Fréttir

Logi Haraldsson tók þátt í Europen Judo Open í Madrid sem haldið var um 1-3. júní sl. Í -81 kg flokknum hjá Loga voru 38 keppendur og mætti hann Manuel Rodrigues (POR). Logi byrjaði illa og fékk shido eftir aðeins þrjátíu sekúndur og Manuel skoraði síðan Wazaari tíu sekúndum síðar. Þegar um tvær og hálf mínúta var eftir af viðureigninni fékk Logi annað shido og staðan var orðin verulega slæm en þá tók hann loksins við sér og átti glímuna sem eftir var og Manuel alveg búinn á því. Logi átti ágætis vinnslu í gólfinu þar sem hann reyndi að komast í lúmska hengingu og tvær Uchimata sóknir og vantaði aðeins örlítið uppá í seinna skiptið að hann næði að skora en því miður tókst það ekki og hann féll úr keppni en hörkuglíma hjá Loga og hefði hann eflaust unnið viðureignina ef hann hefði haft svona  þrjátíu sekúndur í viðbót en hann fór bara of seint í gang. Hér er glíman hans og Manuels.

Egill Blöndal keppti á Southern Area Senior Open laugardaginn 2. júní sl. Í flokknum hans -90 kg voru fimm keppendur og keppti hann því við fjóra andstæðinga sem hann vann örugglega en allar viðureignirnar vann hann á ippon og gullið var hans. Hér má sjá -90kg flokkinn. Vel gert Egill.

Egill Blöndal og Logi Haraldsson munu báðir keppa erlendis um helgina.
Egill keppir í Bretlandi á Southern Area Senior Open laugardaginn 2. júní og Logi 3. júní á Spáni á Europen Judo Open í Madrid
                                        

Norðurlandamótið var haldið í Hilleröd í Danmörku dagana 26. og 27. maí sl.  og vorum keppendur rúmlega fimm hundruð frá öllum norðurlandaþjóðunum og frá Íslandi voru fjörtíu og tveir sem kepptu í öllum aldursflokkum, þ.e. U18, U21, karla og kvenna flokkum og Masters sem er keppni þrjátíu ára og eldri. Árangur okkar var flottur  en við unnnum til sex verðlauna. Þormóður Jónsson vann örugglega +100 kg flokkinn og þar með gullverðlaunin, Sveinbjörn Iura og Árni Lund kepptu um bronsverðlaunin í -81 kg flokki og hafði Sveinbjörn betur þannig að Árni varð í fimmta sæti í flokknum. Egill Blöndal keppti einnig um bronsverðlaunin í – 90 kg flokki karla gegn Finna og varð að lúta í lægra haldi og varð því í fimmta sæti eins og Árni. Í U21 árs hreppti Grímur Ívarsson silfur í -100 kg flokki og Árni Lund tók bronsverðlaunin í -81 kg flokki og það sama gerði Hekla Pálsdóttir í -70 kg flokki. Ari Sigfússon og Edda Tómasdóttir kepptu í Masters. Ari sem keppti núna í -90 kg flokki náði ekki að endurtaka leikinn frá því í fyrra er hann fékk bronsverðlaun en Edda hinsvegar vann bronsverðlaunin í Hilleröd í -70 kg flokki. Keppendur okkar stóðu sig ágætlega en auðvitað misvel og held ég að ekki sé á neinn hallað með því að segja að Árni Lund hafi staðið sig hvað best þó svo að hann hafi ekki landað gulli í U21 en það átti hann að gera. Hann glímdi sjö viðureignir í -81 flokki karla og vann fimm þeirra en tapar tveimur og báðum í gullskori  og í U21 árs glímdi hann sex viðureignir og vinnur fimm þeirra svo allt í allt vinnur hann tíu viðureignir af þrettán sem er harla gott. Unglingarnir okkar U18 stóðu sig með prýði en þeir voru að keppa á sínu sterkasta móti til þessa og voru flestir á yngsta ári í aldursflokknum en verða hinsvegar á elsta ári þegar NM verður haldið á Íslandi 2019. Það var keppt í sveitakeppni í fyrsta skipti í langan tíma en það hefur líkast til verið gert síðast fyrir um þrjátíu árum en núna var keppt í blandaðri sveit karla og kvenna. Sveitina skipuðu eftirtarandi, -57 enginn, -73 Gísli Vilborgarson, -70 Berenika Bernat, -90 Sveinbjörn Iura, +70 Anna Soffía Víkingsdóttir og +90 kg Þormóður Jónsson. Þetta var skemmtilegasti hluti mótsins og gríðarleg stemming.  Við byrjuðum á því að leggja Danina að velli en við skildum jöfn 3-3 eftir umferðina og þá var dregið random um einn flokk og skyldi keppt til úrslita með gullskorsfyrirkomulagi. það var -90 kg flokkurinn kom upp og þar var Sveinbjörn okkar maður en hann hafði lagt Danann í fyrri glímunni í gullskori og nú skildi keppt á ný en Sveinbjörn sem er í feykna formi glímdi gríðarlega vel og slengdi Dananum með fallegu Tai-otoshi og sigurinn var okkar. Næst mættum við Finnum og töpuðum fyrir þeim á stigum og einnig töpuðum við fyrir Svíum. Við kepptum ekki við Norðmenn þar sem þeir höfðu dregið lið sitt út úr keppninni eftir töp gegn Finnum og Svíum.  Danirnir unnu sem unnu Svía fengu silfurverðlaunin en þeir voru með jafnmarga vinninga og Svíarnir en færri tæknistig svo Svíarnir fengu því gullverðlaunin og Ísland bronsverðlaunin en við vorum líkt og Svíar með jafnmarga vinninga sveitar en fleiri tæknistig en Finnar. Landsliðsþjálfararnir þau Jón Þór Þórarinsson, Hermann Unnarsson og Anna Soffía Víkinsdóttir höfðu í nógu að snúast enda keppt á fjórum völlum og leystu þau sitt verk vel af hendi. Það sama gerðu dómararnir okkar þeir  Birkir Hrafn Jóakimsson og Björn Sigurðarson en þeir dæmdu tvo daga í röð frá morgni til kvölds og fjölda úrslitaviðureigna sem aðeins dómarar í betri kantinum eru látnir gera. Hér eru úrslitin og nokkrar myndir hér neðar frá ferðinni og hér er smá video samantekt þar sem bæði við og andstæðingar okkar fá fyrir ferðina.

Í dag fara um fjörtíu þátttakendur til Danmerkur til að taka þátt í Norðurlandameistaramótinu sem haldið verður í Hilleröd dagana 26. og 27. maí. Keppendur eru rúmlega þrjátíu auk farastjóra, þjálfara og dómara. Keppendur okkar munu keppa í öllum aldursflokkum þ.e. U18, U21, karla og kvennaflokkum og Masters sem er keppni karla og kvenna 30 ára og eldri. Á laugardaginn (26 maí) verður keppt í U18 og senioraflokkum og á sunnudaginn í ÖldungaflokkiU21 og sveitakeppni karla og kvenna. Verður það í fyrsta skiptið sem keppt er í blandaðri sveit karla og kvenna á NM en sveitin er skipuð sex þátttakendum í eftirfarandi þyngdarflokkum. Konur í -57, -70 og +70 og karlar í -73, -90 og +90 kg. Það verður ákveðið að lokinni einstaklinskeppni á laugardaginn hverjir munu skipa sveitina sem keppir svo á sunnudag. Þátttakendur koma frá öllum Norðurlöndunum og eru þeir rúmlega fimm hundruð og má sjá kependalistann hér. Með hópnum fara landsliðsþjálfararnir þeir Jón Þór Þórarinsson, Hermann Unnarsson og Anna Soffía Víkinsdóttir og dómararnir þeir Birkir Hrafn Jóakimsson og Björn Sigurðarson og JSÍ mun verða með fulltrúa á ársþingi Judo sambanda Norðurlandaþjóðanna sem haldið er samhliða mótinu.

Á síðustu æfingunni í JR sem Hugo Lorain var með áður en hann hélt af landi brott var á meðal iðkenda gestur frá Idaho í Bandaríkjunum, Ruth Lewinski og er hér smá video af henni á æfingunni.  Takk fyrir heimsóknina í JR Ruth.

Þá er búið að standsetja Laugardalshöllina fyrir Íslandsmótið, búið að koma fyrir tveimur völlum og tölvubúnaði og öðrum hlutum sem fylgja svona móti. Því miður var mæting starfsmanna frá klúbbum og stjórn JSÍ til að aðstoða við uppsetningu arfaslök og er það eitthvað sem þarf að taka til skoðunnar en það voru aðeins átta aðilar sem mættu og þar af einn keppandi sem hefði átt að vera heima hjá sér og einbeita sér að keppninni.
Þetta hafðist þó allt saman og mótið mun hefjast á áætluðum tíma kl.10. Þeir sem komast ekki á mótið geta fylgst með því í beinni útsendingu með því að smella á eitthvert JSÍ logoið hér neðar og hér er keppendalistinn.
Góða skemmtun.

Íslandsmeistaramót karla og kvenna 2018 verður haldið í Laugardalshöllinni laugardaginn 5. maí næstkomandi og hefst kl. 10 með forkeppni sem lýkur um kl. 12. Úrslit hefjast svo kl. 13 og standa þau yfir til kl. 14 en þá hefst keppni í opnum flokkum sem lýkur um kl. 15:30 og mótslok um kl. 16. Hér er keppendalistinn.

Vigtun hjá JR föstudaginn 4. maí frá 18:30-19:00 og muna að hafa bæði bláan og hvítan judobúning kláran í keppninni, nánari upplýsingar hér.

Þeir félagar Þormóður, Logi og Egill stóðu sig með sóma á Evrópumeistaramótinu sl. helgi. Það var vitað að andstæðingarnir yrðu öflugir og líkurnar væru ekki okkar megin. Logi keppti fyrstur og mætti mætir Sami Chouchi(BEL) en hann er í 49 sæti heimslistans. Logi byrjaði vel og var að því er virtist sterkari í tökunum og glíman leit vel út fyrir hann en eitt augnablik gleymdi Logi sér og Belginn var eldsnöggur að átta sig á því og nýtti sér það frábærlega og vann hann Loga á hengingu sem Logi þekkir og notar mikið sjálfur svo það var frekar fúlt að tapa þannig. En ljósi punkturinn var þó sá að Belginn gerði sér lítið fyrir og fór alla leið í úrslitin og endaði með silfrið svo þetta var enginn meðalmaður sem Logi tapaði fyrir. Hér er glíman hans Loga. Egill keppti næstur og mætti  David Klammert (CZE) sem er í 19 sæti heimslistans og gríða sterkur judomaður. Þetta var hörkuglíma sem Egill tapaði að lokum eftir fullan glímutíma en gat alveg eins endað með sigri Egils sem glímdi mjög vel og barðist til síðustu sekúndu. David Klammert tapaði næstu viðureign gegn silfurhafanum  Nemanja Majdov frá Serbíu  Hér er glíman hans Egils. Þormóður mætti Guram Tushishvili (GEO) sem er í öðru sæti heimslistan og margfaldur verðlaunahafi á stærstu mótum heims. Þormóður byrjaði mjög vel og gaf Guram engin færi á sér og barðist vel í tökunum og þegar um 45 sekúndur voru liðnar komst Þormóður í gott bragð og gerði sér lítið fyrir og kastaði Guram á bakið nokkuð sem sést ekki á hverjum degi og fékk wazaari fyrir kastið og munaði ekki miklu að það hefði verið ippon kast eða þá að Þormóður hefði geta fylgt því eftir í fastatak en því miður fór það ekki svo. Glíman hélt áfram og nú var Guram ekki skemmt reiknaði alls ekki með þessu og breytti um stíl og tók önnur tök og náði eldsnöggu og fallegu seoi nage og fékk sanngjarnt ippon fyrir það. Hér er glíman hans Þormóðs.

Nú er búið að draga á Evrópumeistaramótinu í Ísrael. Það er óhætt að segja að það hefði verið hægt að fá auðveldari andstæðinga. Þormóður fær líklega erfiðasta andstæðinginn en hann mætir Guram Tushishvili (GEO) sem er í öðru sæti heimslistan, núverandi Evrópumeistari og margfaldur verðlaunahafi á Grand Slam mótunum. Í 90 kg flokknum sem Egill keppir í eru á meðal þátttakenda sex efstu menn heimslistans sem segir allt um styrkleika Evrópumeistaramóts. Egill mætir David Klammert (CZE) sem er í 19 sæti heimslistans og gríða sterkur judomaður sem og andstæðingur Loga en hann mætir Sami Chouchi (BEL) en hann er í 49 sæti heimslistans. Þetta verður strembið hjá strákunum en þeir bjuggust svo sem alltaf við því að þetta yrði ekki auðvelt en þeir eru í feykna formi og munu án efa  selja sig dýrt. Hér er drátturinn og hægt er að fylgjast með keppninni í beinni útsendingu. Logi keppir á föstudaginn og á aðra viðureign en keppnin hefst kl. 8 að Ísl. tíma og Egill og Þormóður keppa á laugardaginn og eiga aðra og þriðju viðureign og hefst keppnin hjá þeim kl. 9 að Ísl. tíma.