Category: Fréttir

Það er mikið um að vera þessa helgi hjá íslenskum judomönnum en um helgina munu sex keppendur spreyta sig á tveimur mótum og er annað þeirra Evrópumeistaramót í cadett flokki (U18) í Portúgal en þar er einn keppandi frá Íslandi ásamt þjálfara og hitt er Birmingham Junior European Cup (U21 árs) og eru þar fimm keppendur ásamt Gísla Egilsyni fararstjóra og þjálfara. Keppendur okkar í Birmingham eru þeir Kjartan Hreiðarsson og Daron Hancock sem keppa á morgun laugardag í -73 kg flokki og í -81 kg flokki eru þeir Böðvar Arnarsson og Mikael Ísaksson sem keppa á sunnudaginn ásamt Skarðhéðni Hjaltasyni í – 90 kg flokki. Keppnin hefst báða dagana kl. 8 að morgni að íslenskum tíma og hægt er að fylgjast með í beinni útsendingu og einnig er hægt að finna allar upplýsingar um keppnina, úrslit og fleira hér á vef IJF. Að lokinni keppni taka við tveggja daga æfingabúðir hjá strákunum. Hér er umfjöllun um mótið á vef EJU.

Evrópumeistaramót Cadett þ.e. aldursflokkur 15-17 ára stendur nú yfir í Portúgal og á meðal keppenda er Arnar Arnarsson frá Selfossi og með honum í för er Zaza Simonishvili landsliðsþjálfari. Arnar keppir á morgun, laugardaginn 24 júní í – 90 kg flokki og hefst keppnin kl. 9 að íslenskum tíma og mætir hann Emil Jabiyev frá Svíþjóð sem er í 37 sæti heimslistans í cadett flokki. Hægt er að fylgjast með í beinni útsendingu og einnig er hægt að finna allar upplýsingar um keppnina, úrslit og fleira hér á vef IJF.

Smáþjóðaleikarnir voru haldnir á Möltu dagana 29. maí til 3. júní og voru tíu íslenskir þátttakendur í judo á meðal keppenda en alls voru keppendur sjötíu frá níu þjóðum. Í einstaklingskeppninni 30. maí, náðu þeir Árni Pétur Lund -90 kg og Egill Blöndal -100 kg bestum árangri en þeir unnu til bronsverðlauna. Helena Bjarnadóttir -63 kg, Weronika Komendera -52 kg og Skarphéðinn Hjaltason -90 kg kepptu einnig um bronsverðlaun en töpuðu þeirri viðureign og enduðu í 5. sæti. Sveitakeppninni fór fram 1. júní og kepptum við aðeins í karlasveit. Keppt er í þremur þyngdarflokkum -66kg(-60kg og -66kg), -81kg(-73kg og -81) og -100kg og var sveitin skipuð þeim Aðalsteini Björnssyni og Kjartani Hreiðarssyni í -81kg og Árna Pétri Lund og Agli Blöndal í -100kg. Því miður var sveitin ekki fullskipuð þar sem Romans Psenicnijs -66 kg var frá keppni vegna meiðsla svo sveitin byrjaði alltaf með eitt tap. Fyrst mættum við Monaco og tapaðist sú keppni með einum vinningi gegn tveimur (Kjartan tapaði en Árni vann). Næst mættum við Lichtenstein og fór hún eins, við töpuðum með einum vinningi gegn tveimur (Kjartan vann en Egill tapaði) og þar með vorum við úr leik. Á vef JSÍ má sjá nánari umfjöllun um einstaklingskeppnina og liðakeppnina. Upplýsingar um keppnina og úrslit má finna víða eins og hér hjá IJF sem og hér og á heimasíðu EJU er líka hægt að sjá úrslitin og skoða myndasafn frá leikunum. Hér eru pdf skjöl, keppnisgögn, úrslit, skipting verðlauna.

Það fjölgaði svartbeltunum í JR í gær en þá tóku fimm aðilar gráðupróf í 1. dan og stóðust það með glæsibrag. Þeir sem þreyttu prófið voru, Aðalsteinn Björnsson, Daron Hancock, Ingólfur Rögnvaldsson, Romans Psenicnijs og Skarphéðinn Hjaltason. Myndirnar hér neðar eru af drengjunum og prófdómurum. Til hamingju með áfangann.

Smáþjóðaleikarnir verða haldnir á Möltu dagana 29. maí til 3. júní. Tíu Íslenskir þátttakendur í judo verða á meðal keppenda en það eru þau Aðalsteinn Karl Björnsson, Árni Pétur Lund, Egill Blöndal, Gísli Fannar Egilson, Helena Bjarnadóttir, Karl Stefánsson, Kjartan Logi Hreiðarsson, Romans Psenicnijs, Skarphéðinn Hjaltason og Weronika Komendera. Með þeim í för eru flokkstjóri og þjálfarar þeir Þormóður Árni Jónsson og Zaza Simonishvili. Góða ferð og gangi ykkur vel.

Þriðjudaginn 30. maí verður einstaklingskeppnin og hefst hún kl. 9:30 að íslenskum tíma og úrslit kl. 16 og liðakeppnin verður svo 1. júní á sömu tímum og einstaklingskeppnin. Hægt er að horfa á keppnina í beinni útsendingu og einnig eru upplýsingar um keppnina á vef IJF.

Nú fer að líða að síðustu æfingum á vorönn. Á morgun er næstsíðasta æfing barna 7-10 ára og sú síðasta á þessari önn verður svo á fimmtudaginn (27. maí) og munu börn úr aldurshóp 5-6 ára einnig mæta á þá æfingu og er það jafnframt síðasta æfing þeirra á önninni. Á þessari æfingu munu börnin fá afhent viðurkenningaskjal fyrir þátttökuna. Síðasta æfing hjá 11-14 ára og framhaldi 15 ára og eldri verður miðvikudagurinn 31. maí.

Meistaraflokkur æfir hinsvegar í sumar, líkast til fram í miðjan júlí (nánar tímasett síðar) og er öllum úr framhaldi 15 ára eldri og iðkendum sem eru 13 og 14 ára úr framhaldi 11- 14 ára aldursflokki velkomið að mæta á þær æfingar en þær verða á mánudögum, miðvikudögum og föstudögum kl. 18:00-19:30.

Á æfingu barna 5-6 ára laugardaginn 13. maí var beltapróf fyrir börnin og fengu þau nýja strípu í beltið sitt að loknu prófi. Þau sem tóku prófið voru Ea Kjærnested, Auður Elídóttir, Marinó Elíson, Haukur Kristmundsson, Alex Paulsson, Aron Arnarsson, Ásgrímur Jónsson, og Elsa Friðgeirsdóttir og stóðu þau sig alveg frábærlega og fengu strípu á beltið sitt í viðeigandi lit en litirnir á strípunum segja til um aldur barns og fjöldi segir til um hve lengi hefur verið æft. Fyrir börn 6 ára og yngri eru strípurnar fjólubláar en síðan kemur gul, (7 ára), rauð (8 ára) græn (9 ára) og blá (10 ára) og tvær strípur þýðir eitt ár. Á þessa æfingu mættu börn úr eldri hóp til að fylgjast með systkynum sínum og eru þau með á myndinni hér neðar en Gustav er bróðir Eu, Auður er systir Marinós og Freyja er systir Elsu.

Norðurlandameistaramótið 2023 var haldið í Drammen í Noregi daganna 13-14 maí. Keppendur frá Íslandi voru sextán sem kepptu í U18, U21, Seniora og Veterans flokkum. Helena Bjarnadóttir (JR) varð í öðru sæti í U18 -70 kg og keppti hún einnig um bronsverðlaunin í sama flokki í U21 árs. Í veterans flokki (30 og eldri) keppti Ari Sigfússon (JR) og nældi hann sér í bronsverðlaunin í -100 kg flokki. Í karlaflokki sigraði Egill Blöndal (UMFS) í -100kg flokki og Karl Stefánsson (Ármanni) varð þriðji í +100 kg flokki. Aðrir keppendur stóðu sig einnig vel og unnu fjölda viðureigna þó ekki kæmust þeir á pall en Romans Psenicnijs (JR) komst næst því en hann keppti um bronsverðlaun í U18 í -66 kg flokki. Fleiri JR- ingar unnu viðureignir á mótinu, Aðalsteinn Björnsson vann sex viðureignir, Kjartan Hreiðarsson, Daron Hancock og Weronika Komendera unnu þrjár viðureignir hvor en aðrir færri. Þó ekki hafi komið fleiri verðlaun í hús þá var þetta góð reynsla fyrir okkar keppendur sem eru ungir að árum en meðalaldur keppenda frá JR er aðeins um 17 ár svo þeir eiga mikið inni.

Þeir félagar Daníel Leó Ólason (JR) og Úlfur Böðvarsson (UMFS)þreyttu saman gráðupróf fyrir 1. dan laugardaginn 13. maí og stóðust það með glæsibrag. Til hamingju með áfangann.

Keppnin hefst kl. 6 í fyrramálið að Íslenskum tíma og keppt verður á fimm völlum. Hér neðar eru linkar á beina útsendingu, gang mótsins og úrslit.