Category: Fréttir

Dómaranefnd JSÍ stóð fyrir dómaranámskeiði 25. janúar síðastliðinn og var það haldið í JR. Farið var yfir það nýjasta í reglum IJF og helstu áherslur og vafaatriði útskýrð. Námskeiðið var vel sótt en þátttakendur sem mættu á staðin auk leiðbeinenda voru fimmtán auk fjölmargra sem fylgdust með á Teams.

Í vikunni sem leið fóru fram nokkrar gráðanir í JR. Þann 17. janúar tók Helena Bjarnadóttir og Weronika Komendera 2. kyu (blátt belti), 19. janúar var Mikael Ísaksson gráðaður í 1. kyu (brúnt belti), Nökkvi Viðarsson í 2. kyu og Helgi Hrafnsson í 3. kyu (grænt belti) og í dag var Romans Psenicnijs gráðaður í 1. kyu og þeir félagar Elías Þormóðsson og Gunnar Ingi Tryggvason voru gráðaðir í 2. kyu. Til hamingju öll með áfangann.

Vinkonurnar Helena Bjarnadóttir og Weronika Komendera þreyttu gráðupróf í 2. kyu (blátt belti) í kvöld og stóðust það með glæsibrag. Til hamingju með áfangann.

Vorönn 2022 hefst 3. janúar samkvæmt stundaskrá og er skráning hafin.

Æfingar meistaraflokks og framhalds 15 ára og eldri hefjast 3. janúar og Gólfglíma 30 + hefst þriðjudaginn 4. jan.

Byrjenda og framhaldsnámskeið 11-14 ára hefst mánudaginn 3. janúar.

Byrjenda og framhaldsnámskeið 7-10 ára hefst þriðjudaginn 4. janúar.

Námskeið barna 5-6 ára hefst laugardaginn 9. janúar.
(Allir byrjendur 5-6 ára fá judobúning frá JR)

Æfingar hjá byrjendum 15 ára og eldri hefast mánudaginn 10. janúar.

Hér er skráningarform en einning er hægt að hafa samband í síma 588-3200 eða senda tölvupóst á netfangið jr@judo.is
Helstu upplýsingar eins og æfingatími, gjöld, þjálfarar, stundaskrá og fleira má finna undir Námskeið. 

Allir fá fría prufutíma fyrstu vikuna. Það er í góðu lagi að mæta í prufutíma með síðar íþróttabuxur og bol ef þú átt ekki judobúning eða eitthvað svipað en judobúninga er hægt að fá hjá JR.

Hér eru nokkrar myndir af starfseminni frá nýliðnu ári

Í dag heldur af stað til Svíþjóðar níu manna hópur íslenskra judomanna og mun þar taka þátt í fimm daga æfingarbúðum í Malmö Elite Center og er það hluti af undirbúningi þeirra fyrir Reykjavík Judo Open 2022 en á það mót hafa boðað komu sína fjölmargir sterkir erlendir keppendur. Þeir sem fara eru Árni Lund, Ingólfur Rögnvaldsson. Kjartan Hreiðarsson, Skarphéðinn Hjaltason, Andri Ævarsson, Matthías Stefánsson, Jakub Tomczyk, Hrafn Arnarsson og Logi Haraldsson. Á myndina vantar þá tvo síðastnefndu.

Judomaður ársins hjá Judofélagi Reykjavíkur var valinn í fyrsta skipti árið 2019  og er sá valinn sem best hefur staðið sig á árinu í senioraflokki. Þá er einnig valinn judomaður ársins í U21 árs aldursflokki og sá efnilegasti í U18/21. Við valið er ekki einungis tekið mið af árangri heldur einnig ástundun, framkomu og virðingu fyrir íþróttinni. Aðeins er valinn einn judomaður ársins hverju sinni, kona eða karl og það sama á við í U21 og þann efnilegasta.

Árni Pétur Lund er Judomaður JR 2021 og er það í annað sinn sem hann hlýtur þann heiður en hann var einnig judomaður JR 2019. Árni sem keppir jafnan í -81 kg flokki stóð sig vel á árinu. Hann vann öll mót sem hann tók þátt í hér heima í sínum þyngdarflokki og auk þess vann hann opna flokkinn á Íslandsmeistaramótinu og er hann ásamt einum til sá léttasti til þess að gera það en yfirleitt eru það keppendur í léttþungavigt og þungavigt sem hafa unnið þann flokk. Árni varð einnig Íslandsmeistari með félagi sínu JR í liðakeppni JSÍ sem var að vinna þann titil í tuttugusta skiptið. Vegna Covid-19 var þátttaka í erlendum viðburðum nánast engin og keppti Árni aðeins á tveimur erlendum mótum. Fyrst var það Evrópumeistaramótið, þar var hann óheppinn að mæta ríkjandi heimsmeistara í fyrstu umferð og tapaði og féll úr keppni og síðan keppti hann á alþjóðlegu móti í Finnlandi, Opna Finnska og varð þar í þriðja sæti. Helsti árangur

Ingólfur Rögnvaldsson er Judomaður JR 2021 í U21 árs aldursflokki og er það í fyrsta sinn sem hann hlýtur þann titil. Á Opna Finnska varð hann annar í -66 kg flokki karla og fékk bronsverðlaun í -66 kg í aldursflokki U21 árs. Á Baltic Sea Championships var Ingólfur ekki langt frá því að komast á verðlaunapall í aldursflokki U21 árs. Í flokknum hans -66 kg voru nítján keppendur og því keppt með útsláttar fyrirkomulagi. Hann sigraði keppanda frá Frakklandi í fyrstu viðureign en tapaði þeirri næstu gegn Svía sem að sigraði flokkinn síðar um daginn. Ingólfur fékk því uppreisnarglímu og sigraði þar keppanda frá Ísrael en tapaði svo fjórðu viðureign gegn keppanda frá Eistlandi og endaði því í sjöunda sæti. Hér heima keppti Ingólfur ýmist í -66 kg eða -73 kg flokki og vann öll þau mót sem hann tók þátt í. Helsti árangur

Aðalsteinn Karl Björnsson sem er 15 ára og keppti ýmist í -60 og 66 kg flokki var valinn efnilegasti Judomaður JR 2021. Hann stóð sig gríðavel á árinu, tók þátt í tveimur erlendum mótum og á Opna Finnska vann hann bronsverðlaun í -66 kg í U18. Hér heima keppti hann til úrslita ekki bara í sínum aldursflokki U18 þar sem hann vann langoftast heldur einnig í U21 árs og senioraflokkum. Aðalsteinn hefur verið mjög duglegur að mæta á aukaæfingar, lyftingar, þrek og tækniæfingar og er hann öðrum til fyrirmyndar og með sama áframhaldi á hann örugglega eftir að ná langt í íþróttinni enda mikið efni þar á ferð. Helsti árangur

Judofélag Reykjavíkur óskar öllum gleðilegra jóla og farsældar á nýju ári og þökkum samstarfið á árinu sem er að líða.

Jólamót/Afmælismót JR í kvenna og karlaflokkum var haldið föstudaginn 17. desember. Þetta er innanfélagsmót sem fyrst var haldið 2006 og var það nú haldið í fimmtánda skipti en það féll niður 2020 vegna Covid 19. Keppendur voru í færra lagi í ár eða aðeins tólf, sem sagt fámennt en góðmennt. Þyngdarflokkar voru sameinaðir og keppt var í fjórum flokkum, einum kvennaflokki +57 kg og þremur karlaflokkum, -66,-90 og +90 kg. Keppt er um farandbikara sem orðnir eru sögulegir en þeir eru áletraðir nöfnum fyrrum sigurvegara sem voru okkar bestu judomenn þess tíma. Tvö ný nöfn bætast nú á bikarana en Helena Bjarnadóttir sigaði í +57 kg flokki og Ingólfur Rögnvaldsson -66 kg flokki en hann hafði ekki áður keppt á þessu móti en það höfðu hinsvegar þeir Logi Haraldsson -90 kg og Þormóður Jónsson +90 kg gert en þeir voru að sigra í þriðja og fjórða skiptið. Starfsmenn voru þeir Þorgrímur Hallsteinsson sem sá um klukku og stigatöflu og Eiríkur Kristinsson um dómgæsluna og kunnum við þeim bestu þakkir fyrir. Hér eru úrslitin og nokkrar myndir frá mótinu og vidoklippa.

Ákveðið hefur verið vegna mikillar fjölgunar Covid-19 smita að fella niður síðustu æfingar fyrir jól hjá 15 ára og eldri sem voru á dagskrá á morgun, þriðjudag og miðvikudag og er því komið jólafrí í öllum aldursflokkum. Æfingar hefjast aftur á nýju ári mánudaginn 3. janúar.

Ef mikil stemming verður fyrir því (15 ára og eldri) að æfa á milli jóla og nýárs þ.e. dagana 27, 28 og 29 des. og Covid-19 stoppar það ekki þá verður það tilkynnt hér.