flugi til Íslands komust ekki allir erlendu þátttakendurnir sem skráðir voru. JR ingar sem voru fjölmennir á mótinu unnu tvenn gullverðlaun, ein silfurverðlaun og þrenn bronsverðlaun og auk þess voru nokkrir sem kepptu um bronsverðlaun en urðu að játa sig sigaða. Þeir JR ingar sem unnu til verðlauna voru, Zaza Simonishvili sem sigraði í -73 kg flokki og varð einnig í þriðja sæti í opnum flokki. Ingunn Sigurðardóttir sigraði í -78 kg flokki og varð í fimmta sæti í opnum flokki. Romans Psenicnijs vann silfurverðlaunin í -66 kg flokki, Helena Bjarnadóttir varð í þriðja sæti í -63 kg flokki og í fimmta sæti í opnum flokki og Árni Lund varð í þriðja sæti í -90 kg flokki.
Hér eru úrslitin / results og tengill á útsendingu RÚV frá mótinu og streymi JSÍ.

Úrslit:
2013, 2014, 2015, 2016, 2017, 2018, 2019, 2020, 2021, 2022, 2023

Judosamband Íslands (JSÍ) sem er 50 ára í ár heldur nú í ellefta sinn Reykjavík Judo Open í samvinnu við RIG (Reykjavik International Games). Þetta er opið alþjóðlegt mót fyrir karla og konur og fer það fram í Laugardalshöllinni laugardaginn 28. janúar sem er jafnframt stofndagur JSÍ. Mótið hefst með forkeppni frá 9:00 til 12:00. Brons, úrslitaglímur og opinn flokkur verða svo á dagskrá frá kl. 13:00 til 15:00. Á þetta mót hafa komið afar sterkir þátttakendur frá fjölmörgum löndum bæði heims og Ólympíuverðlaunahafar. Fyrir utan Íslendinga á mótinu í ár koma keppendur frá ellefu þjóðum sem eru CZE, BRA, DEN, ESP, FAR, FRA, GBR, GEO, GER, NOR og UKR. Sýnt verður beint frá keppninni hjá RÚV frá kl. 13:00 -15:00 en auk þess mun JSÍ streyma frá öllu mótinu og verða tenglar fljótlega settir hér inn á síðuna. Upplýsingar um vigtun og fleira er að finna á heimasíðu JSÍ og hér er keppendalistinn.

Úrslit: 2013, 2014, 2015, 2016, 2017, 2018, 2019, 2020, 2021, 2022, 2023

Æfingar barna 5-6 ára og Gólfglíma 30+ falla niður laugardaginn 28. jan. þar sem alþjóðlegt judomót Reykjavík Judo Open 2023 fer fram sama dag í Laugardalshöll og allir þjálfarar verða uppteknir við það.

Alþjóðlega unglingamótinu í Bielsko-Biala í Póllandi lauk í gær. Því miður náðum við ekki að vinna til verðlauna að þessu sinni en krakkarnir fengu margar glímur sem sumar unnust en aðrar ekki og fer það allt saman í reynslubankann þeirra. Fyrir mótið var æft með Pólskum klúbbi, farið var í skoðunarferð í gamla námu sem nú er vinsæll ferðamannastaður og farið í Flyspot sem er einskonar fallhlífastökk innanhúss í vindgöngum. Að loknu móti tók við eins dags æfingabúðir ásamt flestum þátttakendum mótsins. Þrátt fyrir að komast ekki á pall þá var ferðin mjög vel heppnuð og hlakkar krakkana til að taka þátt í fleiri judoviðburðum og æfingabúðum erlendis sem eru framundan en þangað til að æfa mikið og vera vel undirbúin fyrir þau verkefni. Hér eru úrslitin og myndasafn frá ferðinni

Það verður streymt frá mótinu í Bielsko-Biala sem að krakkarnir okkar taka þátt í og hefst mótið kl. 9:00 í dag. Keppt verður á tíu völlum og eru linkar á þá hér neðar en hér er drátturinn.

Völlur 1. Völlur 2. Völlur 3. Völlur 4. Völlur 5.

Völlur 6. Völlur 7. Völlur 8. Völlur 9. Völlur 10.

Í gær lagði af stað til Póllands hópur keppenda úr JR í aldursflokkum U13/U15/U18 og munu þau keppa næsta laugardag á International Judo Tournament For Children and the Youth í Bielsko-Biala og sunnudaginn eftir mót taka þau þátt í eins dags æfingabúðum. JR ingar tóku þátt í þessu móti árið 2020 og unnu þar margar viðureignir og Danielė Kucyte vann til bronsverðlauna. Þau se,m taka þátt að þessu sinni eru Fannar Þormóðsson í U13, Orri Helgason í U15 og í U18 eru þau Aleksander Perkowski, Tristan Sverrisson, Elías Þormóðsson, Jónas Guðmundsson og Weronika Komendera og kepptu þau þrjú síðastnefndu einnig árið 2020. Þetta mót er fjölmennt og sterkt en síðast var keppt á tíu völlum og keppendur um tólfhundruð frá Tékklandi, Hollandi, Slóvakíu, Úkraníu, Ungverjalandi, Íslandi og auðvitað Póllandi. Þjálfarar og fararstjórar í ferðinni eru þeir Guðmundur Björn Jónasson, Janusz Komendera og Helgi Einarsson.

Gunnar Jóhannesson (UMFG) og Þormóður Jónsson (JR) þreyttu nú nýverið gráðupróf fyrir 4. dan og voru þeir uke hjá hvor öðrum. Katan fyrir 4. dan er Kime No Kata og er hún byggð upp af átta brögðum í krjúpandi stöðu og tólf í standandi stöðu og sýnir vörn og gagnsókn og er notkun hnífs og sverðs í hluta hennar. Prófið stóðust þeir með glæsibrag og óskum við þeim til hamingju með gráðuna. Hér er mynd af þeim félögum að lokinni gráðun.

F.v. Þormóður Jónsson og Gunnar Jóhannesson