Category: Fréttir

Frétt af heimasíðu JSÍ. Hópur ungmenna úr unglingalandsliðum U18 og U21 eru nú við æfingar í Pajulahti, Finnlandi. Ásamt unglingalandsliði Íslands taka Finnar, Svíjar, Danir og Eistar þátt æfingabúðunum að þessu sinni. Æfingabúðirnar eru liður í undirbúning landsliðs fyrir þau mót sem eru framundan eru, en næst á dagskrá er Reykjavik Judo Open 2023 þann 28. janúar. Í hópnum að þessu sinni eru þau Aðalsteinn Björnsson, Mikael Ísaksson, Skarphéðinn Hjaltason, Helena Bjarnadóttir, Kjartan Hreiðarsson og Daron Hancock. Þjálfari og fararstjóri er Zaza Simonishvili.

Þeir félagar Konstantinos Vergopoulos og Heully Raysan Santos Dantas sem æft hafa hjá JR um alllangt skeið þreyttu gráðupróf nú nýlega og var Konstantinos að taka gráðuna 5. kyu (gult belti) og Raysan tók gráðuna 2. kyu (blátt belti) og óskum við þeim til hamingju með áfangann.

Benjamín Birgir Blandon og Fannar Frosti Þormóðsson tóku próf fyrir gulabeltið í dag og stóðu sig með sóma enda búnir að æfa í mörg ár og búnir að bíða lengi eftir þessum áfanga því gulabeltið er ekki hægt að fá fyrr en á ellefta ári. Benjamín byrjaði að æfa níu ára gamall eða fyrir tveimur árum en Fannar byrjaði sex ára og er því búinn að æfa judo í fimm ár og var kominn með allar þær strípur sem hægt var að fá í gamla beltið sitt. Til hamingju með áfangann strákar.

Vorönn 2023 hefst 2. janúar samkvæmt stundaskrá og er skráning hafin.

Byrjenda og framhaldsnámskeið 5-6 ára barna hefst laugardaginn 7. janúar.
(Judobúningur fylgir byrjendanámskeiði, hámarksfjöldi 20 börn )

Byrjenda og framhaldsnámskeið 7-10 ára barna hefst þriðjudaginn 3. janúar.

Byrjenda og framhaldsnámskeið 11-14 ára hefst mánudaginn 2. janúar.

Byrjendanámskeið 15 ára og eldri hefst mánudaginn 9. janúar.

Gólfglíma, byrjendur/framhald 30 ára og eldri hefst þriðjudaginn 3. janúar.

Meistaraflokkur og framhald 15 ára og eldri hefst mánudaginn 2. janúar.

Allir byrjendur fá fría prufutíma fyrstu vikuna. Það er í góðu lagi að mæta í prufutíma með síðar íþróttabuxur og bol ef þú átt ekki judobúning eða eitthvað svipað en judobúninga er hægt að fá hjá JR.

Hér er er gengið frá skráningu en einning er hægt að hafa samband í síma 588-3200 eða senda tölvupóst á netfangið jr@judo.is
Helstu upplýsingar eins og æfingatími, gjöld, þjálfarar og fleira má finna undir Námskeið. 

Judofélag Reykjavíkur óskar öllum gleðilegra jóla og farsældar á nýju ári. Sjáumst hress á því næsta en æfingar hefjast aftur samkvæmt stundaskrá 3. janúar.

Ingimundur Kárason tók gráðuna 1. kyu (brúnt belti) 20. desember sl. og gerði það með glæsibrag en liðin eru allmörg ár síðan hann tók bláa beltið. Ingimundur hefur verið mjög virkur í fjölmennum hópi gólfglímumanna 30+ í JR og var Atli Þórðarson sem einnig æfir í þeim hópi, Uke hjá Ingimundi en Atli tók einmitt sjálfur gráðuna 1. kyu í nóvember s.l. Þess má til gamans geta að Ingimundur er sonur hins eina og sanna Kára Jokobssonar margfalds Íslandsmeistara JR inga hér á árum áður.

Tilkynnt var um val á Judomanni ársins 2022 hjá Judofélagi Reykjavíkur föstudaginn 16. desember. Judomaður JR var valinn í fyrsta skipti árið 2019  og er verður sá fyrir valinu sem bestum árangri hefur náð á árinu í senioraflokki. Þá er einnig valinn judomaður ársins í U21 árs aldursflokki og sá efnilegasti í U18/21 en hann getur aðeins verið valinn einu sinni. Við valið er ekki einungis tekið mið af árangri heldur einnig ástundun, framkomu og virðingu fyrir íþróttinni. Aðeins er valinn einn judomaður ársins hverju sinni, kona eða karl og það sama á við í U21 og þann efnilegasta. Sjálfboðaliðar hvers félags eru ákaflega mikilvægir fyrir starfsemi þess en þeir eru oft ekki mjög sjáanlegir og því ekki margir sem taka eftir þeirra störfum. Því var ákveðið að bæta úr því og taka upp þann sið að velja einn sjálfboðaliða úr hópi fjölmargra og heiðra hann samhliða því er judomenn ársins verða heiðraðir.

Zaza Simonishvili er Judomaður JR 2022 og er það í annað sinn sem hann hlýtur þann heiður en hann var einnig judomaður JR 2020. Zaza sem keppir jafnan í -73 kg flokki stóð sig vel á árinu og er hér hans helsti árangur. Norðurlandameistari í -73 kg flokki og gullverðlaun á sama móti með sveit Íslands í liðakeppninni. Sigurvegari í -73 kg flokki á Reykjavík Judo Open (RIG) og Íslandsmeistari í -73 kg flokki og í opnum flokki og jafnframt sá léttasti sem hefur sigrað þann flokk.

Kjartan Hreiðarsson sem er 19 ára var valinn Judomaður JR 2022 í U21 árs aldursflokki og er það í þriðja sinn sem hann hlýtur þann titil en hann varð einnig fyrir valinu 2019 og 2020.  Helsti árangur Kjartans á árinu í U21 árs aldursflokki eru bronsverðlaun á Norðurlandameistaramótinu í -73 kg flokki, silfur á Íslandsmeistaramótinu í – 81 kg flokki og gull með sveit JR í liðakeppninni. Gullverðlaun á Afmælismóti JSÍ -81 kg flokki og einnig gullverðlaun á Vormóti og Haustmóti JSÍ í -73 kg flokki og Reykjavíkurmeistari í sama flokki. Auk þess vann hann fjölda verðlauna í senioraflokkum eins bronsverðlaun í -73 kg á Reykjavík Judo Open, silfur á Íslandsmeistaramótinu í -73 kg og brons í opna flokknum og var í sigursveit JR í liðakeppninni. Gull á Haustmóti JSÍ -73 kg flokki og Reykjavíkurmeistari í sama flokki og að lokum gullverðlaun í liðakeppni karla á Norðurlandameistaramótinu.

Daron Karl Hancock sem er 16 ára var valinn efnilegasti Judomaður JR 2022. Hann stóð sig vel á árinu og er hér stiklað á hans helsta árangri en hann keppti í -73 kg flokki. Á evrópumeistaramóti smáþjóða (EM/GSSE) varð hann í öðru sæti í aldursflokki U18, á Norðurlandameistaramótinu var hann í 7. sæt í U18 og í 5. sæti í U21 árs aldursflokki. Hann fékk silfurverðlaun á Íslandsmeistaramótinu og á Vormóti JSÍ í U18 og U21 árs vann hann einnig til silfurverðlauna. Daron stóð sig einnig vel í senioraflokkum en hann varð í 7. sæti á Reykjavík Judo Open, fékk bronsverðlaun á Íslandsmeistaramóti karla og varð í 7. sæti í opna flokknum. Auk þess var hann í bronsverðlaunasveit JR í liðakeppni karla á Íslandsmeistaramótinu og fékk silfur í liðakeppni U21 árs.

Helgi Einarsson var valinn sjálfboðaliði ársins 2022. Það voru margir tilnefndir en aðeins einn skyldi útnefndur og valið því erfitt því allir voru vel að heiðrinum komnir. Helgi hefur komið að starfseminni með ýmsum hætti en hann á börn sem æfa hjá félaginu og hafa gert í mörg ár. Helgi hefur verið rútubílstjóri í æfinga og keppnisferðum, aðstoðarfararstjóri í ferðum bæð innanlands og erlendis, hjálpað til við mótahald, dýnuburð, kaffiveitingar og fleira sem til hefur fallið og meira segja komið færandi hendi með húsgögn í setustofuna.

Judomenn JR 2019, 2020, 2021, 2022

Á uppskeruhátíð JSÍ 17. desember 2022 var Marija Dragic Skúlason heiðursgráðuð í 4. dan fyrir áralöng störf fyrir JSÍ en hún hefur verið einn okkar virkasti dómari til margra ára og alltaf boðin og búin til að dæma á JSÍ mótum sem og öðrum mótum þegar eftir því hefur verið leitað. Til hamingju með gráðunina.

Á uppskeruhátíð JSÍ 2022 var Karl Stefánsson úr Judodeild Ármanns valin judomaður ársins 2022 og þau efnilegustu voru valin þau Helena Bjarnadóttir og Aðalsteinn Björnsson bæði úr Judofélagi Reykjavíkur. Á uppskeruhátíðinni voru einnig veittar ýmsar viðurkenningar. Nánari upplýsingar hér á vef JSÍ.