Category: Fréttir

Æfingabúðirnar í Gerlev eru nú hálfnaðar og hefur hópurinn verið duglegir við æfingar. Á æfingum er góð tæknikennsla sem allir hafa lært mikið af. Aðalsteinn, Daron og Nökkvi æfa í yngri hópi sem er fyrir alla fædda 2006 og seinna. Daníel, Gylfi, Ingunn, Jakub, Kjartan, Matthías æfa með eldri hópi sem er fyrir alla fædda 2005 og fyrr. Æft er tvisvar á dag í báðum hópum og nóg úrval af glímufélögum og eru allir duglegir að sækja sér félaga. Í kringum æfingar er alltaf einhver dagskrá eins og fyrirlestrar, mismunandi íþróttakeppnir og ýmislegt annað sem er í boði. Danska landsliðið tekur þátt í æfingabúðunum og einnig eru hópar frá Póllandi, Slóvakíu, Svíþjóð og Tékklandi á meðal þátttakenda. Íslenski hópurinn kemur heim á laugardaginn.

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

JSÍ hefur valið landsliðshóp (Seniors, U21 og U18) sem leggur af stað í nótt til að taka þátt i æfingabúðum í Danmörku sem fara fram dagana 1. til 7 ágúst í Gerlev sem er í um klukkutíma fjarlægð frá Kaupmannahöfn með lest . Við höfum margoft tekið þátt í þessum æfingabúðum áður og líkað vel en æfingar eru tvær á dag við mjög góðar aðstæður og flottir þjálfarar. Dönsku landsliðin (Seniors, Juniors og Cadett) eru á meðal þátttakenda en auk þeirra er búist við um eitt hundrað þátttakendum víðs vegar úr Evrópu. Þau sem taka þátt að þessu sinni frá Íslandi eru, Gísli Egilson sem er fararstjóri og þjálfari, Ingunn Rut Sigurðardóttir, Matthías Stefánsson, Kjartan Hreiðarsson, Aðalsteinn Björnsson, Daron Hancock, Daníel Árnason, Nökkvi Viðarsson, Jakub Tomczyk og Gylfi Edduson. Fleiri voru valin til fararinnar eins og t.d. Hekla Pálsdóttir, Böðvar Arnarsson, Ingólfur Rögnvaldsson, Vésteinn Bjarnason, Hákon Garðarsson, Birkir Bergsveinsson svo einhverjir séu nefndir en komust ekki eða urðu að hætta við þátttöku.

Þá er glæsilegri judokeppni og frábærri skemmtun Ólympíuleikanna Tokyo 2020 lokið og má finna öll úrslitin hér á heimasíðu IJF (Alþjóða Judosambandið).
Hér er umfjöllun og ýmiskonar samantekt um keppnina sem og fullt af myndum á heimasíðu EJU ( Evrópu Judosambandið )

Ólympíuleikarnir 2020 í Tokyo hófust í dag 23. júlí og munu standa til 8. ágúst. Judokeppnin hefst á morgun og stendur í átta daga. Keppt verður í einum kvennaflokki og einum karlaflokki dag hvern í sjö daga en þyngdarflokkarnir eru sjö hjá hvoru kyni. Áttunda daginn verður svo keppt í liðakeppni og eru þrjár konur og þrír karlar í hverju liði en þar munu tólf þjóðir eigast við.

Keppendurnir eru 393 frá 5 heimsálfum og 128 þjóðum, 201 karlar og 192 konur. Sveinbjörn Iura sem var líklegastur Íslenskra judomanna til að komast á leikana náði því miður ekki að vinna sér inn þátttökurétt og verður því enginn fulltrúi frá Íslandi á meðal keppenda að þessu sinni.

Keppnin hefst alla daga kl. 2 að nóttu á okkar tíma (11 að morgni í Japan) og úrslit fara svo fram kl. 8 að morgni á okkar tíma. Keppt verður á tveimur völlum og er hægt að horfa á mótið beinni útsendingu hjá IJF en til þess þarf að hafa (IJF account) og er hann frír og notast aftur og aftur. Hér er keppnisröðin og drátturinn í öllum flokkum.

Því miður er ekki hægt að horfa á mótið í beinni útsendingu hjá IJF eins og auglýst var hér ofar sökum sjónvarpsréttarákvæða. Mæli með að nota Eurosport eða hlaða niður appi í símann (Eurosport Player) og kostar mánaðar áskrift um 1.000 kr og hægt að fylgjast með öllum íþróttagreinum á leikunum í beinni útsendingu eða skoða síðar.

Dagskrá

Laugardagur 24 júlí 2021     Dagur 1        (Konur -48 kg völlur 1, Karlar -60 kg völlur 2)

Sunnudagur 25 júlí 2021      Dagur 2        ( Konur -52 kg völlur 2, Karlar -66 kg völlur 1)

Mánudagur 26 júlí 2021        Dagur 3        ( Konur -57 kg völlur 1, Karlar -73 kg völlur 2)

Þriðjudagur 27 júlí 2021       Dagur 4        ( Konur -63 kg völlur 2, Karlar -81 kg völlur 1)

Miðvikudagur 28 júlí 2021   Dagur 5        ( Konur -70 kg völlur 1, Karlar -90 kg völlur 2)

Fimmtudagur 29 júlí 2021 Dagur 6        ( Konur -78 kg völlur 2, Karlar -100 kg völlur 1)

Föstudagur 30 júlí 2021        Dagur 7        ( Konur +78 kg völlur 1, Karlar +100 kg völlur 2)

Laugardagur 31 júlí 2021 Dagur 8        Liðakeppnin/blönduð lið

Judosamband Íslands gráðaði þá félaga Vilhelm H. Svansson og Craig D. Clapcott úr Judodeild Ármanns í gær og stóðust þeir prófið með glæsibrag. Craig fékk sitt fyrsta svarta belti þegar hann tók gráðuna 1. dan og Vilhelm eða Villi eins og hann er alltaf kallaður tók gráðuna 2. dan en hann tók 1. dan 2011 eða fyrir 10 árum. Til hamingju með áfangann.

Alþjóða judosambandið (IJF) gaf út í síðustu viku keppendalista þeirra sem munu taka þátt í Ólympíuleikunum sem haldnir verða í Tokyo í sumar en judokeppnin fer fram dagana 24 til 31 júlí. Hér er keppendalisti karla og hér er keppendalisti kvenna. Af 366 keppendum koma 192 þeirra frá Evrópu eða um 52% sem segir allt um það hve íþróttin er öflug í Evrópu. Allmargar þjóðir eiga fleiri en einn keppenda sem náði lágmörkunum en vegna keppendakvóta verða þær því að ákveða á næstunni hver þeirra muni keppa fyrir þeirra hönd. Að lokinni einstaklingskeppninni verður keppt í blandaðri liðakeppni, þrjár konur og þrír karlar í hverju liði (konur -57,-70,+70 og karlar -73,-90,og +90 kg.) og er listinn hér yfir þær tólf þjóðir sem munu etja kappi saman.

Sportabler er vef – og snallsímaforrit sem Judofélag Reykjavíkur hefur tekið í notkun og gerir skipulagningu og samskipti í starfinu skilvirkari og einfaldari. Kerfið er ætlað þjálfurum, iðkendum, foreldrum og starfsmönnum íþróttafélaga.

Þetta ferli fyrir neðan á einungis við þá sem eru ekki með Sportabler aðgang. Ef þú ert með Sportabler aðgang þarftu ekki kóða til að sjá nýja flokka. Það er nóg fyrir þjálfara/íþróttastjóra JR að bæta iðkandanum við í flokkinn og þá kemur dagskráin sjálfkrafa inn hjá foreldra/leikmanni.

Forsenda þess að geta skráð sig í Sportabler er að þjálfari hafi skráð leikmann með kennitölu í flokkinn.

Hér eru skrefin að skráningu.
1. Skrá í hóp: Fara á www.sportabler.com eða í appstore/playstore til að ná í appið (IOS)/(Android)(mælum með appinu).  Þegar þú opnar appið sérðu neðst á síðunni Nýr notandi? Skráðu þig í hóp. 

2. Setja inn kóða flokksins/hópsins, (sjá neðst á þessari síðu): Þið fáið kóðann frá þjálfara eða leikmanni/aðstandanda sem er nú þegar skráður í flokkinn. Næsta skref er að stimpla kóðann inn. ATH þið getið líka stimplað inn kóðann í gegnum tölvu á sportabler.com—>Innskrá—> Skráning í flokk með kóða ef það hentar betur.

3. Fylla inn skráningaupplýsingar (Velja “Ég er leikmaður” / “Ég er foreldri”eftir því sem við á). Leikmaður setur inn sitt netfang (Netfang leikmanns), foreldri setur inn sitt netfang (Netfang foreldris). Ekki blanda þessum skráningum saman. 

4. Staðfesta netfang í tölvupósti sem þið fáið frá Sportabler: Smella á “hér” þá opnast nýr gluggi (Skref 5). Muna eftir að athuga ruslpóst/spam folder.

5. Búa til lykilorð  Veljið ykkur lykilorð. Samþykkja þarf skilmála Sportabler og hvetjum við ykkur til þess að kynna ykkur þá.

6. Allt klárt ! Skrá sig inn og þá ætti “Mín dagskrá” að taka á móti ykkur. Hér er svo hægt að sjá stutt kynningarmyndband um kerfið.

Spurningar, vandræði eða útskýringar, hafið samband við þjónustuver Sportabler eða í gegnum sportabler@sportabler.com

Hér fyrir neðan eru kóðar flokka til að skrá sig inn í Sportabler.
Veljið þann flokk sem iðkandi stundar.

Börn 5-6 ára, kóði 72221H
Börn 7-10 ára, kóði O2176E
Börn 11-14 ára, kóði AJFKJV
Byrjendur 15 ára og eldri, kóði 6OJL7E
Framhald 15 ára og eldri, kóði OSESPT
Meistaraflokkur JR (brúnt belti eða hærri gráða), kóði YDZ1VB
Gólfglíma 30 ára og eldri, kóði STVBNR

Breytingin á æfingatíma frá og með mánudeginum 21. júní. Eins og áður hefur komið fram þá verður æft í allt sumar hjá JR en æfingum fækkað og sameinaðar hjá meistaraflokki og framhaldi 15 ára og eldri og verða þær á mánudögum, miðvikudögum og fimmtudögum á sama tíma og áður þ.e. frá 18:30-20:00. Einnig er gerð breyting á æfingum hjá 11-14 ára. Æfingatími verður lengdur en æfingum fækkað í tvær á viku (föstudsagsæfingin fellur niður) og verða því æfingar hjá þeim á mánudögum og miðvikudögum frá kl. 17:10 til 18:30.

Sveinbjörn Iura hefur lokið keppni á heimsmeistaramótinu sem haldið er í Búdapest þessa dagana en það hófst 6. júní og lýkur 13. júní. Sveinbjörn keppti í gær í 81 kg flokknum  og mætti þar Lee Sungho frá Kóreu. Eins og venjulega þá er þetta barátta um tökin en sá sem er sterkari þar stjórnar glímunni og var Lee þar öllu sterkari. Eftir umþað bil eina mínútu fær Sveinbjörn á sig refsistig fyrir aðgerðarleysi og skömmu síðar skorar Lee ippon þegar hann komst inn í seionage kast og þar með var keppninni lokið hjá Sveinbirni og hjá Íslandi því hann var eini keppandinnn okkar á HM að þessu sinni. Heimsmeistaramótið var síðasta úrtökumótið fyrir Ólympíuleikana í Tókýó 2021 og var þetta því síðasti möguleiki fyrir Sveinbjörn til að vinna sig inn á þá en því miður gekk það ekki eftir og verður hann því ekki þar á meðal keppenda. Hér má sjá viðureign þeirra Sveinbjörns og Lee og úrslitin  í öllum flokkum.

• 

• 

• 

• 

Heimsmeistaramótið 2021 hófst í Búdapest í Ungverjalandi 6. júní og stendur í átta daga en því lýkur 13. júní. Þátttakendur eru 664 frá 5 heimsálfum og 118 þjóðum, 386 karlar og 278 konur. Sveinbjörn Iura sem er í 69 sæti heimslistans er á meðal þátttakenda og er Jón Þór Þórarinsson landsliðsþjálfari með honum í för. Sveinbjörn keppir á morgun í 81 kg flokknum en það er fjölmennasti flokkurinn á mótinu og eru keppendur þar sjötíu og sjö. Hann mætir þar Lee Sungho frá Kóreu sem er í 26. sæti heimslistans en besti árangur hans á árinu er 3. sæti á Kazan Grand Slam í maí og 5. sæti á Asíu meistaramótinu í apríl. Mótið hefst kl. 8 í fyrramálið á okkar tíma og á Sveinbjörn þriðju viðureign á velli 2. Mótið er í beinni útsendingu og til að horfa á þarf að hafa (IJF account) og er hann frír og notast aftur og aftur. Hér er keppnisröðin og drátturinn í öllum flokkum.