Category: Fréttir

Danish Open 2026 verður haldið um næstu helgi þ.e dagana 21. og 22. febrúar. Það eru ellefu keppendur frá Íslandi á meðal þátttakenda frá sex klúbbum, það eru þau Ari Einarsson JRB, Þórður Harðarson og Ólafur Karlsson JG, Magnús Þórðarson ÍR, Jónas Guðmundsson, Mikael Ísaksson, Skarphéðinn Hjaltason, Viktor Kristmundsson og Vasileios Tsagkatakis JR, Natalia Stobinska Ármanni og Jóhanna Noack Tindastól. Þeim til aðstoðar eru þeir Zaza Simonishvili landsliðsþjálfari og Gísli Egilsson. Á morgun laugardaginn 21. febrúar er keppt í senioraflokki og U18 og á sunnudaginn í U21 og U15. Að loknu móti taka þau þátt í tveggja daga æfingabúðum. Hér er hægt að fylgjast með mótinu.

Afmælismót JSÍ 2026 í aldursflokkum U13, U15 og U21 árs fór fram laugardaginn 14. febrúar hjá Judodeild Ármanns. Þátttakendur voru frá átta klúbbum, sextíu keppendur í U13/U15 og tuttugu og einn U21 árs aldursflokki. Frá JR voru þátttakendur tuttugu og fimm og unnu þeir alls fjórtán gullverðlaun, fjögur silfur og sex bronsverðlaun. Mótið var skemmtilegt og gekk vel fyrir sig, það hófst kl. 12 og lauk um kl. 16. Fullt af flottum og spennandi viðureignum sem enduðu oft með frábærum ippon köstum. Dómarar voru þeir Björn Sigurðarson, Gunnar Jóhannesson, Kolmar Jónsson og Yoshihiko Iura. Hér neðar eru myndir frá mótinu og verðlaunahöfum, úrslitin og videoklippa.

Góumót JR 2026 sem er opið öllum klúbbum verður haldið laugardaginn 21. febrúar. Mótið var fyrst haldið 2009 og hefur jafnan verið fjölmennt. Það er hugsað sem æfingamót fyrir aldursflokka U8, U9, U10 og U11 (7, 8,9 og 10 ára) og fá allir þátttakendur verðlaun. Skráning er til miðnættis 17. febrúar í skráningarkerfi JSÍ og sjá forsvarsmenn klúbba um allar skráningar og greiðslu þátttökugjalda. Vigtun verður frá kl. 12:30 til 13:00 og keppnin hefst svo eins fljótt og hægt er að lokinni vigtun og ekki seinna en kl. 14:00 og ætti að ljúka um kl. 16:00. Nánari tímasetning að lokinni skráningu. Muna að mæta með börnin á tilgreindum tíma í vigtunina svo enginn missi af þátttöku og mótið geti hafist samkvæmt áætlun. Hér er umfjöllun og myndir frá Góumótinu 2025.

Afmælismót JSÍ 2026 í aldursflokkum U13, U15 og U21 árs fer fram laugardaginn 14. febrúar hjá Judodeild Ármanns Engjavegi 7 og hefst það kl 12:00 hjá aldursflokkum U13 og U15 og ætluð mótslok hjá þeim kl. 13:30 og hefst þá keppni í U21 árs aldursflokki og mótslok um kl. 15:00. Vigtun fer fram á keppnisstað föstudaginn 13. feb. frá 18-18:30 og á keppnisdegi frá kl. 10:30 – 11:00. Nánari upplýsingar hér.

Helena Bjarnadóttir, Aðalsteinn Björnsson, Mikael Ísaksson og Romans Psenicnijs keppa um helgina á Sarajevo Junior European Cup 2026 í Bosníu og Herzegovinu og með þeim í för er Zaza Simonishvili landsliðsþjálfari. Mótið stendur yfir frá 7 til 8 febrúar og að móti loknu taka þau þátt í æfingabúðum frá 9-11 febrúar. Helena keppir á morgun laugardaginn 7. febrúar og allir strákarnir keppa svo á sunnudaginn. Keppnin hefst klukkan 8 að morgni á okkar tíma báða dagana. Helena keppir á velli 3 og á 25 viðureign sem gæti verið um kl. 10. Romans keppir líka á velli 3 og á 7 viðureign, Alli á 3 viðureign á velli 2 og Mikael á 9 viðureign á sama keppnisvelli. Þátttakendur eru 304 frá 21 þjóð, 202 karlar og 102 konur. Hér er drátturinn og fylgjast má með keppninni í beinni útsendingu á JudoTv.

París Grand Slam 2026 er haldið um helgina 7-8 febrúar. Grand Slam París sem er seniora mót er líklegast sterkasta Grand Slam mót ársins þar sem mætast flestir bestu judomenn og konur heims 488 keppendur frá 78 þjóðum. Því miður erum við ekki með keppendur núna en á næsta ári má búast við því. París Grand Slam er jafnframt eitt skemmtilegasta mótið til að fylgjast með svo ekki sé talað um að mæta á staðinn en höllin, Accor Arena Bercy sem tekur um 20.000 manns, er sneisafull alla helgina sem er kanski ekkert undarlegt því judoiðkendur í Frakklandi eru um 600.000 manns. Búið er að draga og hægt er að fylgjast með keppninni í beinni útsendingu.

Kjör íþróttamanns Seltjarnarness í kvenna og karlaflokki fór fram í dag og var Aðalsteinn Karl Björnsson úr Judofélagi Reykjavíkur kjörinn íþróttamaður Seltjarnarnessbæjar 2025. Til hamingju með kjörið.

Afmælismót JSÍ 2026 í aldursflokki U18 og senioraflokkum var haldið í æfingasal Judofélags Reykjavíkur laugardaginn 24. janúar. Frá 2013 hefur Afmælismót seniora verið sameinað Reykjavík Judo Open sem er opið alþjóðlegt mót en því miður féll það niður í ár. Það voru rúmlega fjörtíu keppendur skráðir til leiks frá sex klúbbum og ánægjulegt að sjá allmarga nýliða spreyta sig sem stóðu sig vel. Mótið gekk vel fyrir fyrir sig, margar frábærar viðureignir sem enduðu oft á glæsilegum ippon köstum sem sjá má í meðfylgjandi videoklippu. Mótsstjórn var í höndum Ara Sigfússonar og tímaverðir voru þeir Gunnar Tryggvason og Viktor Kristmundsson og um dómgæslu sáu þeir Ármann Sveinsson, Björn Sigurðarson, Gunnar Jóhannesson og Yoshihiko Iura. Hér eru úrslitin  myndir af verðlaunahöfum og frá keppninni og videoklippan.

Afmælismót JSÍ 2026 í aldursflokkum U18 (15-17 ára) og senioraflokki sem halda átti hjá ÍR laugardaginn 24. janúar hefur verið fært til JR að Ármúla 17. Vigtun verður hjá JR föstudaginn 23. jan. frá kl. 18:00-18:30 og á keppnisdegi frá kl. 11:30-12:00 og mótið hefst svo kl. 13. Nánar hér.

OTC æfingabúðum í Mittersill í Austurríki eru haldnar dagana 7-14 janúar en þær eru líkast til sterkustu æfingabúðir sem haldnar eru ár hvert í heiminum. Alla jafnan sækja þær bestu judomenn og konur heims og eru þær liður í undirbúningi þeirra fyrir stórmótin sem fara að hefjast eins og Grand Slam, Grand Prix og fleiri. Þau Helena Bjarnadóttir, Aðalsteinn Björnsson, Mikael Ísaksson, Romans Psenicnijs og Skarphéðinn Hjaltason eru á meðal þátttakenda í Mittersill ásamt Zaza Simonishvili landsliðsþjálfara. Hér má finna myndir frá æfingabúðunum.