Category: Fréttir

Íslandsmót í yngri aldursflokkum (U13 , U15, U18 og U21) verður haldið hjá Judodeild Ármanns í Laugardal, laugardaginn 12. apríl og hefst kl. 11:00 og áætluð mótslok verða um kl. 15:00.

Keppni U13, U15 og U18 hefst kl. 11 og ætti að ljúka um kl. 13. Keppni í aldursflokki U21 hefst svo hefst svo kl. 13:00 og mótslok um kl 15:00.

Vigtun fyrir alla aldursflokka er hjá JR föstudaginn 11. apríl frá kl. 18-18:30 og einnig á keppnistað á keppnisdegi frá kl. 9:30 – 10:00 og er það einnnig fyrir alla aldursflokka.

Vormót JSÍ 2025 í seniora flokkum var haldið laugardaginn 5. apríl í nýstandsettum glæsilegum æfingasal Judodeildar ÍR og hófst það kl. 12 og lauk um kl. 15:30. Keppendur voru fjörtíu og einn frá fimm klúbbum. Töluvert var um nýja keppendur sem og yngri sem æft hafa í mörg ár og eru að ganga upp í eldri aldursflokka. Keppnin var mjög skemmtileg á að horfa, mikið af fallegum ippon köstum og spennandi viðureignum. JR- ingar voru hlutskarpastir og unnu öll gullverðlaunin sex sem í boði voru í karlaflokki og ein gullverðlaun í kvennaflokki og JS (Judofélag Suðurlands) tóku tvenn gullverðlaun í kvennaflokkum.

Starfsmenn mótsins voru Aleksandra Lis, Ásgeir Ásgeirsson, Gísli Egilson og Magnús Sigurjónsson og dómarar voru þeir Björn Sigurðarson, Breki Bernhardsson, Gísli Egilson, Sævar Sigursteinsson, og Yoshihiko Iura.
Hér neðar eru myndir af verðlaunahöfum, frá mótinu, stutt videoklippa og hér eru úrslitin.

Vormót JSÍ 2025 í seniora flokkum karla og kvenna (15 ára og eldri) verður haldið hjá Judodeild ÍR, Skógarseli 12, 109 Reykjavík, laugardaginn 5. apríl næstkomandi. Mótið hefst kl. 12 og áætlað var að því lyki kl. 15 en vegna mikillar þátttöku þarf að tvískipta því. Fyrri hluti mótsins hefst kl. 12 og ætti að ljúka um kl. 14:30 en þá verður keppt í -73, -81 og -100 kg flokkum karla. Seinni hluti hefst svo strax að lokinni keppni í fyrri hluta eða um kl. 14:30 með keppni í -66, -90 og +100 kg flokkum karla og -57, -63 og -70 kg flokkum kvenna. Mótslok áætluð um kl. 17. Verið mætt tímanlega því keppni í seinni hluta hefst eins fljótt og hægt er að lokinni keppni í fyrri hluta. Hér er stutt videoklippa frá mótinu 2024 og úrslitin.

Vormót JSÍ í yngri aldursflokkum (U13, U15, U18, U21 árs) fór fram laugardaginn 22. mars á Akureyri í umsjón Judodeildar KA og voru það þeir Hans Rúnar Snorrason, Hermann Torfi Björgólfsson og Sigmundur Magnússon sem höfðu veg og vanda af því. Upphaflega átti einnig að keppa í senioraflokkum og á einum keppnisvelli eins og undanfarin ár en vegna óvenju mikillar þátttöku var það ekki hægt vegna tímaramma í íþróttahúsinu. Keppni í senioraflokki var því frestað til 5. apríl og bætt var við öðrum keppnisvelli til þess að tímaáætlun stæðist sem og gerðist og var mótið hið skemmtilegasta og gekk vel fyrir sig. Dómarar voru þeir Björn Sigurðarson, Breki Bernhardsson, Gísli Egilson, Gunnar Jóhannesson, Sævar Sigursteinsson og Yoshihiko Iura. Til Akureyrar var farið í tveimur rútum og voru keppendur frá JR tuttugu og einn og kepptu nokkrir þeirra í tveimur aldursflokkum. Með þeim voru þjálfarar JR þeir Guðmundur Björn Jónasson, Zaza Simonishvili og Bjarni Friðriksson og auk þeirra nokkrir foreldrar keppenda sem sáu um aksturinn og fararstjórn þeir Alfreð Atlason, Helgi Einarsson, Hilmar Arnarson og Pétur Kjærnested. JR- ingar áttu frábæran dag og unnu samtals til átján gullverðlauna, sjö silfurverðlauna og þriggja bronsverðlauna. Til hamingju með árangurinn. Hér eru úrslitin og stutt videoklippa. Mótið var í beinni útsendingu Völlur 1 og Völlur 2.

Vegna mikillar þátttöku verður ekki hægt að halda mótið á þeim tíma sem gert var ráð fyrir og hefur JSÍ ákveðið að skipta mótinu upp þannig að keppt verður í U13, U15 og U18 á laugardaginn í KA heimilinu á Akureyri en keppni í U21 og senioraflokkum hefur verið frestað og nýr dagur fyrir það ákveðin síðar.

Vormót JSÍ 2025 í öllum aldursflokkum, U13/U15/U18/U21 og flokki seniora, verður haldið á Akureyri 22. mars í KA heimilinu. Mótið hefst kl. 10 og lýkur væntanlega um kl. 16. Vigtun verður í KA heimilinu föstudagskvöldið 21. mars frá kl. 19-21:00 og einnig að morgni mótsdags frá 9-9:30. Farið verður með rútu frá JR föstudaginn 21. mars um kl. 14 og komið til baka daginn eftir um kl. 21. Kostnaður, rúta og gisting (hótel/uppábúin rúm með morgunmat) um 15.000 kr. sem JR leggur út fyrir og rukkar svo þátttakendur að loknu móti en þátttakendur þurfa þó að hafa með sér pening fyrir mat og drykkjum sem hver og einn ákveður sjálfur. Með hópnum fara þrír þjálfarar frá JR. Myndin hér ofar er frá mótinu 2024.

Þeir Aðalsteinn Björnsson og Skarphéðinn Hjaltason héldu til Tékklands í gær ásamt Zaza Simonishvili landsliðsþjálfara og munu þar taka þátt í Nymburk OTC æfingabúðunum sem haldnar er þar og standa yfir frá 10. til 17 mars. Æfingabúðir þessar eru haldnar árlega og eru liður í röð æfingabúða í Evrópu sem nefnast Olympic Training Centre (OTC) og eru haldnar af Evrópska Judosambandinu (EJU) í samvinnu viðkomandi landssamband. Þátttakendur koma allsstaðar að úr heiminum og skipta hundruðum. Okkar menn verða í fimm daga og eru væntanlegir aftur heim 14. mars.

Afmælismót JSÍ 2025 í aldursflokkum U18 og U21 árs var haldið í æfingasal Judofélags Reykjavíkur laugardaginn 1. mars. Mótið átti upphaflega að haldast 1. febrúar og þá einnig ásamt keppni í U13 og U15 en var frestað vegna veðurs. Keppni U13/U15 fór fram 8. febrúar en U18/21 var hinsvegar frestað lengur vegna Matsumae Cup en fjölmennur hópur frá Íslandi var á leið þangað. Það voru um fjörtíu keppendur skráðir til leiks en vegna veikinda og meiðsla var töluvert um afskráningar og urðu keppendur að lokum tuttugu og átta frá sex klúbbum. Samanlagður keppendafjöldi U13/15 og U18/21 í ár er sjötíu en voru fimmtíu og tveir 2024 sem er mjög jákvæð þróun. Mótið gekk vel fyrir sig að mestu, fullt af flottum viðureignum sem enduðu oft á glæsilegum ippon köstum sem sjá má í meðfylgjandi videoklippu. Mótsstjórn og tímavarsla var í höndum Jóhanns Mássonar, Ara Sigfússonar og Kjartans Magnússonar og um dómgæslu sáu þeir Sævar Sigursteinsson, Logi Haraldsson og Ármann Sveinsson. Hér eru úrslitin  myndir frá mótinu og verðlaunahöfum og videoklippa.

Afmælismót JSÍ 2025 í aldursflokkum U18 (15-17 ára) og U21 (15-20 ára) verður haldið laugardaginn 1. mars hjá Judofélagi Reykjavíkur og hefst það kl 13:00. Vigtun fer fram í JR föstudaginn 28. feb. frá 18-19 en einnig er hægt að mæta í vigtun á keppnisdegi frá kl. 11:30 – 12:00. Nánari upplýsingar hér.

Góumót JR 2025 sem er opið öllum klúbbum var haldið laugardaginn 22. febrúar sl. Mótið var fyrst haldið árið 2009 svo þetta var það sextánda en það féll niður 2019 vegna covid. Góumótið er æfingamót þar sem allir þátttakendur fá verðlaun en það er ætlað yngstu iðkendunum frá 5 ára aldri til 10 ára sem eru að stíga sín fyrstu skref í íþróttinni.  Zaza, Guðmundur Björn og Gunnar Tryggvason heldu utan um JR keppendurna og fengum nokkra reynda keppendur úr aldurshópi 11-14 ára sér til aðstoðar og stóðu þessir aðstoðarþjálfarar, þau Freyja, Gústav, María, Snjólaug og Styrmir, sig alveg frábærlega. Um dómgæsluna sáu nokkrir af okkar bestu keppendum JR og leystu þau verkið vel af hendi en það voru þau Weronika Komendera, Kolmar Jónsson, Mikael Ísaksson og Viktor Kristmundsson og mótsstjórn var á höndum Ara Sigfússonar og Þorgríms Hallsteinssonar. Mótið var frábær skemmtun og börnin sýndu oft á tíðum ótrúlega flott judo og glæsileg köst. Hér neðar eru myndir af verðlaunahöfum og frá keppninni, stutt videoklippa og úrslitin.

 “Keppni” barna 5-6 ára er innanfélagskeppni og var haldin á æfingatíma þeirra um morguninn. 

Keppni barna 7-10 ára var frá kl. 14-16 og voru þátttakendur 43 frá þremur klúbbum að þessu sinni, Judodeild UMFS, Judodeild Suðurnesja og Judofélagi Reykjavíkur. Flestir þátttakendanna voru að taka þátt í sínu fyrsta móti og stóðu þeir sig mjög vel sem og aðrir keppendur og höfðu þjálfarar þeirra í nógu að snúast við að undirbúa þá og hafa tilbúna. Börnunum er raðað saman eftir aldri og þyngd eins og venja er og keppa stúlkur og drengir stundum saman í flokkum ef þannig stendur á og einnig þarf stundum að færa keppendur á milli aldursflokka til að þyngd keppenda sé sem jöfnust.