Category: Fréttir

Á uppskeruhátíð JSÍ 17. desember 2022 var Marija Dragic Skúlason heiðursgráðuð í 4. dan fyrir áralöng störf fyrir JSÍ en hún hefur verið einn okkar virkasti dómari til margra ára og alltaf boðin og búin til að dæma á JSÍ mótum sem og öðrum mótum þegar eftir því hefur verið leitað. Til hamingju með gráðunina.

Á uppskeruhátíð JSÍ 2022 var Karl Stefánsson úr Judodeild Ármanns valin judomaður ársins 2022 og þau efnilegustu voru valin þau Helena Bjarnadóttir og Aðalsteinn Björnsson bæði úr Judofélagi Reykjavíkur. Á uppskeruhátíðinni voru einnig veittar ýmsar viðurkenningar. Nánari upplýsingar hér á vef JSÍ. 

Jólamót/Afmælismót JR í kvenna og karlaflokkum var haldið föstudaginn 16. desember. Þetta er innanfélagsmót sem haldið hefur verið á meistaraflokksæfingu föstudegi um miðjan desember og var það fyrst haldið 2006. Þátttakendur á þessu móti eru allir þeir sem mæta á æfinguna og vilja keppa og þurfti því ekki að skrá sig til keppni fyrirfram. Í kvennaflokkum er keppt í -57 kg og +57 kg en í karlaflokkum -66, -73, -81, -90 og +90 kg og eins og undanfarin ár voru flokkar sameinaðir til að fá sem flestar viðureignir og sá sem sigrar fær nafn sitt letrað á þann bikar sem tilheyrir hans þyngdarflokki. Kvennaflokkurinn -57 og +57 var sameinaður og karlaflokkarnir -73 og -81 kg og -90 og +90 kg. Keppt er um farandbikara sem orðnir eru sögulegir en þeir eru áletraðir nöfnum fyrrum sigurvegara sem voru okkar bestu judomenn þess tíma. Hér er videoklippa frá mótinu og úrslitin 2022,  2021 og 2019.

Á síðustu æfingu fyrir Jól hjá iðkendum 11-14 ára á föstudaginn var einnig haldið Jólamót með þeim sem mættu á æfinguna og vildu keppa og eru úrslitin hér.

Judomaður JR 2022 verður valinn í fjórða skiptið í kvöld en það var fyrst gert 2019 og verður valið tilkynnt á Jólamóti/Afmælismóti JR senioar í kvöld kl. 18. Ekki er aðeins valinn judomaður ársins heldur einnig judomaður ársins í U21 árs aldursflokki og sá efnilegasti í aldursflokki U18/U21 árs. Við valið er ekki einungis tekið mið af árangri heldur einnig ástundun, framkomu og virðingu fyrir íþróttinni. Einungis er valinn einn judomaður ársins og er það annaðhvort kona eða karl hverju sinni og það sama á við í U21 og þann efnilegasta. Í ár ætlum við líka að velja sjálfboðaliða ársins en það verður í fyrsta skipti sem það er gert.

Síðasta æfing fyrir jól hjá börnum 5-6 ára og 7-10 ára var haldin í gær og var vel mætt en þó vantaði nokkur börn. Þetta var ekki hefðbundinn judoæfing heldur mestmegnis farið í leiki en þó var líka smá gólfglíma. Áður en farið var í Jólakaffið var börnunum afhent viðurkennig fyrir önnina. Þau börn sem komust ekki í gær geta sótt sína viðurkenningu í JR eða fengið hana afhenta þegar þau mæta næst.

Síðasta æfing fyrir jól hjá börnum 5-6 ára og 7-10 ára verður á fimmtudaginn 15. des. en þá verður sameiginleg æfing með þessum aldursflokkum og hefst hún kl. 17 og verður hún að mestu í leikjaformi. Æfingin hjá börnum 5-6 ára sem hefði átt að vera laugardaginn 17. des. fellur því niður. Að lokinni æfingu verður farið í setustofuna þar sem í boðið verða drykkir , kökur, ávextir og ýmslegt fleira og kaffi fyrir þá fullorðnu.

Síðasta æfing hjá 11-14 ára verður á föstudaginn 16. des. Að lokinni æfingu kl. 18 verður boðið í jólakaffi/drykki og veitingar í setustofunni og þau sem ekki eru að flýta sér geta þá horft á Jólamót/Afmælismót JR í karla og kvennaflokkum sem hefst um kl. 18:15.

Síðasta æfing fyrir áramót hjá 15 ára og eldri verður á miðvikudaginn 21. des. Hugsanlega verða haldnar aukaæfingar fyrir þennan aldurshóp dagana 27, 28 og 29 desember og verður það þá auglýst hér síðar.

Æfingar hefjast svo aftur á nýju ári sem hér segir. Byrjenda og framhaldsnámskeið 11-14 ára og 15 ára og eldri hefjast mánudaginn 2. janúar. Gólfglíma, byrjendur/framhald 30 ára og eldri hefst þriðjudaginn 3. janúar og æfingar barna 5-6 ára hefjast laugardaginn 7. janúar.

Jólamót/Afmælismót JR í kvenna og karlaflokkum verður haldið föstudaginn 16. desember og hefst um kl. 18:15. Þetta er innanfélagsmót sem fyrst var haldið 2006 og er það nú haldið í sextánda skipti en það féll niður 2020 vegna covid. Ekki þarf að skrá sig fyrirfram því allir sem mæta á æfingu á föstudaginn geta keppt og verður keppendum raðað í flokka að lokinni vigtun. Í kvennaflokkum hefur verið keppt í -57 kg og +57 kg en í karlaflokkum -66, -73, -81, -90 og +90 kg en hugsanlega verða flokkar sameinaðir en það fer eftir þátttöku. Keppt er um farandbikara sem orðnir eru sögulegir en þeir eru áletraðir nöfnum fyrrum sigurvegara sem sumir hverjir eru hættir keppni en voru okkar bestu judomenn þess tíma. Hér eru úrslitin 2021 og 2019.

Íþróttabandalag Reykjavíkur (ÍBR) heiðraði í dag Reykvíska íþróttamenn og félög fyrir góðan árangur á árinu sem er að líða. Framkvæmdastjórn ÍBR velur íþróttakarl, íþróttakonu og íþróttalið Reykjavíkur 2022 en átta konur og átta karlar auk nokkurra Reykvískra liða voru tilnefnd. Árni Pétur Lund úr JR hlotnaðist sá heiður að vera einn af þeim íþróttamönnum sem tilnefndir fyrir árið 2022 og einnig var karlalið meistaraflokks Judofélags Reykjavíkur eitt af þeim liðum sem tilnefnd voru sem íþróttalið ársins 2022.

Helsti árangur Árna á árinu er Íslandsmeistaratitill þriðja árið í röð í -81 kg flokki, silfurverðlaun á Norðurlandameistaramótinu og á Reykjavík International Games 2022 (RIG) varð Árni í þriðja sæti. Karlalið meistaraflokks Judofélags Reykjavíkur varð Íslandsmeistari í liðakeppni JSÍ 2022. Var það í tuttugusta og fyrsta skipti og jafnframt níunda árið í röð sem JR sigrar í þeirri keppni sem haldin hefur verið frá 1974.

Það voru þau Andrea Kolbeinsdóttir frjálsíþóttakona úr ÍR og Snorri Einarsson skíðagöngumaður úr Ulli sem valin voru íþróttamenn Reykjavíkur 2022 og meistaraflokkur Vals í handknattleik var valið lið ársins 2022. Judofélag Reykjavíkur óskar öllum ofangreindum til hamingju með kjörið.

Laugardaginn 26. nóvember stóð Judodeild Selfoss fyrir judodegi fyrir yngstu iðkendurna (6-10 ára) og var viðburðurinn opinn öllum klúbbum. Hugmyndin var að halda sameiginlega judoæfingu og svo smá leiki í íþróttahúsinu og borða síðan saman að lokum. Þátttakendur voru fimmtíu og fyrir utan Judodeild Selfoss voru þátttakendur frá Judodeild Grindavíkur, Judofélagi Reykjanesbæjar og Judofélagi Reykjavíkur en frá JR voru þeir fimmtán. Æfingin sem haldin var í íþróttahúsi Vallaskóla hófst kl. 14:00 á upphitun með ýmsum leikjum. Að upphitun lokinni var þátttakendum skipt í þrjá hópa eftir aldri á þrjár stöðvar. Hver hópur var í ákveðin tíma á hverri stöð og færði sig síðan á þá næstu. Einn hópurinn æfði gólf og standandi glímu á judodýnunum sem voru fyrir miðju íþróttahúsi á meðan var sá næsti að æfa standandi tækni í öðrum enda hússins og voru þar notaðar mjúkar þykkar kastdýnur til að æfa hin ýmsu kastbrögð og þriðji hópurinn fór í hinn enda hússins en þar voru allskonar íþróttaáhöld til að æfa sig á. Að æfingu lokinni sem var um kl. 15:00 bauð Judodeild Selfoss öllum í pizzu og svaladrykki. Einar Otto Antonsson þjálfari barna á Selfossi hafði veg og vanda að viðburðinum stjórnaði honum fagmannlega en honum til aðstoðar voru aðrir þjálfarar frá Selfossi og öllum gestaklúbbunum. Þetta var frábært framtak hjá Judodeild Selfoss og vel heppnað og áttu börnin frábæran dag á Selfossi og hlakka til að koma aftur að ári. Hér er videoklippa frá æfingunni. Takk fyrir okkur.

Í vikunni tóku sjö börn í aldursflokknum 5-6 ára og 7-10 ára beltapróf þar sem þau misstu af því í síðustu viku. Í aldursflokknum 5-6 ára voru það þeir Nikola Desnica, Marcel Bakowski og Kacper Marcin Kula sem þreyttu prófið og stóðust það með prýði og það sama gerðu þau Benjamín Blandon , Fannar Þormóðsson, Freyja Atladóttir og Sólveig Viðarsdóttir í aldursflokknum 7-10 ára.