Fréttir

Þeir félagar Kolmar Ari Jónsson og Eyjólfur Orri Sverrisson þreyttu gráðupróf í 2. kyu í kvöld og stóðust það með glans. Til hamingju með áfangann.

Æfingum á vorönn lýkur í þessari viku hjá 4-6 ára og 7-10 ára en æfingum þeirra var framlengt um eina viku. Hinsvegar verða æfingar í sumar hjá 11-14 ára fram í ágúst á sömu dögum og á sama tíma eins og verið hefur. Einnig verða æfingar í sumar hjá framhaldi 15 ára og meistarflokki eins og verið hefur fram í miðjan júní en þá sameinst tímarnir en nánari upplýsingar um það verða verða birtar síðar.

Ákveðið var að framlengja æfingum barna 4-6 ára og 7-10 ára um eina viku þannig að síðasta æfing hjá 7-10 ára verður fimmtudaginn 3. júní og hjá 4-6 ára laugardaginn 5. júní.

Íslandsmót í yngri aldursflokkum verður haldið hjá Judodeild Ármanns í Laugardal, laugardaginn 29. maí og hefst það með keppni í aldursflokkum U13 og U15 kl. 10:00 og lýkur þeirri keppni um kl. 12:00. Keppni U18 hefst svo um kl. 12 og að lokinni þeirri keppni sem gæti verið um kl. 13:30 þá hefst keppni í U21 árs aldursflokki og mótslok eru áætluð um kl. 15:30. Athugið að JR sér um að greiða keppnisgjöldin fyrir alla keppendur sína.

Allir aldursflokkar geta mætt í vigtun á mótsstað föstudaginn 28. maí frá 17-19 eða á keppnisdegi frá 9-9:30 fyrir U13 og U15 og kl. 11-11:30 fyrir U18 og U21. Aldursflokkar U18 og U21 geta líka mætt í vigtun kl. 9-9:30 ef það hentar þeim betur.

Hér eru úrslitin 2019 og nokkrar hreyfimyndir frá mótinu.

Skemmtilegu og spennandi Íslandsmeistaramóti sem haldið var í íþróttahúsinu Digranes í Kópavogi í dag lauk með því að ellefu Íslandmeistarar voru krýndir. Af þessum ellefu voru fjórir að vinna sinn fyrsta Íslandsmeistaratitil í karlaflokki en það voru þeir Daníel Árnason -60 kg, Judofélagi Reykjanesbæjar (JRB), Ingólfur Rögnvaldsson -66 kg úr JR, Zaza Simonishvili -73 kg úr JR og Matthías Stefánsson -100 kg úr ÍR. Aðrir sem urðu meistarar í dag voru Þór Davíðsson +100 kg UMFS sem vann sinn fimmta titil, Egill Blöndal -90 kg einnig frá UMFS en hann vann sinn sjötta titil og Árni Pétur Lund úr JR en hann vann sinn þyndarflokk -81 kg í annað sinn og Opna flokkinn í fyrsta skiptið eftir hörku úrslitaglímu gegn Agli Blöndal sem hafði titil að verja. Íslandsmeistari í -78 kg flokki kvenna var Hjördís Erna Ólafsdóttir úr JR og var þetta hennar sjötti titill og Ingunn Rut Sigurðardóttir úr JR vann tvöfalt þegar hún sigraði -70 kg flokkinn og einnig Opna flokkinn en það var í fyrsta skipti sem hún vann þann flokk og eru þá hennar Íslandsmeistaratitlar orðnir fimm.

Mótið gekk stórslysalaust fyrir sig, dómgæslan vel mönnuð sem og mótsstjórn og önnur störf sem fylgir svona mótahaldi. Athygli vakti að yngsti og léttasti maður mótsins Aðalsteinn Karl sem keppti í -60 kg flokki skráði sig í Opna flokkinn og stóð sig með prýði en það gerist ekki oft að keppendur úr léttasta flokki taki þátt í opnum flokki þar sem þeir geta mætt andstæðingi sem er jafnvel helmingi þyngri og því lítil von um vinning en það vantar ekki kjarkinn í Alla Kalla og á hann örugglega eftir að láta að sér kveða seinna meir. Stjórn JSÍ notaði tækifærið til að tilkynna um heiðursgráðun tveggja judomanna sem hafa stundað íþróttina í áratugi og gera enn. Þeir eru báðir meðal annars fyrrum Íslandsmeistarar en eftir að keppnisferli lauk hafa þeir komið að þjálfun og félagsstörfum. Það voru þeir Kári Jakobsson sem er einn af frumkvöðlum judoíþróttarinnar á Íslandi en hann byrjaði að æfa í kringum 1963 þá 17 ára gamall og Runólfur V. Gunnlaugsson sem hóf æfingar í kringum 1978 þá 25 ára gamall sem voru gráðaðir í 3. dan.

Hér er hægt að horfa á forkeppnina, völlur 1 og völlur 2 og úrslitaglímur á YouTube og hér eru úrslitin.

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

Það var vaskur hópur manna sem að tók til hendinni og standsetti keppnissvæðið fyrir Íslandsmeistaramót karla og kvenna sem haldið verður í íþróttahúsinu Digranes í Kópavogi á morgun 16. maí. Vel gekk að setja niður keppnisvellina enda vanir menn sem að því komu. Þormóður Jónsson bar hitann og þungann af framkvæmdinni og Davíð Áskelsson sá um tölvubúnaðinn með aðstoð sona sinna. Hér eru nokkar myndir frá standsetningunni í kvöld.

Hér er keppendalistinn en hægt verður að fylgjast með í beinni útsendingu þar sem JSÍ mun streyma frá mótinu. Völlur 1. og Völlur 2.

• 

• 

• 

• 

• 

• 

• 

• 

Íslandsmeistaramót karla og kvenna verður haldið í íþróttahúsinu Digranesi sunnudaginn 16. maí og eru um fjörtíu keppendur skráðir til leiks. Mótið hefst kl. 10:00 með forkeppni sem lýkur um kl. 12:00. Úrslit hefjast svo um kl. 13:00 og standa þau yfir til um kl. 14:00 en þá hefst keppni í opnum flokkum sem lýkur um kl. 15:30 og mótslok kl. 16:00. Vigtun hjá JR laugardaginn 15. maí frá 17:00-18:00. Muna að hafa með sér bæði hvítan og bláan judobúning.

Allar æfingar falla niður á morgun uppstigningardag nema hjá framhaldi 15 ára og eldri og hefst sú æfing eins og venjulega kl. 18:30.

Þeir félagar Kjartan Logi Hreiðarsson og Kristján Daðason báðir úr JR þreyttu 1. dan gráðupróf í kvöld og stóðust það með glæsibrag. Þeir tóku prófið saman og voru uke hjá hvor öðrum. Kristján tók 1. kyu 2013 eða fyrir átta árum en Kjartan 2018. Prófdómarar voru þeir Björn Halldórsson (JG) 5. dan og Garðar Skaftason (UMFS) 4. dan. Það er gaman að geta þess að afi Kjartans, Kjartan Svavarsson er einnig svartbelti í judo og einnig langafi hans Svavar Carlsen en hann var árið 1970 fyrsti Íslandsmeistarinn í judo. Kjartan Hreiðarsson er því fjórði ættliðurinn sem æfir og keppir í íþróttinni. Til hamingju með áfangann strákar.

Sportabler er vef – og snallsímaforrit sem Judofélag Reykjavíkur er að taka í notkun og gerir skipulagningu og samskipti í starfinu skilvirkari og einfaldari. Kerfið er ætlað þjálfurum, iðkendum, foreldrum og starfsmönnum íþróttafélaga.

Þetta ferli fyrir neðan á einungis við þá sem eru ekki með Sportabler aðgang. Ef þú ert með Sportabler aðgang þarftu ekki kóða til að sjá nýja flokka. Það er nóg fyrir þjálfara/íþróttastjóra JR að bæta iðkandanum við í flokkinn og þá kemur dagskráin sjálfkrafa inn hjá foreldra/leikmanni.

Forsenda þess að geta skráð sig í Sportabler er að þjálfari hafi skráð leikmann með kennitölu í flokkinn.

Hér eru skrefin að skráningu.
1. Skrá í hóp: Fara á www.sportabler.com eða í appstore/playstore til að ná í appið (IOS)/(Android)(mælum með appinu).  Þegar þú opnar appið sérðu neðst á síðunni Nýr notandi? Skráðu þig í hóp. 

2. Setja inn kóða flokksins/hópsins: Þið fáið kóðann frá þjálfara eða leikmanni/aðstandanda sem er nú þegar skráður í flokkinn. Næsta skref er að stimpla kóðann inn. ATH þið getið líka stimplað inn kóðann í gegnum tölvu á sportabler.com—>Innskrá—> Skráning í flokk með kóða ef það hentar betur.

3. Fylla inn skráningaupplýsingar (Velja “Ég er leikmaður” / “Ég er foreldri”eftir því sem við á). Leikmaður setur inn sitt netfang (Netfang leikmanns), foreldri setur inn sitt netfang (Netfang foreldris). Ekki blanda þessum skráningum saman. 

4. Staðfesta netfang í tölvupósti sem þið fáið frá Sportabler: Smella á “hér” þá opnast nýr gluggi (Skref 5). Muna eftir að athuga ruslpóst/spam folder.

5. Búa til lykilorð  Veljið ykkur lykilorð. Samþykkja þarf skilmála Sportabler og hvetjum við ykkur til þess að kynna ykkur þá.

6. Allt klárt ! Skrá sig inn og þá ætti “Mín dagskrá” að taka á móti ykkur. Hér er svo hægt að sjá stutt kynningarmyndband um kerfið.

Spurningar, vandræði eða útskýringar, hafið samband við þjónustuver Sportabler eða í gegnum sportabler@sportabler.com

Hér fyrir neðan eru kóðar flokka til að skrá sig inn í Sportabler.
Veljið þann flokk sem iðkandi stundar.

Börn 4-6 ára, kóði 72221H
Börn 7-10 ára, kóði O2176E
Börn 11-14 ára, kóði AJFKJV
Byrjendur 15 ára og eldri, kóði 6OJL7E
Framhald 15 ára og eldri, kóði OSESPT
Meistaraflokkur JR, kóði YDZ1VB
Old Boys, kóði STVBNR