Fréttir

Lokahóf Judosambands Íslands fór fram laugardaginn 6. desember og var þar eins og venja er tilkynnt um val á judomönnum ársins, þau efnilegustu, dómari ársins og veittar viðurkenningar fyrir dan gráðanir.  

Judomenn ársins 2025 eru þau Aðalsteinn Björnsson og Helena Bjarnadóttir bæði úr JR. Aðalsteinn var að hljóta þesa nafnbót í fyrsta skipti en Helena í það þriðja. Bæði stóðu þau sig vel á árinu og er hér stikklað á því helsta.

Aðalsteinn sigraði á Smáþjóðaleikunum í -90 kg flokki, brons á Matsumae Cup U21 -90 kg, varð Íslandsmeistari í opnum flokki karla, silfur á Reykjavík Judo Open í -90 kg flokki og á Íslandsmeistaramótinu í sama flokki. Gull á vormóti JSÍ í -90 kg flokki karla og gullverðlaun í U21 árs aldursflokki bæði á Íslandsmeistaramóti og Afmælismóti JSÍ.

Helena sem býr í Serbíu og keppti því ekkert hér heima en náði góðum árangri erlendis. Á Smáþjóðaleikunum var hún með brons og einnig brons á Norðurlandameistaramótinu í U18. Hún stóð sig frábærlega á European Cup Cadet í Riga er hún vann til silfurverðlauna og keppti um bronsverðlaunin í Grikklandi á European Cup Cadet í Þessalóníu.

Efnilegustu judomenn ársins 2025. Þau efnilegustu eru valin úr aldursflokkum U18/U21 árs og er stuðst við punktastöðu þeirra. Efnilegastur í karlaflokki er Viktor Kristmundsson úr JR en í kvennaflokki eru tvær stúlkur sem hljóta þessa nafnbót að þessu sinni þar sem þær voru það jafnar og erfitt að gera upp á milli þeirra og því var ákveðið að þær myndu báðar verða fyrir valinu. Efnilegastar í kvennaflokki eru þær Agla Ólafsdóttir úr JS og Emma Thueringer úr JR.

Veittar voru viðurkenningar fyrir dan gráðanir sem að þessu sinni voru eingöngu 1. dan gráðanir. Þeir Einar Jón Sveinsson, Gunnar Ingi Tryggvason, Jónas Björn Guðmundsson, Orri Snær Helgason tóku 1. dan á þessu ári en þeir Böðvar Arnarsson og Daníel Árnason tóku gráðuna í lok árs 2023 og hefðu átt að fá sína viðurkenningu í fyrra en því miður fórst það fyrir og er hér bætt úr því.

Dómari ársins er Björn Sigurðarson úr Ármanni en hann hefur lagt mikla og óeigingjarna vinnu í dómgæslustörf móta.

Það verða þrír keppendur frá JR sem taka þátt í Baltic Sea Championship 2025 en það er alþjóðlegt mót haldið í Orimattilla í Finnlandi dagana 6-7 des. Baltic Sea Championship er afar sterkt mót en skráðir keppendur eru 664 frá tíu þjóðum. Fyrir utan keppendur frá norðurlöndunum eru keppendur frá Eistlandi, Lettlandi, Þýskalandi, Ísrael og Úkraníu. Keppt er í aldursflokkum, U15, U17, U20 og senioraflokkum.

Keppendur okkar að þessu sinni í senioraflokki karla eru þeir Elías Þormóðsson sem keppir í -73 kg flokki, Vasileios Tsagkatakis -81 kg flokki og Mikael Ísaksson -90 kg flokki en auk þess keppa þeir Elías og Mikael einnig í aldursflokki U20. Keppt verður í U20 á laugardaginn og í senioraflokkum á sunnudaginn og báða dagana hefst keppni hjá þeim um kl. 11 á okkar tíma. Hægt verður að fylgjast með keppninni í beinni útsendingu en hér er keppendalistinn og nánari upplýsingar um mótið. Þjálfari og fararstjóri er Þormóður Jónsson

Reykjavíkurmeistaramótið 2025 verður haldið í ÍR heimilinu Skógarseli 12 laugardaginn 29. nóvember en það er í umsjón ÍR í ár. Vigtun föstudagskvöldið 28. nóv í ÍR heimilinu frá 18:00 til 18:30. Einnig er hægt að vigta á keppnisdegi frá kl. 11:00 til 11:30 og mótið hefst svo kl. 12:30 og mótslok áætluð um kl. 15:00. Keppt verður í öllum aldursflokkum þ.e. U13, U15, U18, U21 og karla og kvennaflokkum og lágmarksgráða er gult belti, 5. kyu . Lokaskráningardagur er þriðjudagurinn 25. nóv. í gegnum skráningarkerfi JSÍ.

Sveitakeppni JSÍ 2025, Íslandsmeistaramót í liðakeppni klúbba sem átti að fara fram 15. nóvember var færð til þriðjudagsins 18. nóv. og var keppnin haldin hjá Judofélagi Reykjavíkur.

JR sendi tíu sveitir til leiks, eina kvennasveit og þrjár karlasveitir í senioraflokki, tvær karlasveitir í U21 árs flokki og tvær drengjasveitir og tvær stúlknasveitir í U15 ára aldursflokki. Því miður var engin þátttaka frá öðrum klúbbum í þessari sögulegu keppni sem spannar yfir fimmtíu ár og er það í fjórða skiptið sem það gerist (2021, 2022, 2024, 2025).

Sveitakeppni karla var fyrst haldin 1974 og var þetta í 49 skipti sem keppnin fór fram en mótið féll niður 1993, 2002 og 2020. Fyrst var keppt í Sveitakeppni kvenna 1999. Hér má sjá hvaða lið hafa sigrað í þessari keppni.

Þar sem önnur judofélög voru ekki með keppendur þá kepptu sveitir JR innbyrðis nema kvennasveitin en þar var JR bara með eina sveit svo þar var engin keppni. Til að gera keppnina sem skemmtilegasta og kanski mest spennandi og jafna þá var ekki raðað eftir styrkleika keppenda í A og B sveitir heldur var dregið um það í hvaða sveitir keppendur röðuðust.

Keppnin var stórskemmtileg og viðureignir margar hverjar jafnar og spennandi og engin leið að átta sig á því fyrirfram hvaða sveit myndi bera sigur úr býtum. Dómarar voru þeir Gísli Egilson og Ægir Valsson og mótsstjórar þeir Ari Sigfússon, Jóhann Másson og Þorgrímur Hallsteinsson sem allir leystu sitt verkefni vel af hendi sem og þjálfarar og aðstoðarmenn þeirra og þökkum við fyrir þeirra framlag.

Þetta var í tuttugusta og fjórða skipti sem JR sigrar í sveitakeppni karla og tólfta árið í röð. Hér eru úrslitin, U15 stúlkur, U15 drengir, U21 karlar og senioraflokkur karla. Hér neðar eru myndir frá mótinu og hér er stutt videoklippa.

Conegliano European Open verður haldið á Ítalíu helgina 8 til 9 nóvember og verða þeir Aðalsteinn Björnsson og Skarphéðinn Hjaltason á meðal þátttakenda og með þeim í för er Zaza Simonishvili landsliðsþjálfari. Báðir keppa strákarnir í – 90 kg flokki á sunnudaginnn og hefst keppnin kl. 8 að morgni á okkar tíma. Skarphéðinn á sjöundu glímu á tatami 2 og Alli á fimmtándu á sama velli. Þátttakendur eru 310 frá 37 þjóðum, 205 karlar og 105 konur. Hér er drátturinn og fylgjast má með keppninni í beinni útsendingu á JudoTv.

Haustmót JSÍ 2025 seinni hluti var haldið laugardaginn 1. nóvember í Íþróttahúsi Akurskóla í Reykjanesbæ og nú var keppt í aldursflokkum U18 og senioraflokkum. Mótið sem hófst kl. 11:00 gekk vel fyrir sig, dómgæsla og mótsstjórn hin besta og lauk því um kl. 15. Keppendur voru fjörtíu og þrír frá fimm klúbbum, Grindavík, JG, JRB, JS og JR. Keppendur JR-inga voru tuttugu og sex og stóðu þeir sig afar vel en þeir unnu öll tólf gullverðlaunin auk fimm silfurverðlauna og fimm bronsverðlauna. Óskum við keppendum öllum til hamingju með árangurinn. Hér eru úrslitin og myndir af verðlaunahöfum.

Haustmót JSÍ 2025 seinni hluti (fyrri hluti var haldinn 4. okt. á Selfossi) verður haldið laugardaginn 1. nóvember í Íþróttahúsi Akurskóla að Tjarnarbraut 5 í Reykjanesbæ. Keppt verður í aldursflokkum U18 og senioraflokkum. Mótið hefst kl. 11 með keppni í U18 og strax að þeirri keppni lokinni hefst keppni í senioraflokkum og áætlað að mótinu ljúki um kl. 14:00. Vigtun fer fram í Akurskóla föstudaginn 31. okt. frá 18-18:30 og á sama stað fyrir þá sem það vilja á keppnisdegi frá kl. 9:30-10:00.

Helgina 18 og 19 okt. hefst í Lettlandi Riga Millennium Team Cadet European Cup og á meðal keppenda eru sex keppendur frá Íslandi ásamt Zaza Simonishvili þjálfara en það eru þau Eyja Viborg -52, Weronika Komendera -57, Helena Bjarnadóttir -70, Orri Helgason -66, Jónas Björnsson -73 og Viktor Kristmundsson +90. Á morgun keppa þau Eyja og Orri og á sunnudaginn keppa hin. Keppnin hefst klukkan 6 að morgni á okkar tíma. Orri á fjórðu glímu á velli 1 og Eyja 23 glímu á velli 3. Þátttakendur eru 419 frá 24 þjóðum, 303 karlar og 116 konur. Hér er drátturinn og fylgjast má með keppninni í beinni útsendingu á JudoTv.

Judofélag Reykjavíkur (JR) sem verður 60 ára á árinu en það var stofnað var 16. okt. 1965 hélt sitt árlega Afmælismót 11. okt. síðastliðinn í yngri aldursflokkum. Mótið hófst kl. 13 og áætlað var að því myndi ljúka kl. 16 en vegna aukinnar þátttöku lauk því ekki fyrr en kl. 17. Á þessu móti er keppt í aldursflokkum frá 7 til 14 ára og engin gráðuskilyrði og einnig var “keppt” í aldursflokki 5-6 ára á æfingu barna hjá JR fyrr um morguninn. Eins og áður sagði var þátttaka mikil eða rétt tæplega eitt hundrað þátttakendur með börnunum í 5-6 ára aldursflokki og hafði hún því aukist um 50% frá 2024 en þá voru þeir sextíu og fimm. Keppendur komu frá átta eftirfarandi klúbbum, Judodeild Ármanns, Judodeild Grindavíkur, Judodeild Selfoss, Judodeild Suðurnesjabæjar, Judodeild Tindastóls Judofélagi Garðabæjar, Judofélagi Reykjanesbæjar auk JR en þátttökufjölda má sjá hér. Keppnin var bæði skemmtileg og oft á tíðum spennandi og fullt af flottum viðureignum og gaman að fylgjast með tilþrifum hjá þessum ungu keppendum. Starfsmenn mótsins voru þeir Ari Sigfússon, Jóhann Másson, Daníel Hákonarson og Bjarni Friðriksson sem sáu um vigtun og mótsstjórn, dómarar voru þau Weronika Komendera, Jónas Guðmundsson, Viktor Kristmundsson, Kolmar Jónsson og Björn Sigurðarson IJF dómari sem var þeim til halds og trausts og kunnum við honum okkar bestu þakkir. Þeir Zaza Simonishvili, Guðmundur Jónasson, Höskuldur Einarsson, Daníela Daníelsdóttir og Sólrún Steinarsdóttir héldu utan um keppendur JR-inga. Þar sem við vorum komin í tímaþröng voru verðlaun í aldursflokkum 7-10 ára ekki afhent fyrir hvern þyngdarflokk fyrir sig heldur voru þau afhent til alls keppendahópsin í einu lagi. Hér neðar eru myndir frá mótinu í öllum aldursflokum, hér eru úrslitin og video klippa.

Fyrri hluti Haustmóts JSÍ 2025 var haldið á Selfossi í umsjón Judodeildar UMFS sem fórst verkið vel úr hendi. Mótið sem hófst kl. 13:00 var afar skemmtilegt og gekk vel fyrir sig. Dómgæsla og mótsstjórn var hin besta og fullt af frábærum og skemmtilegum viðureignum og lauk mótinu um kl. 15:30. Keppendur voru fimmtíu og sjö frá tíu klúbbum og var keppt í aldursflokkum U13, U15 og U21 árs. Keppendur JR voru sautján og stóðu þeir sig býsna vel en þeir unnu alls til sautján verðlauna, níu gullverðlaun, sjö silfurverðlaun og ein bronsverðlaun. Óskum við keppendum öllum til hamingju með árangurinn. Hér eru úrslitin, myndir frá keppninni og verðlaunahöfum og video klippa.