Þórir Rúnarsson dæmdi nú um helgina á SWOP í Boros.  Þetta var mjög sterkt mót og voru keppendur tæplega 380 manns og hefur því fjölgað um 70 manns frá því í fyrra en því miður áttum við engan fulltrúa (keppanda) á mótinu í ár fyrir  utan Þóri sem dæmdi fjöldan allan af glímum bæði í undankeppninni sem og nokkrar viðureignir um verðlaunasæti. Það er alveg frábært hvað hann er virkur og duglegur að sækja sterk mót um allan heim og afla sér meiri reynslu sem skilar sér svo beint til okkar hér á klakanum í betri dómgæslu. Áfram Þórir.

Á morgun Laugardag  kl. 12.30 verður á Stöð 2 sport meðal annars umfjöllun um júdó í þættinum Á vellinum – íþróttaþáttur fyrir ungt fólk sem er nýr og mjög athyglisverður þáttur. Ekki missa af honum.

Breytt dagsetning  verður á Reykjavíkurmótinu og Kyu mótinu ásamt dómaranámskeiðinu sem haldið er samhliða því en staðsetning verður sú sama.

Dómaranámskeiðið sem vera átti 5. nóv. verður 12. nóv. á  Akureyri

Kyu mótið sem vera átti 6. og 7 .nóv. verður 13. og 14. nóv. á  Akureyri

Reykjavíkurmótið sem vera átti 13. nóv. verður miðvikudagskvöldið 10. nóv. og haldið hjá Júdódeild Ármanns.

Nánari upplýsingar koma svo fram í tilkynningu sem send verður á klúbbana.

Kata-Æfingar að hefjast að nýju

Fimmtudaginn 28 október hefjast Kata æfingar að nýju í Skell (æfingasal JDÁ).  Æfingatíminn er 20:15-21:15. Þetta eru góðar æfingar sem bæði nýtast þeim sem klára vilja Dan gráður, eða fyrir aðra þá sem fullnuma vilja verða í Júdó. Það eru merkilega margar æfingar sem ekki eru leyfðar í keppni sem fullfáir þekkja. Allir júdómenn og konur eru hvattir/hvattar til að bæta þekkingu sína og taka þátt í fróðlegum og skemmtilegum æfingum. Þjálfarar eru Yoshihiko Iura 7.dan og Björn H. Halldórsson 4.dan.  Á áætlun er að æfingarnar verði haldnar eftirtalda daga : 28 okt. – 04.nóv. – 11.nóv. – 18.nóv. – 25.nóv. -  02.des. – 09.des. – 16.des.

Því miður hef ég ekki nákvæmar fréttir við hverja þeir hafa keppt en staðan er svona. Þormóður er kominn í úrslit, var í þriðja sæti í fyrra, Hermann keppir um bronsið , var í sjöunda sæti í fyrra en því miður tapaði Ægir fyrstu og uppreisnarglímunni  en hann hefur minnstu keppnisreynslu þeirra félaga. Þormóður og Hemmi halda áfram keppni um kl. 15:30 í dag.

Í framhaldi af  góðum árangri á heimsmeistaramótinu í Tokyo í september fóru þeir Hermann Unnarsson og Þormóður Jónsson ásamt Ægi Valssyni til Tékklands og munu dvelja þar við æfingar í um átta vikur og þar mun aðstoða þá okkar kæri vinur Michal Vachun fyrrum landliðsþjálfari okkar Íslendinga. Með þeim í för átti Kristján Jónsson einnig að vera en því miður gat ekki orðið af því að þessu sinni. Þeir Hermann og Þormóður hafa dvalið við æfingar í Tékklandi áður og látið vel af því en Ægir er að fara í fyrsta skipti og þaðan munu þeir sækja mót og æfingabúðir sem gefast. Þau verkefni sem framundan eru er þátttaka á þremur alþjóðlegum mótum og er það fyrsta á morgun í Dubrovnik í Króatíu (XIII Int. judo Cup of Dubrovnik). Þeir keppa allir á morgun, Hermann í -81 kg, Þormóður í +100 kg og Ægir í -90 kg.  og taka síðan að móti loknu þátt í nokkurra daga æfingabúðum. Í fyrra varð Þormóður í þriðja sæti og Hermann í því sjöunda. Helgina 6-7 nóvember keppa þeir á Opna Finnska í Helsinki og helgina þar á eftir eða 13-14 nóvember á Senior Europian Cup á Marabella á Spáni og einnig að því loknu þá taka við þriggja daga æfingabúðir. Á Opna Finnska og  Europian Cup á Spáni fara fleiri Íslendingar þar á meðal nokkrir JR ingar eins og Kristján Jónsson og Jón Þór Þórarinsson. Um leið og eitthvað fréttist af gengi okkar manna verður það birt hér á vefnum.