Fréttir

Það verður venjulegur dagur mánudaginn 15. júní, börn 11-14 ára frá kl. 17-18 og 15 ára og eldri frá kl. 18-19:30 en frá og með þriðjudeginum 16. júní breytist þetta og æfingar verða aðeins þrisvar í viku út júní. Æft verður á mánudögum, þriðjudögum og fimmtudögum frá kl. 18-19:30 en Gólfglíma 30+ verður eins og venjulega á þriðjudögum og fimmtudögum frá 17-18 og laugardögum frá 11-12.

Norðurlandameistaramótið 2026 verður haldið í Finnlandi um næstu helgi. Þangað fer fjölmennur hópur keppenda frá Íslandi eða um tuttugu og tveir auk þjálfara og aðstoðarmanna. Frá JR fara sextán keppendur tólf karlar og fjórar konur og keppa þau ýmist í cadett, juniora og eða seniora flokkum. Keppt verður á laugardag og sunnudag og er hægt að fylgjast með keppninni í beinni útsendingu.

Mánudaginn 8. júní voru afhent viðurkeningaskjöl hjá 11-14 ára aldurshópnum fyrir þátttökuna á vorönn 2026. Myndin hér ofar er frá afhendingunni. Síðasta æfing á önninni hjá þeim verður næsta mánudag þ.e. 15. júní. Æfingar hefjast svo aftur seinnipart ágúst og verður auglýst hér á vefnum og facebook síðu okkar. Takk fyrir önnina og sjáumst í ágúst.

Aðalfundur JR var haldinn fimmtudaginn 28. maí. Jón Hlíðar Guðjónsson formaður JR setti fundinn og bauð fundargesti velkomna. Gengið til dagskrár og kosnir fastir starfsmenn fundarins. Ari Sigfússon var kosinn fundarstjóri og Eyjólfur Orri Sverrisson ritari. Fráfarandi stjórn flutti starfsskýrslu og lagði fram reikninga. Umræður um skýrslu og reikninga og fyrirspurnum svarað. Starfsskýrsla og reikningar bornir undir atkvæði og samþykktir samhljóða. Ein tillaga að lagabreytingu barst sem hafði að gera með að tillögur til skulu berast stjórn með viku fyrirvara, en ekki 2 vikna fyrirvara. Var tillaga borin undir atkvæði og samþykkt samhljóða. Engar aðrar tillögur lágu fyrir fundinum.

Næst var komið að kosningu stjórnar og skoðunarmanns. Jón Hlíðar Guðjónsson var endurkjörinn formaður sem og allir aðrir stjórnarmenn frá síðasta ári þannig að stjórnina skipa ásamt Jóni Hlíðari þau Daníela Rut Daníelsdóttir, Eyjólfur Orri Sverrisson, Magnús Jóhannsson og Alfreð Atlason og í varastjórn Ari Sigfússon og Þormóður Jónsson kemur nýr inn og skoðunarmaður var kjörinn Runólfur Gunnlaugsson. Endurkjörinn formaður, Jón Hlíðar þakkaði fundargestum fyrir komuna og góða fundarsetu og sleit fundi.

fgnxfg

Síðasta æfing á vorönn hjá börnum 7-10 ára var haldin í gær 28. maí og fengu þau þá afhent viðurkenningaskjöl fyrir þátttökuna á önninni. Æfingar hefjast svo aftur seinnipart ágúst og verður auglýst hé á síðunni og facebook þegar nær dregur. Með börnunum á myndinni hér ofar er Zaza Simonishvili þjálfari. Takk fyrir önnina.

Síðasta æfing fyrir sumarfrí hjá börnum 5-6 ára var haldin laugardaginn 23. maí. Á æfinguni var haldið lítið mót, sumarmót JR þar sem allir fengu tvær viðureignir og var virkilega gaman að sjá hve vel þau voru undirbúin. Þau þekkja merki dómara, vita hvernig ganga á inn og út af keppnissvæðinu, hneigja sig fyrir mótherja fyrir og eftir glímu og voru með fína tækni bæði í standandi og gólf glímu. Að loknu móti var stutt hlé og fengu þau sína vanalegu hressingu. Síðan var farið í nokkra leiki og að lokum afhent viðurkenningarskjal fyrir þátttöku á önninni.

Síðustu tvær vikur hafa börnin tekið próf og fengið viðeigandi strípu í beltið sitt en ein strípa þýðir ein önn og liturinn segir til um aldur barns. Fjólublá strípa þýðir 6 ára og yngri en síðan tekur við gul (7 ára), rauð (8 ára), græn (9 ára) og blá (10 ára) og þar á eftir koma lituð belti.

Að lokum verður að geta þess að þjálfarar barnanna þeir Ari Sigfússon, Höskuldur Einarsson og Jóhann Másson sem hafa áratuga judoreynslu stóðu sig frábærlega í kennslunni, náðu vel til þeirra og eiga sérstakar þakkir skildar.

Æfingar hefjast aftur seinnipartinn í ágúst og verða auglýstar hér á judo.is. Vonumst við til þess að sjá ykkur þá sem flest aftur. Hér neðar eru myndir frá síðustu æfingu.

Í hádeginu 20. maí var tekin æfing í Himnastiganum í Kópavogi í blíðskapar veðri. Upp stigann voru hlaupnar tíu ferðir og síðan skokkað niður og smá pása áður en lagt var af stað í næstu ferð. Þrettán JR ingar voru mættir og kláruðu þeir allir verkefnið sem tók rétt rúman klukkutíma.

Það var flottur árangur hjá keppendum okkar á London Open í gær en þeir unnu samtals til fimm verðlauna. Í -90 kg flokki karla sigraði Mikael Ísaksson og Aðalsteinn Björnsson tók bronsið. Það snerist hinsvegar við í U21 árs aldursflokknum í sama þyngdarflokki en þar sigraði Aðalsteinn og Mikael hafnaði í öðru sæti. Í U21 árs aldursflokki +100 kg sigraði Arnar Arnarsson frá JS og í senioraflokki vann hann tvær viðureignir. Kjartan Hreiðarsson komst ekki á pall að þessu sinni en hann keppti í -100 kg þyngdarflokki karla og var aðeins einni glímu frá bronsverðlaunum. Til hamingju með frábæran árangur.

Sumarmót JR 2026 var haldið laugardaginn 16. maí og voru þátttakendur þrjátíu og tveir frá fimm klúbbum. Keppnin hófst kl 13 og lauk um kl. 14:30. Þetta mót er hugsað sem æfingamót fyrir aldurshópinn 7 til 10 ára. Keppendum er raðað saman eftir aldri og þyngd eins og venjulega en stundum þarf að blanda saman aldursflokkum og kyni en alltaf reynt að hafa keppendur í sem næst í þyngd og allir fá þátttökuverðlaun. Starfsmenn voru þeir Jóhann Másson og Gunnar Tryggvason sem sáu um mótsstjórn og klukku, dómarar voru þeir Ari Sigfússon og Viktor Kristmundsson og Zaza Simonishvili og Jemerllein Machado héldu utan um keppendur JR. Hér er video klippa og úrslitin.

Það verða fjórir keppendur frá Íslandi á London Open 2026 um næstu helgi. Það eru þeir Aðalsteinn Björnsson og Mikael Ísaksson sem keppa í -90 kg flokki, Kjartan Hreiðarsson í -100 kg og Arnar Arnarsson +100 kg og munu þeir Aðalsteinn, Mikael og Arnar einnig keppa í U21 árs flokknum. Keppt verður í þeirra flokkum sunnudaginn 17. maí og ef einhver hlekkur finnst á mótið verður hann settur hér inn.