Íþróttamenn Reykjavíkur 2021

Íþróttabandalag Reykjavíkur (ÍBR) valdi tíu íþróttamenn til að heiðra fyrir góðan árangur á árinu sem er að líða, fimm konur og fimm karla. Árni Pétur Lund hlotnaðist sá heiður að vera einn af fimm körlum sem voru tilnefndir fyrir árið 2021. Til hamingju Árni. ÍBR tilnefndi einnig meistaraflokk karla Judofélags Reykjavíkur sem eitt af þeim liðum sem komu til greina að hljóta nafnbótina íþróttalið ársins 2021.

Það voru þau Sandra Sigurðardóttir í Knattspyrnufélaginu Val og Júlían J.K. Jóhannsson í Glímufélaginu Ármanni sem hlutu nafnbótina íþróttakona og maður Reykjavíkur 2021 og Meistaraflokkur karla frá Knattspyrnufélagi Víkings hlaut titilinn liðs ársins 2021. Til hamingu með kjörið. Hér er frétt af heimasíðu ÍBR

Silfur á Baltic Sea Championships

Baltic Sea Championships fór fram dagana 4-5 desember og var það haldið í Orimatilla í Finnlandi. Mótið er eitt það sterkasta sem er haldið á Norðurlöndum og voru skráðir keppendur um fimm hundruð frá þrettán þjóðum. Frá Íslandi voru þátttakendur sex og kepptu tveir þeirra í U18 en hinir fjórir bæði í U21 árs og karlaflokki.

Matthías Stefánsson náði bestum árangri okkar keppenda en hann varð í öðru sæti í U21 árs aldursflokki í -90 kg. Hann keppti í fjögurra manna riðli og sigraði fyrstu tvo andstæðinga sína frá Finnlandi og Svíþjóð örugglega en tapaði gegn þeim þriðja, Karl Baathe frá Svíþjóð sem vann flokkinn. Til hamingju með árangurinn Matti.

Ingólfur Rögnvaldsson var ekki langt frá því að komast á verðlaunapall í U21 árs aldursflokki. Hann keppti í -66 kg þar sem keppendur voru nítján og því keppt með útsláttar fyrirkomulagi. Hann sigraði Pierre Vuillier frá Frakklandi í fyrstu viðureign en tapaði þeirri næstu gegn Olle Hermodsson frá Svíþjóð sem að sigraði flokkinn síðar um daginn. Ingólfur fékk því uppreisnarglímu og sigraði þar Rom Hovav keppanda frá Ísrael en tapaði svo fjórðu viðureign gegn Carl Kont frá Eistlandi sem glímdi því um bronsverðlaunin og vann en Ingólfur varð í sjöunda sæti.

Daníel Árnason keppti seinni keppnisdaginn í U21 árs aldursflokki í -60 kg og í þeim flokki voru tíu keppendur og því keppt með útsláttarfyrirkomulagi. Daníel sigraði fyrstu viðureign örugglega gegn keppanda frá Noregi, Mats Gerhardsen. Í næstu viðureign mætti hann frakkanum David Laborne sem sigraði en Daníel fékk uppreisnarglímu og mætti þar öðrum norðmanni Dennis Bjertnes en varð að játa sig sigraðan og endaði því í sjöunda sæti.

Þrátt fyrir að aðeins ofangreindir hafi unnið viðureignir á mótinu þá stóðu hinir íslensku keppendurnir sig vel gegn sínum andstæðingum og mátti litlu muna hvoru megin sigurinn lenti. Viðureignir voru hnífjafnar og töpuðust á síðustu sekúndum eða í gullskori eftir hörguglímu. Keppendur okkar að þessu sinni eru flestir að stíga sín fyrstu skref í mótum erlendis og hafa því litla keppnisreynslu enda meðalaldurinn aðeins 17 ár en þeir eiga svo sannarlega framtíðina fyrir sér. Hér er linkur á allra glímur okkar manna dagur 1 og dagur 2 og hér eru úrslit mótsins.

Matthías Stefánsson lengst til vinstri með silfur á Baltic Sea Championships 2021

Keppa á Baltic Sea Championships

Um helgina verður Baltic Sea Championships haldið í Orimattilla í Finnlandi og þar munu sex íslenskir keppendur verða á meðal þátttakenda. Það eru þeir Aðalsteinn Björnsson, Daníel Árnason, Ingólfur Rögnvaldsson, Kjartan Hreiðarsson, Matthías Stefánsson og Nökkvi Viðarsson. Fararstjóri og þjálfari í ferðinni er Logi Haraldsson. Baltic Sea Championship er gríðasterkt mót en keppendur rúmlega 500 frá þrettán þjóðum. Fyrir utan keppendur frá Finnlandi og Íslandi þá eru keppendur frá Svíþjóð, Noregi, Danmörku, Rússlandi, Ísrael, Brasilíu, Austurríki, Frakklamdi, Lettlandi, Eistlandi, Þýskalandi. Keppt er í aldursflokkum, U15, U18, U21 og seniora. Á laugardaginn (4.des) er keppt í U18 og seniora og á sunnudaginn í U15 og U21 árs. Keppt verður á þremur völlum og verður hægt að fylgjast með í beinni útsendingu.  Hér er skráningin og hér munu úrslitin birtast. Til gamans má geta þess að Ægir Valsson vann bronsverðlaun á Baltic Sea Championships 2019 í -90 kg flokki karla.

Frá vinstri. Danni, Alli, Nökkvi, Matti, Ingó, Kjartan og Logi

Reykjavíkurmeistaramótið 2021 – Úrslit

Reykjavíkurmeistaramótið 2021 var í umsjón Judofélags Reykjavíkur að þessu sinni og fór það fram 26. nóv. þ.e. síðastliðinn föstudag. Keppendur á þessu móti eru eins og nafnið segir til um eingöngu frá Reykjavíkurfélögunum þremur, Judofélagi Reykjavíkur, Judodeild ÍR og Judodeild Ármanns en því miður var enginn keppandi frá Ármanni að þessu sinni. Þar sem mótið var haldið á venjulegum æfingatíma meistaraflokks JR og iðkandi frá Selfossi var mættur í heimsókn á æfingu var ákveðið að leyfa honum að keppa sem gesti á mótinu og keppti hann -81 kg flokki karla. Síðasta Reykjavíkurmót var haldið 2019 en Covid-19 kom í veg fyrir að það yrði haldið 2020 eins og svo mörg önnur mót það árið. Keppt var í aldursflokkum U10, U13, U15, U18, U21 og kvenna og karla flokkum og voru keppendur alls fjörtíu og einn og eru það tuttugu fleiri en 2019 og munar þar mest um þátttöku JR inga sem voru nú með meira en helmigi fleiri keppendur en síðast.

Til að allir þáttttakendur fengu keppni þá voru aldursflokkar U13 og U15 voru sameinaðir að hluta og tveir keppendur í U15 sem höfðu ekki mótherja í sínum þyngdarflokki fengu að keppa í eldri aldursflokkum en það voru þau Mikael Ísaksson sem keppti í U18 -73 kg og Helena Bjarnadóttir sem keppti í kvennaflokki -70 kg og stóðu þau sig þar alveg frábærlega. Þyngdarflokkar voru einnig eitthvað sameinaðir en það varð að gera til að allir fengu keppni sem varð þá auðvitað til þess að sumir urðu að glíma við þyngri mótherja. Þeir létu það ekki á sig fá og stóðu sig með sóma og einhverjir léttari sigruðu þá þyngri. Það sama var gert í U18 þar voru -66 og 73 kg flokkar sameinaðir og í karlaflokki -100 og +100kg Viðureignirnar voru margar mjög jafnar og spennandi og fóru allnokkrar í gullskor og meðal annars konur -70 kg sem lauk ekki fyrr en eftir 6 mínútur í gullskori. Hér eru úrslitin og myndir frá mótinu en Zaza Simonishvili afhenti verðlaunin í yngri flokkum þ.e. U10, U13 og U15, og er hann hér á nokkrum myndum með verðlaunahöfum. Tveir verðlaunahafar urðu frá að hverfa áður en verðlaunaafhending fór fram og vantar því Loga Haraldsson á myndina í -81 kg flokki en hann vann gullverðlaun þar og Daniele Kucyte sem varð í þriðja sæti í kvennaflokki -70 kg.

Úrslit í Sveitakeppni JSÍ 2021

Íslandsmótið 2021 í sveitakeppni fór fram föstudaginn 19. nóv. Upphaflega átti mótið að fara fram á Selfossi 20. nóv en sökum þátttökuleysis annara klúbba en JR þá var það fært til Judofélags Reykjavíkur. Keppt var í öllum aldursflokkum og var JR með þrjár karlasveitir, tvær sveitir í U21 árs, U18 og U15 og auk þess eina kvennasveit og eina stúlknasveit í U15 en ekki var keppni hjá þeim þar sem mótherja vantaði. Því miður sendu önnur félög ekki sveitir að þessu sinni í þessa sögulegu og mest spennandi keppni hvers árs sem sveitakeppnin jafnan er og skipar einn stærstan sess í sögu hvers félags en líklega hafði Covid19 eitthvað um það að segja en vonandi gengur betur næst. Þar sem að önnur félög sendu ekki sveitir þá var þetta innbyrðis keppni milli sveita JR sem var reyndar mjög skemmtileg og ekkert gefið eftir. Í karlaflokki sigraði sveit JR-A og í öðru sæti var JR-B og bronsverðlaunin fóru til JR-C. Það fór eins í öðrum aldursflokkum JR -A sigraði í öllum aldursflokkum og JR-B varð í öðru sæti. Síðast var keppt í sveitakeppninni 2019 en hún féll niður 2020 vegna Covid-19. JR er Íslandsmeistari karla 2021 og er það í áttunda skipti í röð og í tuttugusta skipti alls. Með sigrinum núna var met slegið frá 1974-1980 en JR ingar þeirra daga sigruðu sjö ár í röð. Keppnin var fyrst haldin árið 1974 og var þetta í 45 skiptið sem keppt er en hún féll niður 1993, 2002 og 2020. JR hefur nú sigrað oftast allra félaga eða tuttugu sinnum og þar á eftir kemur Judodeild Ármanns sem hefur sigrað nítján sinnum, Judodeild KA fimm sinnum og UMFK einu sinni, sjá hér. Hér neðar eru úrslitin og myndir frá mótinu.

Karlasveitviðureignir
Karlar U21viðureignir
Karlar U18viðureignir
Drengir U15 viðureignir

Beltapróf hjá 7-10 ára í dag

Í dag tóku átján börn beltapróf í JR og voru það níu stúlkur og níu drengir sem það gerðu. Eins og búast mátti við af þessum frábæra hóp þá stóðu þau sig öll mjög vel og fengu strípu í beltið sitt í viðeigandi lit en liturinn fer eftir aldri barns. Nokkur barnanna voru að fá sína fyrstu strípu en önnur sína aðra eða þriðju strípu. Verkefni þeirra í beltaprófinu var að að sýna tvö kastbrögð og eitt fastatak og hvernig á að komast í fastatakið og losna úr því. Auk þess voru hneigingar rifjaðar upp bæði standandi og sitjandi og merki dómara þegar hann gefur ippon og wazaari. Börn 10 ára og yngri fá strípur á beltin sín en þegar þau verða 11 ára þá fá þau ný belti. Hér má sjá litakerfi belta fyrir 10 ára og yngri og 11 ára og eldri. Ekki voru öll börnin mætt á æfinguna í dag svo að þau sem ekki voru mætt taka sitt beltapróf næst þegar þau mæta en passað verður uppá það að enginn missa af því. Hér neðar er mynd af börnunum að loknu beltaprófi í dag.

Aftari röð v-h. Styrmir, Arnar, Gústav, Freyja, Kári, Orri, Freyr, Elvar, Karólína, Gabríela, Snjólaug. Fremri röð v-h. Elísa, Nói, Röskva, Ólafur, Íris, Anja, María

Beltapróf hjá 4-6 ára

Í gær laugardaginn 13. nóvember tóku nokkur börn í æfingahópnum 4-6 ára beltapróf og voru sum þeirra að fara í sitt fyrsta beltapróf en önnur í sitt annað eða þriðja. Öll stóðu þau sig með sóma og fengu þau strípu (fjólubláa) í beltið sitt. Litirnir á strípunum segja til um aldur barns og fjöldi strípa segja til um hve lengi hefur verið æft en það er gefin ein strípa fyrir hverja önn og eru annirnar tvær á ári. Börnin þurftu að sýna nokkur atriði eins og hvernig á að detta, bæði á magann og á bakið og muna að passa höfuðið og hvernig á að hneigja svo eitthvað sé nefnt. Því miður voru ekki öll börnin mætt á laugardaginn og verður því annað beltapróf fyrir þau sem ekki komust næst þegar þau mæta. Það missir engin af því. Hér neðar er mynd af þeim sem tóku beltaprófið á laugardaginn.

Börn 10 ára og yngri fá strípur á beltin sín en þegar þau verða 11 ára þá fá þau ný belti. Hér má sjá litakerfi belta fyrir 10 ára og yngri og 11 ára og eldri.

Aftari röð v-h: Adam, Kacper, Styrmir, Þorgeir, Alex, Sigmundur, Huginn.
Fremri röð v-h Auður, Óliver, Elsa og Ea

Sveitakeppnin 2021

Íslandsmótið 2021 í sveitakeppni (liðakeppni) verður haldið laugardaginn 20. nóvember á Selfossi og fer það fram í íþróttahúsi Vallaskóla. Keppt verður í karla og kvennaflokkum í aldursflokkunum U15 (11-14 ára), U18, U21 og senioraflokki og mun JR senda lið í alla aldursflokka. Mótið hefst kl. 11 og mótslok áætluð um kl. 16 en nánari tímasetning að lokinni skráningu. Skráningarfrestur er til miðnættis 15. nóvember. Vigtun fer fram hjá JR föstudaginn 19. nóv. frá 18 -19. Hér neðar eru myndir af verðlaunahöfum frá sveitakeppninni 2019 en 2020 féll hún niður vegna Covid-19.

Reykjavíkurmeistaramótið 2021

Reykjavíkurmeistaramótið 2021 verður í umsjón JR þetta árið og haldið laugardaginn 27. nóvember. Vigtun á keppnisdegi frá kl. 10:00 til 10:30 og mótið hefst svo kl. 11:00 og mótslok áætluð um kl. 14:00. Keppt verður í öllum aldursflokkum þ.e. U13, U15, U18, U21 og karla og kvennaflokkum og lágmarksgráða er gult belti, 5. kyu . Lokaskráningardagur er mánudagurinn 22. nóv. í gegnum skráningarkerfi JSÍ. Nánari upplýsingar og tímasetning hér á síðunni að lokinni skráningu.

Silfur og brons á Opna Finnska

Á Opna Finnska mótinu sem lauk í dag vannst því miður ekkert gull en við unnum til fernra silfurverðlauna og tólf bronsverðlauna. Í senioraflokki vann Ingólfur Rögnvaldsson -66 kg til silfurverðlauna en aðrir sem unnu til verðlauna í senioraflokki voru þau Ingunn Sigurðardóttir -70 kg, Árni Lund -81 kg, og Matthías Stefánsson -90 kg en þau unnu öll til bronsverðlauna. Í U21 árs unnu til bronsverðlauna þeir Ingólfur Rögnvaldsson -66 kg, Kjartan Hreiðarsson -73 kg, Andri Ævarsson -81 kg og Matthías Stefánsson -90 kg og í U18 voru með bronsverðlaun þau Aðalsteinn Björnsson -66 kg, Helenna Bjarnadóttir -70 kg og Jakub Tomczyk -81 kg. Í aldursflokknum U15 unnust þrenn silfurverðlaun og voru það þau Romans Psenicnijs -60 kg, Elías Þormóðsson -46 kg og Helena Bjarnadóttir +63 kg sem fengu silfurverðlaun og Weronika Komandera -52 kg og Mikael Ísaksson -66 kg unnu til bronsverðlauna. Daníel Dagur Árnason ætlaði að keppa í -60 kg flokki varð að keppa flokk uppfyrir sig þar sem ekki var næg þátttaka í hans flokki en því miður varð hann fyrir meiðslum þar og varð að hætta keppni og það gerði Weronika Komandera einnig í U18 -52 kg þar sem hún fann fyrir meiðslum í fæti en hún hafði fyrr um daginn keppt í aldursflokki U15. Hér má finna öll úrslitin og hér neðar eru myndir frá verðlaunaafhendingunni.