Fréttir

Ari Sigfússon og Davíð Víðisson úr JR og Alexander Heiðarsson úr KA fóru í 1. dan próf laugardaginn 2. desember og stóðust allir prófið með sóma. Það er gaman að geta þess að Ari var ekkert að flýta sér í svarta beltið því hann tók brúna beltið 19. desember 1990 eða fyrir 27 árum. Til hamingju allir með áfangann.

Búið er að draga á Tokyo Grand Slam og mætir Egill Blöndal í -90 kg flokknum keppanda frá Perú, Jose Luis Arroyo Osorno. Bendi á að IJF er komið með frábæra nýja síðu til að fylgjast með mótum sem þeir halda. Þar eru allar upplýsingar um keppendur, keppnisröð og úrslit ásamt beinni útsendingu á einum stað.

Egill Blöndal (UMFS) heldur utan á morgun til Japans ásamt Garðari Skaftasyni þjálfarar og mun hann keppa á  Tokyo Grand Slam sem fer fram dagana 2-3 desember. Tokyo Grand Slam er ásamt Paris Grand Slam sterkasta judo mót sem haldið er ár hvert fyrir utan heimsmeistaramótið. Egill keppir næsta sunnudag þ.e  3. desember en hann keppir í -90 kg flokknum þar sem eru 38 þátttakendur og þar á meðal er Aleksandar Kukolj (SRB)  sem er efstur á heimslistanum í þeim flokki. Á eftirfarandi tenglum verður hægt að fylgjast með mótinu hér og hér  og í beinni útsendingu.

Helena Bjarnadóttir vann til bronsverðlauna í dag á Den Helder í Hollandi í U10 +42 kg. Til hamingju Helena. Það gekk upp til hópa mjög vel hjá krökkunum í Den Helder þó svo að ekki hefðu fleiri en Emma og Helena unnið til verðlauna. Þetta er fyrsta mótið hjá þeim erlendis og örugglega ekki það síðasta og algjört ævintýri fyrir þau að sjá og reyna sig við jafnaldra sína þar.  Mikael sem er ekki vanur því að tapa viðureignum vann því miður enga í dag en gerir það bara á næsta móti. Elías og Jónas unnu tvær viðureignir og Hugi og Alli unnu eina hvor. Þjálfurunum þeim Guðmundi, Emil og Þormóði óskum við til hamingju með árangurinn en þeir hafa verið ákaflega ötulir við þjálfun barnanna og sinnt því starfi vel. Óskum einnig foreldrum barnanna til hamingju og þökkum fyrir stuðning þeirra við félagið.

Það var aldeilis frábær árangur sem strákarnir okkar náðu í morgun á Södra Open 2017. Emilíen og Hákon sigruðu í sínum flokkum og Kjartan og Skarphéðinn unnu til silfurverðlauna. Því miður gekk ekki eins vel hjá Kára en hann varð í sjöunda sæti sem er flott hjá honum en í -55 kg flokknum sem var fjölmennastur voru 12 keppendur og tapaði hann fyrstu viðureign, vann næsu en tapaði svo þeirri þriðju og varð sjöundi eins og áður sagði. Hákon vann -60 kg flokkinn örugglega og sigraði alla á ippon og það sama gerði Emilíen í -73kg flokknum. Skarphéðinn tapaði einni viðureign í -73kg flokknum og var það gegn Emilíen. Í -66kg flokknum hjá Kjartani voru níu keppendur og komst hann örugglega í úrslitin eftir þrjár umferðir en þar varð hann að játa sig sigraðan. Þetta var frábær árangur hjá strákunum og eiga þeir allir hrós skilið fyrir frammistöðuna sem og þjálfarar þeirra Heimir og Garðar sem fylgdu þeim á mótið og höfðu í nógu að snúast þar sem keppt var á sex völlum og allir á svipuðum tíma.

Emma Thuringer varð í öðru sæti á Den Helder international í morgun í U10-25kg. Til hamingju Emma.

Í morgun fór stór hópur keppenda úr JR til að taka þátt í móti í Svíþjóð annarsvegar og í Hollandi hinsvegar og verður keppt á morgun laugardaginn 25. nóv. Mótið í Hollandi heitir International Den Helder Open Judo Championships og fer fram í samnefndri borg. Við keppum þar í  aldursflokkum 8-11 ára og erum við með sjö keppendur og þeim fylgja þrír þjálfarar og foreldrar. Keppendur okkar eru Aðalsteinn Björnsson E-38, Elías Þormóðsson C-34, Emma Thuringer D-25, Helena Bjarnadóttir D+42, Hugi Kristjánsson E-34, Jónas Guðmundsson C-34 og Mikael Ísaksson E-38 og fyrir hópnum fara þjálfararnir Guðmundur Jónasson, Emil Emilsson og Þormóður Jónsson. Því miður hef ég ekki fundið neinn tengil þar sem hægt er að fylgjast með mótinu en set hann hér inn ef hann finnst.

Mótið í Svíþjóð heitir Södra Judo Open  og keppum við í aldurshópnum U15 þ.e. 13-14 ára. Keppendur okkar þar eru fimm þeir Kári Egilsson -55kg, Hákon Garðarsson -60kg, Kjartan Hreiðarsson -66kg, Emilían Ingimundarson -73kg og Skarphéðinn Hjaltason -73kg.  Þjálfarar og fararstjórar eru þeir Garðar Sigurðsson og Heimir Kjartansson. Hér er hægt að fylgjast með gangi mála í Svíþjóð og sjá úrslit mótsins. Bolirnir sem JR ingarnir eru í voru gefnir af Inter Medica og þökkum  við kærlega fyrir styrkinn.

 

 

Sunnudaginn 19. nóv. sl. hélt Judodeild Ármanns upp á sextugsafmæli sitt en það var stofnað 2. febrúar 1957 og er elsta judofélag landsins. Í tilefni áfangans var haldin  opin sameiginleg æfing þar sem fjölmargir tóku þátt í henni bæði fyrrverandi og núverandi iðkendur deildarinnar sem og iðkendur annara klúbba. Að lokinni æfingu var haldið kaffisamsæti þar sem félagsmenn voru heiðraðir fyrir vel unnin störf til margra ára.
Það er ekki sjálfsagt mál að íþróttafélag nái sextíu ára aldri. Til þess að það gerist þá þarf félagið að hafa öflugt bakland, öfluga og fórnfúsa félaga sem leggja á sig mikla og óeigingjarna vinnu í áraraðir. Judodeild Ármanns hefur verið lánsamt hvað það varðar. Frá upphafi hafa þeir haft á að skipa frábærum mannskap sem lifði og hrærðist fyrir íþróttina. Judodeild Ármanns hefur verið öflugasta judo félag landsins í áraraðir og hefur unnið til flestra Íslandsmeistaratitla bæði í karla og kvenna flokkum fullorðinna.
Judofélag Reykjavíkur óskar Judodeild Ármanns og félagsmönnum þess til hamingju með áfangann og óskar ykkur alls hins besta í framtíðinni.

Birkir Hrafn Jóakimsson tók svarta beltið 15. nóv. sl. eftir að hafa verið með það brúna í rúm 20 ár svo það var lögu orðið tímabært að fara í 1. dan.  Uke hjá Birki var Gísli Vilborgarson 2. dan. Til hamingju með áfangann Birkir.

Sveitakeppni karla fór fram í gær og var hún haldin í Skelli hjá Judodeild Ármanns. Það voru óvenjufáar sveitir mættar til leiks að þessu sinni en keppnin var engu að síður ákaflega skemmtileg eins og jafnan er í sveitakeppni. Fullt var af flottum viðureignum og köstum sem sjá má hér og má nefna sópið hans Breka Bernharðssonar gegn Birgi Arngrímssyni í -81 kg flokknum, kastið hans Dofra Bragasonar gegn Hauki Ólafssyni í -66 kg flokknum og kastið hans Loga Haraldssonar í -81 kg flokknum JR gegn KA svo eitthvað sé nefnt. Ekki var gólfglíman síðri og mátti sjá frábæra vinnslu þar eins og hjá Agli Blöndal gegn Adam Þórarinssyni í -90 kg flokknum og Hermanni Unnarssyni gegn gegn Arnari Björnssyni í -73 kg flokknum. Sú viðureign sem var þó kanski hvað mest spennandi var milli þeirra Egils Blöndal frá Selfossi og hins unga og efnilega Árna Lund í JR. Þeir kepptu í -90 kg þyngdarflokki og varði sú viðureign allan glímutíman og var gríðalega spennandi en fór svo að lokum að Egill sem er Íslandsmeistari bæði í -90 kg og opnum flokki 2017 og einn okkar sterkasti judomaður í dag sigraði Árna á wazaari eftir hörkuviðureign. Leikar fóru þó þannig þegar upp var staðið að sveit JR sigraði og er Íslandsmeistari 2017, í öðru sæti varð sveit Selfoss og í því þriðja sveit KA. Hér má sjá riðilinn og allar viðureignirnar.