Category: Fréttir

Vormót JSÍ í yngri aldursflokkum (U15, U18, U21 árs) var haldið í KA heimilinu á Akureyri í dag, laugardaginn 18. mars og var það í umsjón Judodeildar KA og voru það þeir Hans Rúnar Snorrason, Hermann Torfi Björgólfsson og Sigmundur Magnússon sem að stýrðu því. Dómarar voru þeir Jón Kristinn Sigurðsson og Jakob Burgel Ingvarsson. Hér eru úrslitin og hér er hægt að horfa á allt mótið sem var í beinni útsendingu og hér er stutt videoklippa frá því. Til Akureyrar var farið í lítilli rútu og voru keppendur frá JR þrettán og fjórir þeirra kepptu í tveimur aldursflokkum. Með þeim voru þjálfararnir Guðmundur Björn Jónasson, Zaza Simonishvili og Þormóður Jónsson og sjálfboðaliði ársins 2022 hjá JR Helgi Einarsson sá um aksturinn. JR- ingar áttu frábæran dag og unnu samtals til níu gullverðlauna, fernra silfurverðlauna og þriggja bronsverðlauna. Til hamingju með árangurinn.

Vormót JSÍ 2023 yngri. Í gær lögðu fjórtán keppendur úr JR af stað ásamt þremur þjálfurum og fararstjóra til að taka þátt í Vormóti JSÍ í aldursflokkum U13, U15, U18 og U21 árs sem haldið verður í dag á Akureyri. Þátttakendur eru um fjörtíu frá sex judoklúbbun. Mótið fer fram í KA heimilinu og hefst kl. 12 og mótslok áætluð um kl. 15. Hér er linkur á beina útsendingu frá mótinu og eru úrslitin.

Vormót JSÍ 2023 í yngri aldursflokkum verður haldið á Akureyri 18. mars í KA heimilinu. Keppt verður í aldursflokkunum U13, U15, U18 og U21 og er áætlað að mótið hefjist kl. 12 og ljúki um kl. 16:00. Vigtun í KA heimilinu föstudagskvöldið 17.mars frá kl.19-21:00 en einnig verður hægt að vigta sig á mótsdegi frá kl. 11:00-11:30. Farið verður með rútu frá JR föstudaginn 17. mars kl. 14 og komið til baka daginn eftir um kl. 21. Kostnaður, rúta og gisting (hótel/uppábúin rúm með morgunmat) um 12.000 k. Með hópnum fara þrír þjálfarar frá JR. Myndin hér ofar er af nokkrum JR-ingum í KA heimilinu á vormótinu 2022.

Frétt af heimasíðu JSÍ. Fjórir landsliðsmenn í U18 og U21 landsliðum taka þátt í sterkum alþjóðlegum æfingabúðum sem haldnar eru í Nymburk í Tékklandi dagana 13-18 mars. Það eru þeir Aðalsteinn Björnsson og Romans Psenicnijs í U18 ára aldursflokki og Kjartan Hreiðarsson og Skarphéðinn Hjaltason í U21 árs aldursflokki og með þeim í för er Zaza Simonishvili landsliðsþjálfari. Æfingabúðir þessar eru haldnar árlega og eru liður í röð æfingabúða sem nefnast einu nafni Olympic Training Centre (OTC). Þær eru haldnar af Evrópska Judosambandinu (EJU) í samvinnu viðkomandi landssamband. Um 500 þátttakendur frá 43 þjóðum taka þátt í æfingabúðunum að þessu sinni.

Farist hefur fyrir að setja inn fréttir á heimasíðuna af allmörgum kyu gráðunum hjá JR ingum sem teknar hafa verið um og eftir áramót og er bætt úr því hér. Eftirtaldir aðila tóku brúnt belti (1. kyu) Kolmar Jónsson, Jónas Guðmundsson, Elías Þormóðsson, Gunnar Ingi Tryggvason, Helena Bjarnadóttir, Nökkvi Viðarsson, Aleksander Perkovski og Rúbar Hamou. Blátt belti (2. kyu) tóku Tristan Sverrisson, Helgi Hrafnsson, Vilmar Vilmarsson, Vésteinn Gunnarsson, Emma Thueringer og Orri Helgason. Grænt belti (3.kyu) tóku Benas Paskevicius og Ívar Kolbeinsson. Appelsínugult belti (4.kyu) tóku Jóhann Jónsson og Kristján Stefánsson og gula beltið (5.kyu) þeir Daníel Hákonarson, Gabríel Jóhannesson og Sigurður Sigurgeirsson. Til hamingju með gráðurnar.

Félagarnir Ari Sigfússon og Þorgrímur Hallsteinsson þreyttu 2. dan gráðupróf laugardaginn 11. mars og stóðust það með glæsibrag. Alllangur tími er liðinn síðan þeir fóru síðast í gráðupróf en Ari tók 1. dan 2017 eða fyrir sex árum og liðin eru tíu ár frá því að Þorgrímur tók 1. dan en það gerði hann 2013. Eins og flestir vita eða hafa tekið eftir þá er nánast ekkert judomót haldið hér á landi án þess að þeir félagar komi ekki að því en þeir hafa alla jafnan séð um mótsstjórn og eða komið að undirbúningi móta með einhverjum hætti og hafa gert um árabil. Tækniráð sér um allar dan gráðanir og voru prófdómarar hjá þeim þeir Björn Halldórsson 5. dan og Garðar Skaftason 4. dan. Til hamingju með áfangann.

Þar sem óskað hefur verið eftir fleiri tímum fyrir Gólfglímu 30 + þá verður fimmtudeginum frá kl. 17-18 bætt við til reynslu og ef þátttaka verður góð þá höldum við þeim tíma áfram.

Vormót JSÍ 2023 í yngri aldursflokkum verður haldið á Akureyri 18. mars í KA heimilinu. Keppt verður í aldursflokkunum U13, U15, U18 og U21 og er áætlað að mótið hefjist kl. 12 og ljúki um kl. 16:00 en nánari tímasetningar að loknum skráningarfresti sem 13. mars. Þeir JR- ingar sem áhuga hafa á því að keppa láti þjálfara vita um það í síðasta lagi föstudaginn 10. mars. Gert er ráð fyrir að fara í lítilli rútu frá JR föstudaginn 17. mars kl. 14 og koma til baka daginn eftir líklega um kl. 21. en nánari tímasetning síðar. Kostnaður, rúta og gisting (hótel/uppábúin rúm) um 17.000 kr. fer þó eftir fjölda þátttakenda og gæti því hækkað eða lækkað eitthvað. JR greiðir keppnisgjöldin fyrir alla. Með hópnum fara tveir til fjórir þjálfarar frá JR. Myndin hér ofar er af JR-ingum í KA heimilinu á vormótinu 2022.

Góumót JR var haldið laugardagin 25. febrúar og er það æfingamót fyrir yngstu iðkendurna (7-10 ára) þar sem allir fá þátttökuverðlaun. Keppnin hófst kl. 13 en á æfingu barna 5-6 ára fyrr um morguninn var haldið lítið æfingamót fyrir þau og er mynd af þeim hér neðar á verðlaunapalli með þáttttökuverðlaunin sín. Keppendur voru fjörtíu og fimm frá fimm klúbbum og voru það JR, Judodeild Grindavíkur, Judodeild Ármanns, Judofélag Reykjanesbæjar (JRB) og Judodeild Selfoss sem öttu kappi saman. Flestir þátttakendanna voru að taka þátt í sínu fyrsta móti og stóðu þau sig alveg frábærlega og höfðu þjálfarar þeirra í nógu að snúast við að undirbúa þau og leiðbeina. Börnunum er raðað saman eftir aldri og þyngd eins og venja er og keppa stúlkur og drengir stundum saman í flokkum ef þannig stendur á. Einnig þarf stundum að færa keppendur á milli aldursflokka til að þyngd keppenda sé sem jöfnust. Dómgæslan var í höndum okkar bestu yngri keppnismanna og leystu þeir verkið vel af hendi en það voru þeir Aðalsteinn Björnsson, Jónas Guðmundsson og Kjartan Hreiðarsson sem sáu um dómgæsluna og svo var það Ari Sigfússon og Skarphéðinn Hjaltason sáu um góða og örugga mótsstjórn. Mótið var frábær skemmtun og ótrúlega flott judo sem þessir ungu iðkendur sýndu. Hér er stutt videoklippa frá mótinu og hér eru úrslitin .

Þá er Matsumae Cup lokið að þessu sinni en mótið var vel sótt en um 700 keppendur frá tæplega 20 þjóðum sóttu mótið. Það voru átta þátttakendur frá Íslandi og stóðu þeir sig býsna vel og unnu samtals 23 viðureignir og þrjú þeirra kepptu um bronsverðlaun en það voru þau Helena Bjarnadóttir í U18-70kg, Romans Psenicnijs U18 -66 kg og Aðalsteinn Björnsson U18 -73kg. Það var ekki auðvelt að komast á pall því þrátt fyrir að hafa unnið fjórar viðureignir í flokknum eins og Aðalsteinn gerði í U18-73 kg eða fimm viðureignir eins og Romans gerði í U18 -66 þá dugði það ótrúlegt en satt ekki til verðlauna. Kjartan komst lengst seinni daginn, hann tapaði tveimur viðureignum en vann þrjár og þar af eina afar glædilega með vel útfærðum armlás þegar aðeins um 20 sek voru eftir af viðureigninni og hann var þá undir að stigum. Daron byrjaði líka vel seinni daginn í U21 -73 kg en hann mætti sigurvegaranum í U18 -73 kg frá fyrri keppnisdegi og sigraði hann örugglega en tapaði því miður næstu. Á heimasíðu JSÍ er nánari umfjöllun um keppnina en hér eru úrslitin og hér er streymið frá útsendingunni báða dagana. Áður en lagt verður af stað heim tekur hópurinn okkar þátt í tveggja daga æfingabúðum í Vejle ásamt allflestum keppendum mótsins.