Fréttir

Junior European Judo Cup í Prag hefst í dag og eru strákarnir okkar mættir en þeir Alexander Heiðarsson, Grímur Ívarsson og Úlfur Böðvarsson eru á meðal keppenda og er Hermann Unnarsson landsliðsþjálfari með þeim í för til halds og trausts. Alexander hefur fyrst keppni en hann keppir í dag en hinir á morgun. Keppnin hefst kl. 8 að Íslenskum tíma báða dagana og fá þeir hörku andstæðinga. Hægt er að fylgjast með framvindunni hér og horfa hér á beina útsendingu. Alexander sem keppir í – 60 kg á sjöttu viðureign í flokknum og mætir Vadym Chernov frá Ukraníu. Úlfursem keppir í – 90 kg flokki á þriðju viðureign í flokknum mætir Eryk Ryciak frá Póllandi og Grímur sem einnig keppir í – 90 kg flokki á tólftu viðureign mætir Markus Seifert frá Þýskalandi. Björn Sigurðarson er einnig mættur til leiks en þetta er þriðja helgin í röð sem hann dæmir á Europen Judo Cup en samhliða mótinu verður haldið alþjóðlegt dómarapróf sem hann er þátttakandi í og nú krossum við fingurna og vonum að hann komi heim með alþjóðleg réttindi.

Það gekk ekki alveg nógu vel hjá okkar mönnum á Junior European Cup í Paks um helgina. Úlfur átti fyrstu viðureign gegn Denis Turac frá Slovakíu og tapaði hann þeirri glímu eftir stutta viðureign er honum var kastað með bear hug sem wazaari var gefið fyrir og Denis komst síðan beint í fastatak í framhaldi af því. Grímur mætti Sebastian Schneider frá Austurríki og leit glíman ágætlega út í fyrstu og munaði ekki miklu að Grímur kæmist í fastatak eftir misheppnaða sókn hjá Sebastian. Í upphafi sóknar stuttu seinna kom Sebastina Grími á óvart með vel útfærðu Kosoto gake og skoraði fallegt ippon. Grímur fékk uppreisnarglímu og mætti Darko Brasnjovic frá Serbíu. Grímur var full rólegur og var kominn með tvo shido eftir rúma mínútu og varð því að skerpa sóknina og gerði það en það var hinsvegar serbinn sem átti hættulegri sóknir og náði hann að skora wazaari þegar um ein og hálf mínúta var eftir og Grímur fék sitt þriðja shido stuttu seinna og tapaði þar með glímunni. Alexander mætti Theau Giallurachis frá Frakklandi og var það hörkuglíma. Hart var barist um tökin og báðir reyndu seionage brögð en eftir umþað bil eina mínútu komst Theau inn í Sumi gaeshi og  skoraði wazaari og fylgdi eftir í gólfinu en Alexander varðist því. Ekki löngu seinna reyndi Theo aftur Seoi nage sem tókst ekki en hann fylgdi því vel eftir og við tók hörkugólfglíma sem endaði með því að hann komst í fastatak og vann glímuna á því og Alexander var þar með úr leik. Björn Sigurðarson dæmdi á mótinu og dæmdi hann meðal annars bronsglímuna í -66 kg flokki en það er ekki sjálfgefið að fá að dæma verðlaunaglímur svo Björn hefur verið að standa sig vel í dómgæslunni. Björn mun dæma á Junior European Cup í Prag eftir viku á og reyna þar að ná sér í alþjóðleg dómararéttindi en samhliða mótinu verður haldið dómarapróf sem hann verður þátttakandi í og er því reynslan af dómgæslunni í Paks gott veganesti fyrir hann. Björn heldur heim á morgun en við taka við æfingabúðir í Paks hjá strákunum fram til 19. júlí en þá halda þeir til Prag og keppa þar næsta laugardag og sunnudag og mun Hermann Unnarsson landsliðsþjálfari verða þeim til aðstoðar.  Hér er hægt að sjá allar glímurnar á mótinu í Paks bæði í dag og í gær. Úlfur og Grímur kepptu á velli 2 fyrri daginn (Úlfur 2:00) (Grímur 33:00 og 2:38:37) en Alexander á velli 3 seinni daginn (1:33:00) og bronsglíman sem Björn dæmdi er á velli 2 (7:11:30) seinni daginn. Hér er stutta útgáfan af glímunum þeirra.
Fyrri dagur: Völlur 1.  Völlur 2. Völlur 3. Völlur 4.
Seinni dagur:  Völlur 1.  Völlur 2. Völlur 3. Völlur 4.

Þeir Úlfur Böðvarsson, Grímur Ívarsson og Alexander Heiðarsson eru mættir til Paks í Ungverjalandi og munu keppa þar á morgun og á sunnudaginn. Grímur og Úlfur keppa á morgun í -90 kg flokknum og á Úlfur fyrstu viðureign og mætir Denis Turac frá Slovakíu en Grímur mætir Sebastian Schneider frá Austurríki. Alexander keppir á sunnudaginn í -60 kg flokki og situr hjá í fyrstu umferð en mætir svo Theau Giallurachis svo frá Frakklandi. Mótið hefst kl. 7 báða dagana að Íslenskum tíma. Hér er má sjá dráttinn og hægt að fylgjast þar með framvindu mótsins. Sýnt er frá mótinu á fjórum völlum og er 90 kg flokkurinn á velli 2 en ekki vitað enn á hvaða velli -60 kg verður. Völlur 1.  Völlur 2. Völlur 3. Völlur 4. Eins og áður hefur komið fram þá stefnir Björn Sigurðarsson á að ná sér í alþjóðleg dómararéttindi og mun hann dæma í Paks um helgina og er það liður í undirbúningi hans fyrir prófið sem verður eftir rúma viku í Prag. Sjá má Björn að störfum á velli 4 fyrri keppnisdaginn í Paks.

Því miður gékk okkar mönnum ekki nógu vel í dag á Junior European Judo Cup í Gdynia en þeir töpuðu báðir fyrstu viðureignum og engin uppreisn.Úlfur byrjaði og keppti gegn Ralph Hoogeboom frá Hollandi. Úlfur var full bráður og glíman vart byrjuð þegar hann sækir í Uchimata en Ralph var vel á verði og náði fallegu mótbragði á honum og skoraði ippon og Úlfur úr leik.  Grímur glímdi stuttu síðar og var andstæðingur hans Bartosz Mackowski frá Póllandi. Þeirra viðureign var hnífjöfn og varði út allan glímutímann en Bartosz  náði einu wazaari eftir um eina og hálfa mínútu og vann á því. Hér er hægt að skoða viðureignir þeirra í fullri lengd, Úlfur á 45:55 mín og Grímur 50:10. og hér er stutta útgáfan.

Þeir Grímur Ívarsson og Úlfur Böðvarssson keppa á morgun á Junior European Judo Cup sem haldið er í Gdynia í Póllandi. Báðir keppa þeir í -90 kg flokknum og hefst mótið í fyrramálið kl. 8 að Íslenskum tíma. Hér er drátturinn og hægt er að horfa á keppnina á þremur völlum í beinni útsendingu og er 90 kg flokkurinn á velli 3 þann 8. júlí.  Útsending 7. júlí  (völlur 1) (völlur 2) (völlur 3) og  útsending 8. júlí  (völlur 1) (völlur 2) (90. kg völlur 3). Björn Sigurðarson er einnig staddur í Gdynia en hann er einn af dómurunum mótsins og hefur hann haft nóg að gera á fyrri keppnisdegi eins og sjá mátti í útsendingunni í dag. Hann dæmir í Gdynia um þessa helgi og svo aftur næstu helgi, 14-15 júlí á Junior European Judo Cup í Paks í Ungverjalandi og að lokum á Junior European Judo Cup í Prag 21-22 júlí. Þátttaka hans í þessum mótum er liður í undirbúningi hans fyrir dómarapróf sem haldið verður í Prag samhliða fyrrgreindu móti 21-22 júlí en Björn stefnir á að ná sér þar í alþjóðleg dómararéttindi sem kallast IJF Continental referee. Þeir félagar Grímur og Úlfur eru á keppnis og æfingaferðalagi um Evrópu og munu taka þátt í ofangreindum mótum og æfingabúðum sem á eftir fylgja auk juniora mótsins í Berlín 28-29 júlí. Þeir munu því hitta Björn nokkuð reglulega næstu helgar. Alexander Heiðarsson mun verða samferða Birni til Paks og mun hann keppa þar í -60 kg flokki og taka einnig æfingabúðirnar ásamt Grími og Úlfi. Hann verður þeim síðan samferða til Tékklands í verkefnin þar og kemur heim að þeim loknum. Hermann Unnarsson landsliðsþjálfari mun einnig verða með strákunum í Tékklandi.

Stutt myndband frá heimsókn Naoki Murata til Íslands í júní 2018.

Í dag fóru þeir Alexander Heiðarsson, Egill Blöndal, Logi Haraldsson, Sveinbjörn Iura ásamt landsliðsþjálfara Jóni Þór Þórarinssyni til Spánar þar sem þeir munu taka þátt í EJU árlegum æfingabúðum í Castelldefels. Þær hefjast 2. júlí og standa til 6. júlí. Þetta er liður í undirbúningi fyrir heimsmeistaramótið í Baku í september og þátttöku í Grand Prix og EJU mótum í júlí og ágúst.

Í hófi sem haldið var í kvöld var Naoki Murata veitt gullmerki JSÍ. Naoki var landsliðsþjálfari Íslendinga á árunum 1976-1977 og fór meðal annars með landslið okkar á Ólympíuleikana í Montreal 1976 en það var í fyrsta skipti sem að Íslenskir judomenn tóku þátt í þeim. Í keppnis og æfingaferðum landsliðsmanna okkar í gegnum tíðina til Japans höfum við átt þar hauk í horni því Naoki hefur ávalt verið þeim innan handar og afar hjálplegur.

Vinur okkar Naoki Murata er væntanlegur til landsins á morgun. Fyrir þá sem ekki vita þá var hann þjálfari Judodeildar Ármanns frá 1975-1977 og landsliðsþjálfari okkar Íslendinga 1976-1977 og fór meðal annars með Gísla Þorsteinssyni og Viðari Guðjohnsen á Ólympíuleikana 1976 en það var í fyrsta skipti sem Íslenskir judomenn tóku þátt í þeim. Naoki Murata sem er 8. Dan er forstöðumaður Kodokan Judo safnsins í Tokyo og einnig er hann varaforseti  Japanese Academy of Budo og er mjög virtur í judo fræðum í heiminum. Á Judo Festival í Porc í vikunni var hann með stórt hlutverk og sá meðal annars um Kodokan Kata Seminar ásamt Mikihiro Mukai og MONDO þar sem hann svaraði allskonar spurningum áhugasamra um judo. Naoki Murata verður hér í boði Judodeildar Selfoss og mun hitta helstu forsvarsmenn íþróttamála þar og skoða íþróttamannvirki þeirra og vera viðstaddur æfingu hjá judodeildinni annað kvöld og að lokum verður haldin veisla honum til heiðurs. Þetta var vel til fundið hjá Selfyssingum og þakkar vert.

Sveinbjörn Iura og Ægir Valsson fóru til Króatíu á sunnudaginn var og tóku þar þátt í OTC í Porec dagana 11-14 júní og með þeim í för var Yoshihiko Iura til halds og trausts. Þessar æfingabúðir sem eru vel sóttar af mörgum af sterkustu judomönnum og konum heimsins eru hluti af stórum viðburði sem heitir Judo Festival Porec  og er nú haldinn í fimmta skiptið og stendur yfir frá 9-17 júní. Fyrir utan OTC æfingabúðirnar eru einnig æfingabúðir fyrir U13 og U15 og Cadetta U18 sem og barna fjölskyldu æfingabúðir, þarna er þjálfararáðstefna, kata kennsla og fleira og fleira og held ég að þetta sé eitthvað sem við ættum að huga betur að í framtíðinni.