Category: Fréttir

Haustmót JSÍ 2025 í U13, U15 og U21 verður haldið laugardaginn 4. október í íþróttahúsi Vallaskóla Selfossi. Mótið hefst kl. 10 mótslok áætluð kl. 15. Vigtun á mótsstað föstudaginn 3. okt. frá 18-18:30 eða á keppnisdegi fyrir alla flokka frá 9-9:30. Ef vigtað er á keppnisdegi mega keppendur vera mest 1. kg yfir þyngdarmörkum í öllum aldursflokkum.
Skráningarfrestur hefur verið lengdur til miðnættis þriðjudaginn 30. september. Frétt af heimasíðu JSÍ.

Æfingabúðir JSÍ fóru fram dagana 12-14 september og voru haldnar hjá Judodeild Ármanns að þessu sinni. Þetta voru aðrar æfingabúðir JSÍ á árinu en þær fyrri voru haldnar hjá Judodeild ÍR dagana 2-4 maí s.l. Zaza Simonishvili landsliðsþjálfari stjórnaði æfingunum sem voru blanda af randori og tækniæfingum en æfingabúðirnar voru hugsaðar sem undirbúningur fyrir komandi keppnistímabil og eins og í maí ætlaðar U18/U21 og seniora aldursflokkum. Þátttakendur voru tæplega fjörtíu frá þremur klúbbum Ármanni, JR og JS. Hér er videoklippa frá æfingunni.

Í vikunni fóru þeir Aðalsteinn Björnsson og Zaza Simonishvili til Bratislava í Slóvakíu til að taka þátt í Evrópumeistaramóti juniora en það er eitt sterkasta mót sem haldið er í heiminum ár hvert í þessum aldursflokki en judohefðin er mikil í Evrópu og fáir veikir hlekkir. Mótið stendur yfir frá 4-7 september og keppir Alli laugardaginn 6.sept. og hefst keppnin klukkan 8 að morgni á okkar tíma. Alli sem keppir í – 90 kg. flokki á níundu viðureign á velli þrjú og ætti hún að hefjast um kl. 8:30. Alli mætir afar sterkum keppanda frá Moldóvíu, Vadim Ghimbovschi en hann er í sjötta sæti heimslistans í þessum flokki. Þátttakendur eru 364 frá 43 þjóðum, 199 karlar og 165 konur. Hér er drátturinn og fylgjast má með keppninni í beinni útsendingu á JudoTv.

Byrjenda og framhaldsnámskeið 5-6 ára barna á laugardögum kl. 10
Byrjenda og framhaldsnámskeið 7-10 ára barna á þriðjudögum og fimmtudögum kl. 17
Byrjenda og framhaldsnámskeið 11-14 ára barna mánudaga, miðvikudaga, föstudaga kl. 17
Byrjendanámskeið 15 ára og eldri mánudaga, þriðjudaga og fimmtudaga kl. 20
Gólfglíma, byrjendur/framhald 30 ára og eldri þriðjudaga, fimmtudaga og laugardaga
Meistaraflokkur og framhald 15 og eldri alla daga vikunnar sjá stundatöflu.
Kvennatími byrjendur og framhald 15 ára og eldri  mánudaga og miðvikudaga kl. 17

————————————————————————————————————————————————————- Byrjendur fá fría prufutíma, komdu og prófaðu í viku, það er frítt. Ekki þarf að skrá sig í prufutíma, bara mæta á staðinn í réttan tíma og láta vita af sér, en það væri samt gott að fá tilkynningu um það á netfangið jr@judo.is. Nóg er að mæta með síðar íþróttabuxur og bol. Judobúningar fást hjá JR. ————————————————————————————————————————————————————-
Ef ákveðið er að halda áfram að loknum prufutíma þá er hér gengið frá skráningu og námskeiðsgjaldi. Ef frekari upplýsinga er óskað er hægt að hafa samband í síma 588-3200 eða senda tölvupóst á netfangið jr@judo.is

Strákarni kepptu í gær á International Children´s games og stóðu sig vel en Jóhann Jónsson keppti til úrslita í  -81 kg flokknum  eftir að hafa lagt að velli tvo á andstæðinga með glæsilegum ippon köstum, þann fyrri á drop seoi-nage og þann seinni á uranage. Hann mætti síðan Rokas Leikus frá Litháen í úrslitum og reyndi aftur uranage sem hafði gengið svo vel gegn síðasta andstæðini en Rokas áttaði sig í tíma og náði mótbragði og sigraði. Bjarnsteinn Hilmarsson sem keppti í -73 kg flokki tapaði í fyrstu umferð en fékk uppreisnarglímu sem hann vann en tapaði svo þeirri þriðju og endaði í sjöunda sæti. Seinni keppnisdaginn var keppt í liðakeppni en lágmarksfjöldi var fimm manns og vorum við því ekki með lið. Það voru sex lið skráð til keppni og gat hvert lið fengið einn lánsmann ef á þurfti að halda og var Bjarnsteinn beðinn um að keppa með einu þeirra sem hann og gerði en liðið náði því miður ekki að komast á verðlaunapall. Þetta var fínn árangur hjá strákunum og óskum við þeim til hamimgju með árangurinn. Því miður voru gæðin í beinu útsendingunni það slæm að ekki var hægt að nota hana en videoklippa af glímunum hans Jóhanns sem tekin var upp á staðnum er væntanleg.

Judokeppnin á International Children´s games hefst á morgun. Búið er að draga og mætir Jóhann Jónsson sem keppir í -81 kg flokki Nace Hovnik frá Slóveníu og Bjarnsteinn Hilmarsson sem keppir í -73 kg flokki mætir Jaka De Costa einnig frá Slóveníu. Keppt verður á þremur völlum og hægt að fylgjast með keppninni í beinni útsendingu sem hefst kl 6:00 í fyrramálið á okkar tíma en þeir eru þremur tímum á undan okkur. Forkeppnin er frá kl. 6:00 – 9:00 og úrslitin frá 11:00 – 13:00 á okkar tíma.

ICG (International Children´s games) eða alþjóðaleikar ungmenna verða haldnir í 57 skiptið dagana 3-8 ágúst í Tallinn í Eistlandi. Leikarnir sem eru viðurkenndir af Alþjóða Ólympíunefndinni hafa verið haldnir um víða veröld síðan 1968 og er þar keppt í hinum ýmsu íþróttagreinum fyrir ungmenni á aldrinum 12-15 ára. Íþróttabandalag Reykjavíkur (ÍBR) hefur með stuðningi frá ÍTR sent þátttakendur á leikana frá árinu 2001 og hafa Reykvískir judomenn og konur amk. þrisvar sinnum tekið þátt í þeim. Í fyrsta skipti þegar leikarnir fóru fram í Reykjavík árið 2007, næst 2011 í Skotlandi þar sem Logi Haraldsson -73 kg og Roman Rumba -81 kg unnu báðir til silfurverðlauna og svo næst 2017 í Kaunas í Litháen. Því miður vantar frekari og öruggar upplýsingar um þátttöku og árangur frá fyrri tíð en verður bætt úr því við fyrsta tækifæri ef hægt er. Nú fara leikarnir fram í Tallinn í Eistlandi eins og áður sagði og verða þeir Bjarnsteinn Hilmarsson og Jóhann Jónsson á meðal þátttakenda að þessu sinni ásamt Zaza Simonishvili þjálfara. Judokeppnin verður haldin þriðjudaginn 5. ágúst og keppir Bjarnsteinn í -73 kg flokki og Jóhann í -81 kg flokki og verða nánari upplýsingar um mótið settar hér inn um leið og þær fást. Myndin hér neðar til vinstri var tekin í JR að lokinni síðustu æfingu þeirra í gær en þeir leggja af stað til Tallinn í nótt. Hin myndin var tekin í Laugardalnum rétt áður en lagt var af stað.

EYOF 2025 var haldið í Skopje í Makedoníu dagana 20-26 júlí. Keppendur í judo voru 338 frá 44 þjóðum 183 karlar og 155 konur. Í judokeppninni voru fjórir þátttakendur frá Íslandi þau Eyja Viborg -52 kg, Helena Bjarnadótir -63 kg, Jónas Guðmundsson -73 kg og Viktor Kristmundsson +90 kg og með þeim var Zaza Simonishvili landsliðsþjálfari. Judokeppnin á EYOF er og hefur alltaf verið gríða sterk og ekki auðvelt að komast áfram en á sama tíma mjög gott mót til að bera sig saman við þá bestu í þessum aldursflokki. Eyja Viborg komst lengst okkar keppenda en hún sigraði heimamann í fyrstu viðureign á fallegu ippon kasti. Í annari viðureign varð hún að játa sig sigraða en fékk uppreisnarglímu þar síðasti andstæðingur hennar komst í fjórðungs úrslit en því miður tapaði hún þeirri viðureign og endaði 9-12 sæti. Við höfum ekki átt marga keppendur í kvennaflokki á EYOF fram að þessu og var þetta var í fyrsta skipti sem við vinnum viðureign í þeim flokki. Aðrir keppendur okkar töpuðu í fyrstu viðureign en fengu ekki uppreisnarglímu þar sem andstæðngar þeirra sem þau töpuðu fyrir komust ekki nógu langt áfram í keppninni. Jónas tapaði í fastataki sem og Helena en Viktor átti mjög fína glímu en tapaði á wazaari að loknum fullum glímutíma. Á einu augnabliki í glímunni náði Viktor flottu ippon kasti og hefði þar með unnið viðureignina ef það hefði verið gilt en dómarin hafði á sama augnabliki kallað matte og kastið því ekki gilt því miður. Nánari upplýsingar um mótið má finna á vef IJF á JudoTV og hér er stutt videoklippa frá viðureignum okkar manna.

EYOF 2025 verður haldið í Skopje í Makedoníu 20-26 júlí og verður judokeppnin dagana 22. til 25 júlí. Skráðir þátttakendur í judo eru 341 frá 44 þjóðum 184 karlar og 157 konur. Keppendur okkar eru þau Eyja Viborg -52 kg, Helena Bjarnadótir -63 kg, Jónas Guðmundsson -73 kg og Viktor Kristmundsson +90 kg og með þeim er Zaza Simonishvili landsliðsþjálfari. Eyja keppir 23. júlí, Helena og Jónas 24. júlí og að lokum Viktor 25. júlí. Nánari upplýsingar eins og hverjir verða andstæðingar þeirra og tímasetningar má finna hjá EJU og hjá IJF og fylgjast með keppninni í beinni útsendingu hér og líkast til einnig á JudoTV. Á myndinni sem hér fylgir vantar Helenu en hún býr í Serbíu og kemur þaðan til Makedoníu.

Í júlí munu reglulegar judoæfingar í meistaraflokki og framhaldi 15+ vera á mánudögum, miðvikudögum og fimmtudögum kl 18-19:30, Ef áhugi er á því að æfa einnig á þriðjudögum og föstudögum þá verður það hægt en ákveðið hverju sinni á æfingu daginn áður.