Síðustu æfingar fyrir Jól

Síðasta æfing fyrir jól hjá 4-6 ára verður laugardaginn 19. desember en hjá 7-10 ára og 11-14 ára föstudaginn 18. des. en þá verður sameiginleg æfing með báðum þessum aldursflokkum og er mæting kl. 17. Að lokinni æfingu verður boðið í jólakaffi/gos og kökur. Reglulegar æfingar hefjast svo aftur 4. janúar 2021 samkvæmt stundaskrá.  Mánudaginn 4. janúar hefjast æfingar hjá 11-14 ára, þriðjudaginn 5. janúar hefjast æfingar hjá 7-10 ára og laugardaginn 9. janúar hefjast svo æfingar hjá 4-6 ára. Æfingar 16 ára og eldri hefjast ekki fyrr en 12. janúar ef Covid-19 kemur ekki í veg fyrir það en eins og er er æfingabann hjá þessum aldursflokki. Þetta verður allt saman auglýst aftur þegar nær dregur.

Tóku sitt fyrsta beltapróf

Laugardaginn 12. desember tóku nokkur börn í æfingahópnum 4-6 ára sitt fyrsta beltapróf og stóðu sig alveg frábærlega og fengu sína fyrstu strípu (fjólubláa) í beltið sitt. Þau þurftu að sýna eitt fastatak, sýna hvernig á að detta afturábak og passa höfuðið og hvernig á að hneigja sig sem í stuttu máli þýðir virðing og tillitssemi gagnvart félaga sínum. Því miður komust ekki öll börnin á námskeiðinu á þessa æfingu og því verður annað beltapróf fyrir þau næsta laugardag. Hér neðar eru myndir af judo iðkendunum í “kaffihléi ” og önnur að prófi loknu. Með á myndinni er Ingunn Rut Sigurðardóttir annar tveggja þjálfara þessa hóps og Mikael Ísaksson sem hefur aðstoðað á þessum æfingum.

Frá v-h. Gabriel Kamil, Adam, Röskva Rún, Alex Garðar, Freyja Mjöll, Anna Birna, Mikael Máni og Emil Thor.

Æfingabann framlengt til 12. janúar 2021

Ný reglugerð um íþróttastarf tekur gildi fimmtudaginn 10. desember

Allar æfingar og keppni í íþróttum er enn óheimil. Heimild er veitt til æfinga í efstu deildum kvenna og karla og afreksfólks.

Íþróttaæfingar iðkenda fædd árið 2004 og fyrr eru heimilar með og án snertingar í íþróttum innan ÍSÍ í efstu deildum. Þetta þýðir þó ekki að ekki allir geti stundað íþróttir því þau lið sem ekki eru í efstu deild í sinni íþrótt geta ekki æft þótt liðið sé í meistaraflokki.

Svandís Svavarsdóttir heilbrigðisráðherra ákvað í dag breytingar á sóttvarnaráðstöfunum. Þær taka gildi á fimmtudag, 10. desember og eiga að vara til þriðjudagsins 12. janúar 2021.

Breytingarnar eru að mestu í samræmi við tillögur sóttvarnalæknis.

Reglurnar sem gilda frá 10. desember 2020 – 12. janúar 2021:

Keppni

  • Öll keppni í íþróttum, bæði barna og fullorðinna, eru óheimil.

Æfingar

  • Íþróttaæfingar einstaklinga fæddra 2004 og fyrr, eru óheimilar, svo og íþróttaæfingar án snertingar innandyra.
  • Þrátt fyrir ákvæði um að ákvæði um einstaklinga fædda 2004 og fyrr þá er veitt heimild fyrir æfingum í efstu deild kvenna og karla í hverju sérsambandi innan ÍSÍ. Jafnframt eru æfingar afreksfólks í einstaklingsbundnum íþróttum innan ÍSÍ heimilar.
  • Hámarksfjöldi í hverju rými er 25 manns. Sameiginleg búningsaðstaða verði lokuð. Sameiginleg áhöld verði sótthreinsuð a.m.k. tvisvar á dag og þess gætt að loftræsting sé í lagi og loftað vel út nokkrum sinnum yfir daginn.
  • Íþróttaæfingar utandyra án snertingar eru heimilar, svo sem útihlaup, reiðmennska, skíðaíþróttir og þess háttar.
  • Æfingar sem krefjast snertingar innan bardagaíþrótta eru þó ekki heimilar.
  • Öllum er heimilt að stunda skipulagðar æfingar utandyra sem krefjast ekki snertingar.
  • Sund og baðstaðir: Heimilt verður að hafa opið fyrir allt að 50% af hámarksfjölda gesta samkvæmt starfsleyfi. Börn fædd 2005 og síðar teljast ekki þar með.
  • Börn: Ákvæði um fjöldatakmörkun, nálægðartakmörkun og grímuskyldu taka ekki til barna sem fædd eru 2005 og síðar.
  • Íþróttaæfingar barna fæddra 2005 og síðar, inni og úti, með og án snertingar eru heimilar með þeim fjöldatakmörkunum sem gilda í skólastarfi.
  • Ráðherra getur veitt undanþágu frá banni við íþróttastarfi fyrir einstaka viðburði, svo sem vegna alþjóðlegra keppnisleikja hér á landi eða vegna æfinga í næst efstu deild sérsambands Íþrótta- og Ólympíusambands Íslands ef hún er skilgreind á sama afreksstigi og efsta deild, enda sé gætt fylltu sóttvarnaráðstafana að öðru leyti.

Ofangreint þýðir sem dæmi að ef félag er með kvennalið í efstu deild og karlalið í 2. deild þá má kvennaliðið æfa en ekki karlaliðið. Það þýðir enn fremur að séu fleiri en eitt félag í sveitarfélagi þá ræðst af því í hvaða deild liðið spilar hvort það megi hefja æfingar samkvæmt reglugerðinni.

Þetta þýðir líka að ungmenni, 16-18 ára, þurfa áfram að bíða eftir því að hefja æfingar með félögum sínum, séu þau ekki í meistaraflokki, afreksfólk í einstaklingsbundnum greinum eða að æfa utandyra án snertingar.

Nánari upplýsingar er að finna á vef heilbrigðisráðuneytisins og í eftirfarandi reglugerðum heilbrigðisráðherra og minnisblöðum sóttvarnalæknis:

Uppfærðar sóttvarnarreglur JSÍ

Af heimasíðu JSÍ.

Heilbrigðisráðherra hefur nú birt reglugerð varðandi opinberar sóttvarnaaðgerðir innanlands vegna COVID-19 frá og með 10. desember 2020 til 12. janúar 2021. Hér má sjá sóttvarnarreglur JSÍ sem uppfærðar voru 12.10.2020.

Sóttvarnar reglur JSÍ vegna Covid-19 uppf. 10.12.2020

Það helsta sem þarf að athuga í nýjustu uppfærslu reglnanna eru eftirfarandi atriði:

  • Íþróttaæfingar einstaklinga sem fæddir eru 2004 og fyrr eru heimilar með og án snertingar í íþróttum innan ÍSÍ í efstu deild.
  • Æfingar afreksfólks í einstaklingsbundnum íþróttum eru heimilar.
  • Æfingar sem krefjast snertingar innan bardagaíþrótta eru þó ekki heimilar.

Íþróttir almennings: Öllum er heimilt að stunda skipulagðar æfingar utandyra sem krefjast ekki snertingar.

EM 2020 úrslit

Þá hafa þeir Sveinbjörn Iura og Egill Blöndal lokið keppni á Evrópumeistaramótinu sem fram fór í Prag dagana 19-21 nóv. Sveinbjörn Iura drógst á móti Marcel Cercea frá Rúmeníu í -81 kg. flokknum. Þetta var hörku viðureign og jöfn, báðir fengu refsistig eftir eina mínútu fyrir aðgerðarleysi og tæpri mínútu síðar fék Marcel aftur refsistig og nú fyrir ólögleg handtök en Sveinbjörn hafði pressað vel á hann og var kominn í góða stöðu. Marcel var kominn með tvö shido og hefði tapað glímunni ef hann fengi eitt til viðbótar og sótti nú stíft á Sveinbjörn en hann varðist með því að halda í beltið hjá Marcel og ýta honum frá sér en hélt of lengi og fékk sitt annað shido. Marcel var nú öllu ákveðnari og pressaði Sveinbjörn að endimörkum keppnissvæðiðsins og reyndi að fá hann til að stíga út fyrir það en þá hefði Sveinbjörn fengið sitt þriðja shido og tapað. Sveinbjörn reyndi að verjast því en við það opnaðist hann og Marcel var fljótur að átta sig og sópaði undan honum fótunum með Deashi harai og skoraði waza-ari og vann á því að lokum því ekki var meira skorað þegar glímutíminn rann út. Egill Blöndal mætti ofjarli sínum í -90 kg flokki en hann mætti Beka Gviniashvili gríðasterkum keppanda frá Georgíu. Hann er fyrrum heimsmeistari juniora og margfaldur verðlaunahafi á Grand Slam og Grand Prix mótunum og situr nú í 10 sæti heimslistans. Beka var öllu sterkari í tökunum og varð viðureign þeirra ekki löng því hann skoraði Ippon eftir skamman glímutíma en endaði sjálfur í þriðja sæti í flokknum síðar um daginn.

Evrópumótið er eitt allra sterkasta mótið sem haldið er ár hvert og engir veikir hlekkir þar. Í judo er keppt í fjórtán þyngdarflokkum, sjö kvennaflokkar og sjö karlaflokkar. Af þessum fjórtán flokkum eru tíu stigahæstu keppendur í heiminum í dag frá Evrópu og skiptist hnífjafnt á milli kynja, fimm í kvennaflokkum og fimm í karlaflokkum. Í hinum fjórum flokkunum sem eftir eru á Evrópa keppendur í fjórða og fimmta sæti í kvennaflokkum og öðru og þriðja sæti í karlaflokkum. Allir stigahæstu keppendur karla voru með á þessu Evrópumeistaramóti og þrjár af stigahæstu keppendum kvenna.

Flott æfing í dag hjá 11-14 ára

Það var líf og fjör hjá 11-14 ára hópnum í dag á fyrstu æfingu sem haldin var eftir að samkomubanni var aflétt en liðnar eru rúmar sex vikur frá síðustu æfingu. Næsta æfing er á morgun kl. 17:30 hjá börnum 7-10 ára. Þar sem að ekki er búist miklum fjölda fyrstu vikuna þá var ákveðið að leyfa aldurshópnum 11-14 ára að koma einnig á þá æfingu svo að það verður sameiginleg æfing á morgun fyrir 7-10 ára og 11-14 ára kl. 17:30-18:45. Hér eru nokkrar myndir frá æfingunni í dag.

Evrópumeistaramótið 2020 í Prag

Í morgun lögðu af stað til Tékklands þeir Sveinbjörn Iura og Egill Blöndal en þeir munu taka þátt í Evrópumeistaramótinu sem hefst á morgun í Prag og stendur yfir í þrjá daga. Þormóður Jónsson verður þeim til aðstoðar en hann þurfti að vera kominn til Prag í gær til að ganga frá öllum undirbúningi. Eins og áður sagði hefst keppnin á morgun en Sveinbjörn keppir á föstudaginn í -81 kg flokki og Egill á laugardaginn í -90 kg flokki og hefst keppnin kl. 9 að morgni á okkar tíma alla dagana.

Evrópumeistaramótið er eitt allra sterkasta mótið sem haldið er ár hvert, þar er hver einasti keppandi góður judomaður og engir veikir hlekkir. Þátttakendur eru 345 frá 40 þjóðum, 209 karlar og 136 konur. Dregið verður í dag kl. 17:00 í beinni útsendingu.
Hér er drátturinn og keppnisröðin og tengill á beina útsendingu frá keppninni. Til að fylgjast með Evrópumeistaramótinu í beinni þarf að hafa IJF account og er hægt að stofna hann hér ef það hefur ekki þegar verið gert og kostar það ekkert.

Æfing hjá 15 ára og yngri á morgun

Eins og komið hefur fram í fréttum þá geta æfingar barna og unglinga 15 ára og yngri hafist á morgun 18. nóvember. Fyrsta æfing verður því á morgun kl. 17:30 hjá 11-14 ára, á fimmtudaginn kl. 17:30 hjá 7-10 ára og á laugardaginn kl. 10:00 hjá 4-6 ára. Nú þarf bara að taka til judobúninginn og láta judovini ykkar vita.