Smáþjóðaleikarnir 2025 voru haldnir í Andorra dagana 26. til 31. maí og voru níu íslenskir keppendur í judo á meðal þátttakenda auk þjálfara og flokksstjóra. Þau sem kepptu að þessu sinni voru Kjartan Hreiðarsson (-100 kg) Aðalsteinn Karl Björnsson og Skarphéðinn Hjaltason (-90 kg), Böðvar Arnarsson og Mikael Ísaksson (-81 kg) Gylfi Jónsson (-73 kg) Helena Bjarnadóttir (-63 kg), Weronika Komendera (-57 kg) og Eyja Viborg (-52 kg). Flokksstjóri var Gísli Egilson og þjálfarar þeir Þormóður Árni Jónsson og Zaza Simonishvili. Aðalsteinn Björnsson sem keppti á síðustu Smáþjóðaleikum í -73 kg flokki hefur verið að bæta sig gríðarlega á síðustu mánuðum og keppti núna í -90 kg flokki. Hann sigraði með miklum yfirburðum og er hann líklegast sá yngsti til þessa, aðeins 18 ára gamall, til að vinna til gullverðlauna á Smáþjóðaleikum í judo. Þetta voru einu gullverðlaunin sem við fengum að þessu sinni og kominn tími til en síðast unnum við gullverðlaun á Smáþjóðaleikunum 2017 í San Marinó. Helena Bjarnadóttir stóð sig einnig virkilega vel og vann til bronsverðlauna í -63 kg flokki kvenna og hún ásamt Weroniku Komendera og Eyju Viborg unnu einnig bronsverðlaun í liðakeppni kvenna. Kjartan Hreiðarsson og Eyja Viborg kepptu um bronsverðlaunin í sínum flokkum en lutu því miður í lægra haldi og Skarphéðinn varð í fjórða sæti en aðrir komust ekki áfram.
Hér og hér er samantekt af árangri Íslendinga í judo á Smáþjóðaleikunum frá því þeir voru fyrst haldnir í San Marino árið 1985 og hafa þeir unnið til alls 105 verðlauna. Hér eru pdf skjöl með úrslitum í einstaklingskeppninni og liðakeppninni í Andorra og á vef IJF má einnig finna úrslitin í einstaklings og liðakeppninni. Á vef EJU er flott viðtal við Aðalstein sem tekið var við hann að loknu móti.
Myndirnar hér neðar eru af heimasíðu EJU (Evrópu judosambandið).
