Category: Fréttir

Helgina 8-9 júlí var Paks Junior European Cup 2023 haldið í Ungverjalandi og voru fjórir þátttakendur frá Íslandi á meðal keppenda. Það voru þeir Kjartan Hreiðarsson, Daron Hancock, Mikael Ísaksson og Skarðhéðinn Hjaltason og með var Zaza Simonishvili landliðsþjálfari. Þessi European Cup mót eru gríðalega sterk og fjölmenn en í Paks voru 26 þjóðir og tæplega 400 keppendur og eru þau líkast til sterkustu mót sem haldin eru í þessum aldursflokki. Því miður komust okkar menn ekki áfram að þessu sinni en þeir fá keppnisreynslu sem nýtist þeim seinna meir. Í síðasta mánuði kepptu þeir á EC í Birmingham og tóku svo þátt í tveggja daga æfingabúðum og það gera þeir einning núna og koma svo heim á miðvikudag reynslunni ríkari eftir að hafa keppt og æft með mörgum af bestu judomönnum heims. Til þess að komast í fremstu röð og vera meðal þeirra bestu þá þarf að sækja reglulega æfingabúðir og sterk mót og taka tapi með jákvæðu hugarfari og læra af reynslunni og þá kemur að því að hlutirnir fara að snúast við og vinningar fara að hlaðast inn og sigrar á mótum ekki lengur fjarlægur draumur. Hér eru upplýsingar um mótið úrslit, video og fleira og einnig er hægt að finna allar upplýsingar um keppnina á vef IJF.

Um næstu helgi þ.e. dagana 8-9 júlí munu fjórir keppendur frá Íslandi taka þátt í Paks Junior European Cup 2023 í Ungverjalandi. Það eru þeir Kjartan Hreiðarsson og Daron Hancock sem keppa á laugardaginn í -73 kg flokki og Mikael Ísaksson í -81 kg flokki og Skarðhéðinn Hjaltason í -90 kg flokki sem keppa á sunnudaginn og með þeim í för er Zaza Simonishvili landliðsþjálfari. Keppnin hefst báða dagana kl. 7 að morgni að íslenskum tíma og verður hægt að fylgjast með í beinni útsendingu. Einnig er hægt að finna allar upplýsingar um keppnina, úrslit og fleira á vef IJF. Að lokinni keppni taka við tveggja daga æfingabúðir hjá strákunum.

Síðastliðna sex mánuði hefur Lisa Margarete Naeve frá Þýskalandi æft hjá JR en hún kom hingað til lands í janúar til að vinna og hefur síðan þá æft nánast daglega með okkur. Lisa er mjög öflug judokona en hún keppti á Reykjavik Judo Open (RIG) í janúar og vann til tvennra verðlauna en hún vann silfurverðlaun í -57 kg flokki og bronsverðlaun í opnum flokki. Það hefur verið frábært að hafa hana í klúbbnum og hún verið mikil lyftistöng og hvatning fyrir aðra iðkendur. Því miður er dvöl hennar hér á landi lokið í bili og er hún farin heim til Þýskalands en við vonumst samt til að sjá hana aftur á æfingu hjá okkur einhvern daginn eða kanski á næsta RIG. Takk fyrir heimsóknina Lisa.

Daníela Rut Daníelsdóttir tók gráðuna 1. dan í dag og stóðst það með glæsibrag. Uke hjá henni var Lisa Margarete Naeve sem hefur æft í JR frá síðustu áramótum. Daníela uppfyllti skilyrði til prófs fyrir nokkrum árum síðan og átti þá að taka það þá en þurfti og hefur þurft að fresta því vegna meiðsla þar til nú.

Því miður tókst okkur mönnum ekki vel upp á mótinu Birmingham Junior European Cup) en þeir töpuðu allir fyrstu glímu en þó eftir mislangan tíma og voru þar með fallnir úr keppni nema Daron en hann fékk uppreisnarglímu (sem hann tapaði) þar sem að andstæðingur hans í fyrstu glímu komst í átta manna úrslit. Allir sem tapa fyrir þeim sem komast í átta manna úrslit eða lengra fá uppreisnarglímu og ef þeir vinna þá glímu halda þeir áfram en annars eru þeir endanlega fallnir úr keppni. Þó svo að ekki hafi gengið sem skyldi eru drengirnir þó reynslunni ríkari og munu taka þátt í tveggja daga æfingabúðum áður en lagt verður af stað heim.

Evrópumeistaramót 2023 í Cadett aldursflokki (15-17 ára) var haldið í Portugal dagana 22. til 24. júlí og var Arnar Arnarsson frá Selfossi á meðal keppenda og með honum í för var Zaza Simonishvili landsliðsþjálfari. Arnar keppti í -90 kg flokki og mætti Emil Jabiyev frá Svíþjóð sem er í 37 sæti heimslistans og varð Arnar að lúta í lægra haldi gegn honum. Þar sem að Emil tapaði næstu viðureign þá var ekki lengur möguleiki á uppreisnarglímu fyrir Arnar og þátttöku hans þar með lokið. Hægt er að kaupa áskrift að JudoTv en þar er hægt að sjá allar glímur mótsins og fjölda annara móta.

Helena Bjarnadóttir sem hefur æft og keppt fyrir JR frá því hún var barn og unnið til fjölda verðlauna mun flytja ásamt foreldrum sínum til Serbíu á næstu dögum og vera þar um einhver ókomin ár en móðir hennar hún Marija er þaðan. Helena mun æfa þar og keppa en stefnir jafnframt á að taka þátt í helstu mótum á Íslandi eins og RIG og ÍM en hún á titil að verja en hún varð Íslandsmeistari 2023 í seniora flokki bæði í -70 kg og opnum flokki. Við óskum Helenu og foreldrum hennar þeim Bjarna og Mariju alls hins besta og að þeim muni farnast vel á nýjum stað en þeirra verður sárt saknað í JR. Hér neðar eru nokkrar myndir frá ýmsum tímum.

Það er mikið um að vera þessa helgi hjá íslenskum judomönnum en um helgina munu sex keppendur spreyta sig á tveimur mótum og er annað þeirra Evrópumeistaramót í cadett flokki (U18) í Portúgal en þar er einn keppandi frá Íslandi ásamt þjálfara og hitt er Birmingham Junior European Cup (U21 árs) og eru þar fimm keppendur ásamt Gísla Egilsyni fararstjóra og þjálfara. Keppendur okkar í Birmingham eru þeir Kjartan Hreiðarsson og Daron Hancock sem keppa á morgun laugardag í -73 kg flokki og í -81 kg flokki eru þeir Böðvar Arnarsson og Mikael Ísaksson sem keppa á sunnudaginn ásamt Skarðhéðni Hjaltasyni í – 90 kg flokki. Keppnin hefst báða dagana kl. 8 að morgni að íslenskum tíma og hægt er að fylgjast með í beinni útsendingu og einnig er hægt að finna allar upplýsingar um keppnina, úrslit og fleira hér á vef IJF. Að lokinni keppni taka við tveggja daga æfingabúðir hjá strákunum. Hér er umfjöllun um mótið á vef EJU.

Evrópumeistaramót Cadett þ.e. aldursflokkur 15-17 ára stendur nú yfir í Portúgal og á meðal keppenda er Arnar Arnarsson frá Selfossi og með honum í för er Zaza Simonishvili landsliðsþjálfari. Arnar keppir á morgun, laugardaginn 24 júní í – 90 kg flokki og hefst keppnin kl. 9 að íslenskum tíma og mætir hann Emil Jabiyev frá Svíþjóð sem er í 37 sæti heimslistans í cadett flokki. Hægt er að fylgjast með í beinni útsendingu og einnig er hægt að finna allar upplýsingar um keppnina, úrslit og fleira hér á vef IJF.

Smáþjóðaleikarnir voru haldnir á Möltu dagana 29. maí til 3. júní og voru tíu íslenskir þátttakendur í judo á meðal keppenda en alls voru keppendur sjötíu frá níu þjóðum. Í einstaklingskeppninni 30. maí, náðu þeir Árni Pétur Lund -90 kg og Egill Blöndal -100 kg bestum árangri en þeir unnu til bronsverðlauna. Helena Bjarnadóttir -63 kg, Weronika Komendera -52 kg og Skarphéðinn Hjaltason -90 kg kepptu einnig um bronsverðlaun en töpuðu þeirri viðureign og enduðu í 5. sæti. Sveitakeppninni fór fram 1. júní og kepptum við aðeins í karlasveit. Keppt er í þremur þyngdarflokkum -66kg(-60kg og -66kg), -81kg(-73kg og -81) og -100kg og var sveitin skipuð þeim Aðalsteini Björnssyni og Kjartani Hreiðarssyni í -81kg og Árna Pétri Lund og Agli Blöndal í -100kg. Því miður var sveitin ekki fullskipuð þar sem Romans Psenicnijs -66 kg var frá keppni vegna meiðsla svo sveitin byrjaði alltaf með eitt tap. Fyrst mættum við Monaco og tapaðist sú keppni með einum vinningi gegn tveimur (Kjartan tapaði en Árni vann). Næst mættum við Lichtenstein og fór hún eins, við töpuðum með einum vinningi gegn tveimur (Kjartan vann en Egill tapaði) og þar með vorum við úr leik. Á vef JSÍ má sjá nánari umfjöllun um einstaklingskeppnina og liðakeppnina. Upplýsingar um keppnina og úrslit má finna víða eins og hér hjá IJF sem og hér og á heimasíðu EJU er líka hægt að sjá úrslitin og skoða myndasafn frá leikunum. Hér eru pdf skjöl, keppnisgögn, úrslit, skipting verðlauna.